Ngai teh, a lo thar ta

Darkar a ral a, ni a ral a, thla a liam a, kum a vei a. Mihringte hian kum thar hmel kan hmuh apiangin upat lam kan pan ve hret zel a. Mihring damlai tute mahin kan la hmuh loh leh kan la tawn ngai loh kum thar hmel chu nang leh kei hian kan hmu ta! A ropui i ti em? He kum thar hmel hmu thei tura nang leh keia nunna zuaha a awm hi a hlutzia i chhut ngai em? Lalpa Pathian zahngaihna vâng liau liaua he hun hi thleng thei kan ni tih hi kan hriatreng a ṭha awm e.

He kum lo thar hian kan ram leh hnam tan hian thil thar, a ṭha zawnga danglamna tam tak min thlen teh se. Ram leh hnamin hmasawnna kawng zawh tura mipuiin beiseina nasa tak kan neih hi a takah chang se la. Pharisai vervekte anga mi hnêna thil pek, mi fak nih hlawh duhna avanga tlangaupui vâk vâk ṭhin te hi i ti lo ang u. Lemchang nun a nih theih ṭhin avângin tlangaupui chiam chiam hi kan tih loh atan a ṭha zawk maithei. Mi ṭanpui avanga midangten an hriat vek theihna tur atana tlangau rin viaute hi pâwnlama lan mawi tum, chhûngril nun chapote tih dan a ni thei. Midangte mithmuh leh khawtlanga fak hlawh duhna avang chauha mi ṭanpui duhna rilru kan neih ṭhin te pawh hi ngaiteh; he kum tharah hi chuan i bansan ngam ang u.

Chuti ang thu kan sawi avang chuan midangte hi ṭanpui loh tur a ni kan tihna a ni hauh si lo. He kum tharah hian ṭanpui ngai nia kan hriatte chu ṭanpui i uar deuh deuh ang. Amaherawhchu, kan ṭanpui duhna rilru leh kan tlawmngaihna rilru chu lemchang nun ni lo se la. Intihlar tumna leh vantlanga lansarh tumna ni loin, thinlung chhûngril aṭanga chhuak, hmangaihna avanga thil ṭha tih duhna aṭanga tih ni rawh se kan ti a ni. Chhûngril nun aṭanga ṭhatna leh hmangaihna, khawngaihna leh lainatna aṭanga chhuak hmangin ṭanpui ngai nia kan hriatte hi ṭanpui ṭhin ila. Mahni intihlansarh tumna avanga midangte a dêra ṭanpuina hi he kum tharah hi chuan kan hnualsuat ngam tur a ni ang. He kum tharah hian mite fak hlawh duhna avang te, intihlar tumna leh vantlanga lan mawi duhna avanga lemchang chunga kan thiltih ṭhin hi rilru thianghlim leh thil ṭha tih duhna aṭanga chhuak ni rawh se kan ti a ni.

Ei leh bar zawnna kawngah pawh insiamṭhat ngaihna lai kan nei ngei ang. Kan hnathawhna hmunah mahni aia dinhmun hnuaihnung zawk te chunga inluling ṭhin mi kan ni em? Ka hnuaia hnathawkte hian keimah avang hian hrehawm an tih phah viau ṭhin em? Chhungkaw dinhmun harsa ve tak te hi ka hnuaia mi a nih avangin ka lo tihrehawm viau ṭhin em? Chuti ang mi chu ka lo nih chuan he kum tharah hian mahni insiamṭhatte pawh kan tum dawn lawm ni? Nungchang hi siamṭhat theih a ni tih a ni si a.

Kan kal phungah hian a dera lemchanna hian min chiah hneh ta hle ni hian a lang ṭhin. Chuti ang nun chuan kan hnam hi min eichhia ni hian a lang a. Kan inbihchian a, kan insiamṭhat vat loh chuan kan hmabak hi a ropui viau lo thei. In lo ngaihtuah ve mai mai ṭhin emaw ka hre lo. A bik takin sum leh paiah hian belhchian kan dawl lo fo. Kohhranah a ni emaw, eng pâwlah mai pawh hian pawisa kawltu (Treasurer) te pawisa kawl hi a bo duh bik riau ṭhin ni te hian ka hre ṭhin nia! Chumai ni loin, mak tih deuh mai ka neih ṭhin chu, keimahni mimal pawisa niloin pâwl pawisa kan kawl hi rukruin an ru bo duh bik riaute hian ka hre bawk ṭhin. Keimahni mimal pawisa chu a hîm-pîal thung ṭhin lawi si!

