Congress party thawhchhuah leh theih dan tur

Kum tam tak chhung Mizorama sorkarna fawng lo chelh tawh a, term tak tak chhung chakna lo nei tawh Congress party hi tun dinhmunah chuan kaihthawh ngaiin an awm a, an thochhuak leh ang em tih chu zawhna pawimawh tak a ni ta.

Kum 1998 inthlana an tlak aṭang khan an hniam telh telh tih chu phat rual a ni lo a, tun dinhmunah phei chuan kaihthawh ngaiin leh kaihthawh huphurhawm takin an lo awm ta a. Hei hi a chhan hrang hrang a awm theih rualin, hruaitu ṭha an neih loh vang tih chu a chhan langsar tak a ni thei ang. Pu Hawla boruak a awm a, kha kha Congress boruak vaw liantu pawimawh tak a ni a; Pu Hawla a han châwl a, hruaitu an nei mumal thei lo. Vawiin thlengin anmahni ngei pawhin hruaitu atana an duh em em pawh ni lo hruaitu an la nei reng a, hruaitu thar leh chak ṭha mamawh takin an la awm reng a ni.

Mizoram pumah hian Congress ruhrel erawh a lian ṭha a, hruaitu ṭha tak neiin han insangmar deuh se la chuan boruak lian tak nei thei mai tur anga ngaih theih tur an ni. Pu Sawta kha a fel viau a, a ngaihtuahna pawh a ṭhat rualin, an party chhungah duh lohna leh pawm lohna kha a lian a, chu chuan party chhungah hlet a nei reng a. Tlem lai phei kha chuan puak keh lek lek tur ang hialte pawhin a awm hial nia sawi a nih kha. Amah kha chu mi ṭha tak a nih rualin, hnungzuitu a nei ṭha tawk lo nia hriat a ni a, a mal kal deuha sawi a ni.

Pu Hawla active tawh loh hnua an party chhunga neuh neuh awm hi a pawi hle mai. Sawi zel dawn chuan mi huatthute pawh sawi a awl mai dawn a, sawi tam rih lo zawk mai ila. Pu Hawla leadership neih ṭhatzia kha a hriat telh telh mai tiin sawi ila a fiah mai awm e.

Tunah Pu Hawla nau Pu Lal Thanzara chu President-ah a han awm ve leh tak nâin, party a awp hlum mai hlauhawm khawpin an party a nung lo a. Ama thiam loh erawh a ni chiah lo mai thei a, a theihtawp chhuah mah se la, an nung zo rih chuang lo a nih hi. Boruak thar han nei deuh dawnin lang ṭhin mah se la, rei a daih ngai lo a, arbâwm hâl ang deuhin an ri hlut a, rei lo teah an reh leh mai zel a. Social media lamah ngei pawh an thawm a reh tlawk tlawk a, activity an nei ngai reng reng ta lo emaw tih mai turin an media enkawltute pawh an reh thei hi Congress zia a ang lo hle.

Pawn lam aṭanga chîk lutuk lem lo pawha lo thlira an mamawh nia lang chu hruaitu thar, viak ṭha leh ṭhalai deuh an mamawh tih hi a ni. Delhi tlang lamah ngei pawh kum 82 mi Malik Karjun Kharge chu President atan an nei a ni. Sonia Gandhi leh AK Antony te pawh hruaitu fel tak tak ni mah se la, kum 54 mi Rahul-a te chu langsar taka an mi ṭangkai an ni. Hetiang chiah hian Mizoramah ngei pawh Congress hian an ṭhalai zawkte hi dah langsar thiamin, kum upa zawkte chu fel zawk leh ṭha zawk pawh ni se la, a langsar lo lamah lo awm rih se la, hma an sawn phah ngei a rinawm.

Kan khawvel hi ṭhalaite khawvel a nih tlat tawh avangin eng kawngah pawh ṭhalai zawkte hi dah lansarh thiam a pawimawh a. Mahni lo intihṭhalai ngawt a tawk lo a, mi dangin ṭhalai tak tak anga min hmuh a pawimawh zawk avangin Congress hruaitu atan ngei pawh ṭhalai zawkte hi hmang thiam se hma an sawn zawk ngei a rinawm. Heng–Pu Lalrindika Ralte, Joseph Lalhimpuia leh Dr. Lallianchhunga te rual hi party hruaituah hmang thei ngat se la chuan rei lo teah Congress boruak hi a lianin hma an sawn phah ngei pawh a rinawm.

Eng kawngah pawh thawhhona ṭha a awm loh chuan pawl a chak thei ngai lo angin Congress party ngei pawh tunah rih chuan an thawhhona a chak lehzual theihna turin kum 50 bawr vel mi fel tak takte hi hruaitu atan hmang thei ngat se chuan Mizoramah hian an boruak a lian ngawtin a rinawm. Anmahni mimal ang pawha sawiin tuna an hruaitute hian an theihna zawng zawng an hmang chungin tun hi an theih tawk niin a lang a, hei bak hi an lakah hian beisei tur a tam lo mai thei e. Chuti a nih chuan Congress boruak chu kaihthawh ngai takin a la bet reng bawk si a; engtin nge ni ang?

An hming kan han sawi rîk tak Lalrindika Ralte, Joseph Lalhimpuia leh Lallianchhunga te phei hi chuan party tana mi ṭangkai ber ber an nih piah lamah, an sûlhnu chhui pawhin mi ṭha leh ṭangkai tak an lo ni tawh hlawm a; anni bakah hian mi dang fel leh ṭha tak tak pawh an awm. Anni rual ho hi Congress hian a hman thiam loh chuan Mizoramah hian an tan thawhchhuah leh theihna tur chhan hi a tam lo mai thei. Mi zahawm leh chhuanawm tak tak, entir nan, MP lo ni tawh, minister lo ni tawh leh MLA lo ni tawh tih vanga hruaitu langsara awmtir reng hi tun ang hun atan chuan thil chin reng chi a ni hauh lo ang.

Inthlan kan hmachhawn chho zel dawn a; khawpuiah leh thingtlangah Congress member lo ni reng ṭhinte tan hian party danga awm mai loa nghet taka an awm reng theihna atan a hmunpui ber aṭanga hruaitu mawngzâng leh a ngaihna hria an awm a pawimawh. Chumi tur chuan tuna hruaitu ṭhenkhat, a hmatâwnga awmte hian inthlahrung hauh loin kei chu ka lo châwl ang e, ti thei se. An chawlh avangin an pawimawh dawn tawh lo tihna a ni chuang reng reng lo a, a langsar lo lai deuhah an lo ṭhu rih dawn tihna a ni mai; chu chu hrethiam rawh se.

Chutiang a nih loh a, a thei apiang leh lamṭang nei ṭha apiang hruaitu atana an awm reng zel chuan Mizoramah hian Congress party hi an thochhuak leh tawh ngai lo ang. Party ruhrel lian tak emaw an intih reng laiin unit an nei tlem telh telh ang a, mahni awmhmuna pâwr tak taka thusawi chauh hi an theih tawk a ni mai palh ang tih hi hlauhawm tak a ni. Hengte hi anmahni duhsakna avangin kan han sawi a ni e.

- Ramherliana