Youtuber-te kaihhruaina dan siam a ṭha lo maw?
Tun hma deuh kum 20 vel kal taah khan media lama senior tawh tak leh he lam kawnga mi advance tak Pu Biak Thansanga khan ‘Zin Mite Tan’ tih programme hmuhnawm leh bengvarthlak tak siam a, LPS Vision lamah kan lo thlir ṭhin a. Pu BTS-a hian ZONET Cable TV lam a zawm hnuah pawh khan Mizoram mipui tana hmuhnawm leh bengvarthlak tak tak tam tak a rawn chhawp chhuak chhunzawm zel a nih kha.
Tin, Skylink lamah khan tuna LPS Special Reporter ni ta Pu Vanneihthanga hian Special Report rawn buaipui chho ṭanin, Mizorama hmai tuam lar chhoh laia Special Report leh Sairang Tlawnga tui tla Special Report hmuhnawm leh hlimawm tak a rawn siam chhote kha mi tam zawk chuan kan lo thlir vek ka ring.
Khing ka tarlan pahnih Pu Biak Thansanga leh Pu Vanneihthanga te khi journalism inkaihhruaina hnuaia ke pên ṭhin an ni a. Pu Biak Thansanga hian media lam chawlhsan tawh rih mah se, a hun laia mipui hmuh theiha TV programme a chhawp chhuah ṭhinte kha chu mipui tana thlir hmuhnawm leh him tak a ni ṭhin. Chutiang bawkin vawiin thlenga he lam kawnga ke la pên mek Pu Vanneihthanga Special Report hi uluk taka in lo thlir ṭhin chuan, a him leh mawi tawk, mipuite’n kan lo hriat ve atana pawimawh chin hi a thliar thiam tlat zel.
Vawiinah chuan khawvel hmasawnna leh changkannain a ken tel zinga mi smartphone hûm thei tawh phawt chuan awlsam taka kan siam mai theih, a peih fâl tana sum hai luh mai theihna awlsam tak ni bawk YouTube channel hi Mizorama chengte zingah pawh nei kan tam tawh hle a, a tute mah hi lo siam ve suh in tih ngawt theih a ni bawk si lo.
Mizoram khaw tin hian Youtube channel nei, youtuber kan kawl vek tawh hialin ka ring. Kan youtuber te hian Mizoram mipui mai ni lo, khawvela mihring cheng zawng zawngte’n hmuhnawm leh en châkawm an tih tur video dap kualin an chhawp chhuak a. An chhawp chhuah zingah hian mithiam, fing leh changkang tak takte’n an enkawl, chhungkua pawha en leh ngaihthlak ho tlak, bengvarthlak leh hlimawm tak tak tam tak a awm.
He tih mek lai hian youtuber ṭhenkhat chet vel dan en hi chuan, inkaihhruaina dan felfai tak kan neih a hun tawh hle niin a hriat thung. Kum 2025 January thla chhung ringawt pawh hian youtuber zingah chhungkuaa en tlak loh, puitling tan pawh a îp chawih chawih chunga en ngam tawk tur, rawn pho chhuak lo zawk se tih rilruk rauh rauh, anni’n sûmkâr awm miah loa an rawn pho chhuah hmiah hmiah mai si hmuh tur a tam leh ta malh malh hle.
YouTube hi taima leh ti fuh tan chuan sum hmuhna ṭha leh awlsam tak pawh a ni thei a. Awlsam taka sum lak luh theih beiseia YouTube hmanga ka thil pho chhuah tur hi a him em, mi pawi ka lo sawi em, he video ka dah avang hian lo zak ngawih ngawih, rilru na ngawih ngawih, pawn pawh chhuak ngam loa lo ṭap zawih zawih hialte a awm em tihte hi kan ngaihtuah hmasak a ngai hle mai.
Sawi tur tam tak, zau leh kimchang zawka sawi tur awm ṭeuh mah se, tun hnaia kan youtuber-te chungchanga ka rilrua lo awm lian em em mai chu, kan state chhung chauha hman tur tal hi sorkar hian youtuber-te kaihhruaina dan felfai tak a siam thei lo em ni, tih hi a ni.
- Joseph LNTA, Dawrpui Jail Veng