Sum leh pai hi mamawh teh mah ila, tangka sum ngaina lutuk erawh nih loh kan tum tur a ni. Kan Bible pawhin ngaina lo turin min ti. Amaherawhchu, mi pangngaia piangchhuak zingah sum leh pai duh lo hi kan váng hle ang. Kan nitin khawsak mamawh, ei leh bar tur leinan te, kan thuamhnaw hak tur leinan te, kan chenna tur In sakna atana thil ṭul leinante leh a dang tam tak, sum leh pai kan mamawhna chu sawi tur a awm thei ang. Heng atan hian tute pawh hi sum leh pai mamawh lo kan awm lo. Chuti ang taka kan mamawh a nih avang chuan sum leh pai neih chu kan tum tur pawh a ni. Nei tura hnathawh pawh kan hreh lo tur a ni ang. Chutih rualin, tangka sum ngainat hi sual tinreng bul a ni tih hi kan hre reng tur a ni.

Mihring tute mai pawh hi eng kawngah emaw chuan hlutna lai nei vek kan ni a. Kan hlutna erawh a inang vek lo a. Kan teh dan pawh a thuhmun vek hek lo ang. Kan hlutna hrang hrangte hi engti kawnga teh chi nge anih ang tih pawh thil sawifiah harsa tak a ni. Amaherawhchu, thu peh-hel lo leh ṭawngkam duhtui vak loa kan sawi dawn chuan, mihring hi kan thih tawh hnu chuan mitthi kan nih miau avangin hlutna kan nei tam tawh lo. Chu hlutna chu mihring damlai, tuna nungdama hringnun hmang mekte-ah hian tehin chhút ta ila a dik thui viau awm e. Mihringin kan thiam leh theihna kawng a inan vek loh avang hian hlutna kan intehsak dan pawh a hrang nuaih ngei ang. Mitthi ni lo; mihring damlai zela kan teh dawn miau avangin, he kum tharah hian kan eizawnnate leh Pathianin kan tihtur atana A ruat, kan hnathawhna kawng hrang hrangahte hian rinawm tak leh dik taka hnathawh pawh kan tum tur a ni.

Dik lo taka sum leh pai laluta hausa, an sum leh pai lakluhna chiang taka sawi tur awm si lo chunga hausa thutten, mahni phur châng leh rilrua a lan chânga Pathian thu rîng taka kan sawi leh vak mai ṭhin te, a ruka ṭhenawm khawvengte ramri nêk-a, dan leh hrâi bawhchhe zawng leh thuneihna hmang sual zawnga thil tih kan hreh lo te, Pathian thu sawi zuah zuah chunga mahni chhungkua-a inbihchian tum chuang si lo ang chi hi he kum tharah hi chuan nih loh tum ang u. Mahni rîla rah leh thisen zawm ngeite pawh hmangaih chuang si lo a, Pulpit tlang aṭanga Pathian hmangaihna thu sawi chiam chiamte pawh hi sim kan tum tur a ni dawn lawm ni? Chuti ang mi chu mipuite pawhin kan hnualsuat ngam tur a ni dâwn lâwm ni?

Mizote hi kan pipute hunlai ata tawh hnam huaisen, ṭhian chhan thih ngam, dikna leh rinawmna ngaisanga nunpui, hnam inlungrual leh ṭangrual, taima leh tlawmngai niin kan insawi ṭhin. Dik pawh a dik thui viau maithei e. Mahse, tuna kan dinhmun han thlir hian chuti ang chu kan la ni zelin i hria em? Mawi leh mawi lo pawh dâwn loa sum leh pai duh huam huam ṭhin mi kan ni em? Chuti ang nun phung chu he kum tharah hi chuan sim turin keimahni ṭheuh inbihchiang ila. Nundan ṭha leh mawiin nun bul ṭan i tum teh ang u. Chuti lo zawng, Kristian ringtu ṭha inti, zing tawngtai inkhawm ṭhulh ngai lo, Biak In lamtuala lam peih em em, midangte tana nun hmang ngai lo, Khiangkawi ipte ak chunga Pathian lehkhabu thianghlim Bible zakzeh ve fo ṭhin kan ni si a!

Ni e, kum kalta zawng zawng kal pêlin kum thar kan chuangkai a. He kum tharah hian hmabak tam tak, hmasâwnna tur tam tak, hmalakna tur tam tak kan nei a ni tih hriain kum bul kan ṭantirh aṭang hian rilru thar i pu ang u. Keima tan, kan chhungkaw tan, kan khawtlang tan, kan ram tan leh kan hnam tan hian hruaitu lu-ber aṭanga a të ber thlengin tih theih chhete tâl kan nei vek ngeiin a rinawm a. Chumi atan chuan far-khat tal kan ni dawn lawm ni? Chuvangin, nang leh kei hian, "Ngai teh, a lo thar ta" ti chungin Siamtu Pathian kaihhruaiin he kum lo thar hi hmachhawn i tum teh ang. 

- Vanlalzawma, Muallungthu