Lengpui Airport engtin nge ni dawn?

Uluk takin sorkarin a ngaihtuah mek a, thutlukna an la siam fel lo a ni awm e. Indian Air Force kuta hlan lamin a bûk rit zawk ni awmin kan lo hria a, thutlukna siam sual palh a hlauhawm hle. Mipui phurrit kan siam palh hlauh chuan, sum lamah lo hlawk zawk pawh ni se, mipui zalenna rahbeh a nih hlauh chuan, thutlukna pawi tak kan siam palh ang tih a hlauhawm. Uluk lehzualin sorkar hian a rawn ngaihtuah turah ngai ila.

Pu J. Lalhmingliana, Wing Commander (retired), Lengpui Airport kan neihna atana mi ṭangkai tak leh Airport kan neih hnua Mizoram sorkarin Lengpui Airport Chief Aviation Consultant atana kum 2019-2023 chhunga a rawih thu leh hla kan lo hriat ve aṭang hian Lengpui Airport chungchang hi i han thlir ho teh ang.

AAI-IN AN DUH LO THIANG LO

Pu Hminga sawi dan chuan, Airport Authority of India hian Lengpui Airport hi enkawl an duh lo thiang lo niin a sawi a. AAI Act an bawhchhe thiang lo zawk a ni. An duh dan MOU pawh vawi 8 lai Mizoram sorkarah an rawn thehlut tawh a, keini duh dan kan sawi nen kan la inrem fel thei lo zawk a ni. Kan mutânna lian ber chu sum sen tamna ber ni ṭhin, security force atan CISF hmang lova state security force hman an rawtnaah kan la inrem thei lo. Airport dang zawng zawngah CISF an hman vek laia Lengpui Airport atana state police hman an tum tlat hi pawm harsa kan ti a ni. Chung lo pawh point 3 velah kan la inrem thei lo. Heng kan inrem theih lohnate hi Ministry of Civil Aviation-ahte top level-a sawi rem theih a ni, a ti.

SUM HAUTAK LUTUK TIH HI A DIK RENG EM

Amah Pu Hming vekin, official record a rawn phawrh chhuah aṭang chuan tun hnaia Airport tihchangtlun nana kan chhehvel Airport senso leh hlohte nena khaikhinin, Lengpui Airport-in kan hloh chu nêp tak a ni. Agartala Airport atan Rs. 438 crore senso, hloh zat Rs. 115.61 crore. Imphal Aiport senso Rs. 720 crore, hloh zat Rs. 45.64 crore. Lengpui Aiport atan chuan a tir aṭanga kan senso a vaiin Rs. 213 crore, hloh zat Rs. 2.87 crore a ni. Hetah hian state sum kan hman tlemte chauh a ni, a ti.

HLOH LOH DAN A AWM EM?

Pu Hminga sawi dan chuan, Aviation hi amah inenkawl turin dah ila, sum kan lak luh theihna, passenger service fee te, security fee-te la ila kum khatah crore kan la lut thei ang. Thlawhna lian pakhat lo ṭum hian Rs. 10,000 te an chawi a ngai a, ni khatah thlawhna eng emaw zat a lo ṭum ve tawh lehnghal. Night parking charge leh parking charge pangngaite la vek bawk ila. Tin, quarters kan sak zawng zawng luahtute hnenah khuan in luah man la vek bawk ila, quarters 73 awmah khuan tam tak kan la lut bawk ang, a ti. Heng kan lak luh theih zawng zawng la miah lova kan awm chhan chu, enkawltu mumal sorkarin a pek loh vang niin a sawi.

IAF-IN LA TA SE A PAWI DAWN EM?

Pu Hminga chhanna chu, IAF awm chhan hi Mizoram mipui mamawh a ni lo, tih a ni tawp mai. IAF awm chhan chu ram ven him a ni. Civil flying atan chuan a pawi lutuk. Silchar Airport-te khu IAF enkawl a ni a, kum 40 chuangin kan aiin an upa tawh, an ṭhang thei lo. Kha leh chen an lo enkawl tawh kha an awp hlum lo chuah a ni. Tezpur leh Jorhat te pawh an ṭhang thei lo. IAF nena inkawp airport reng reng ṭhanna chance a awm thei lo. Airport cheina tur thing phunte a rem ve tlat lo. Hyderabad pawh IAF nen an inkawp a, a ṭhang thei thlawt lo va, airport dang an siam ringawt. Bangalore pawh a ṭhan theih loh avangin airport dang an siam leh tawh. Kanpur leh Allahabad pawh IAF ta liau liau a nih avangin a ṭhang thei thlawt lo, a ti.

ENGTIN NGE NI TA ANG LE?

Mizoram hi India leh ram dang inrina hnaia awm a ni a, IAF-te hian inkhuar nghehna an zawng reng a, Lengpui Airport hi an hmu tai nasa tih hai rual a ni lo. Offer îtawm tak tak pawh min sawihmuh a ni awm e. Mahse, hmun danga an sûlhnu kan hmuh tawh aṭang chuan airport ṭhang thei lo bak kan chan bik a rinawm loh.

Mizoram mipui hamṭhat nan Defence budget hi an hmang thiang ang em, eng head aṭangin nge an hman ang? Pu Hminga sawi zel dan chuan, Mizo mipuite’n damlo serious phurh thlak a ṭul changa NEIGHRIMS pan ngaia helicopter an hmanin, Shillong-a ṭumna remchang awm chu Upper Shillong-a Eastern Air Command Headquarters-a helipad an neih khu a ni. Damlo phur thlaa zuk dah zeuh tur pawhin min phalsak loh hi a tam zawk a ni. Security chhuanlam an neih tawh chuan tih luih theih an ni tawh lo. Ṭhuampui Helipad kan hman ṭhin pawh civilian an lo kal nasa lutuk tiin min nawr chhuak a, Amit Shah meuh a lo kal pawhin kan hman an phal tawh lo, a ti. Lengpui Airport hi IAF nen kan inhman ṭawm a nih chuan security chhuanlam avanga mipuiin kan hman ṭawm theih loh hun hi a tam viau mai lawng maw?

Pawisa hloh tam lo zawnga kal theih dan awm reng si, tun thlenga a enkawltu kan la dah mumal lo te, AAI enkawl nana min dâltu sutkian nana hma kan la la thui lote hi thu dik a nih ngai chuan, IAF lam hi chu la hawi lo phawt ila, mipui kan lawm zawk mai lo'ng maw?

Engpawhnise, Pu Hminga hi sorkar lam pawhin an râwn ve tho a, a rawtnate pawh a thehlut ve niin a sawi a. A rawtna aia ṭha an hmu chhuak a, AIF kuta hlan ṭhat zawkna a la awm tho a nih chuan, chu thu tal chu kan sorkar lam hian mipui min hrih chiang ve se la. Kan ram tana ṭha tur duhtu vek kan ni. Tih sual palh chuan siamṭhat leh chu a har tawh khawp ang. Silai keng zawk hmachhawn hi chu sut tlang har deuh mai an ni tih hre chiangtu Zo fate kan nih hi.

- Lalrinliana Colney