Sa talh leh zawrhna
Changkang tehna kawng khat chu fai hi a ni. Ram a changkang zel a, mipui pawhin hma kan sawn zel. Kan hmasawnna zinga duhawm tak pakhat chu kan thianghlimin kan lo fai ta zel hi a ni.
Faina kawnga hma kan sawn viau lai hian kan sa talh leh zawrh danah erawh duh thu kan la sam lo hle. Ran pui lam te phei chu sawrkarin a talhna hmun siamin sa zawrh chhuah turte chu ei atan a hrisel tawk em tihte thlengin an enfiah ṭhin a, mah se mahni remchanna hmun apianga sa lo talh ve mai hi an la tam viau a, a chhan hriat a chakawm hle mai.
Tin, a talh piah lamah zawrh chhuah tura kan sawngbawl dan hi a fuh tawk lo. Motor remchang apiangah kan phurh kual tir a, dah chhan pawh awm mumal loin kan han hlang thla tawp a. Bazar tawt laiah te kan sa talh chu kan han mut leh rih a, kan ei tur sa chu kan kan thuak thuak fo mai. Chutah a zawrhna dawhkan, a zuartu, a engkim mai hi a thianghlim lo fai vek mai a ni ber.
Sa tenau zawk sangha leh arsa te pawh a bang bik lo. Kan sa ei turte chu thoin an vir hut hut a, sa tel loa chaw ei tui thei hlek loten sa chan loh hlauin kil tin aṭangin an bawh bawk a. Heti taka kan chaw ei tituitu sa hi talh leh zawrh chhuahna thianghlim leh thianghlim lohah hian mipuite hi kan va phunchiar peih si lo ve! Heti taka Korean culture-in min luhchilh tawh hnu hian ei leh in leh thianghlimna lam pawh duh fir ve tawh tur kan ni asin.
Wild west cowboy influence na hnuaia kan la awm lai te kha chuan tlemin la duhtui lo pawh ni ila in tih 'pa' lamah a ka kal tal a.
Ram changkangte sa zawrh, sawngbawl dan lah ei dan te pawh TV aṭangin kan hmu fo tawh ang a, thil ho mai maiah pawh mi tihdan kan lak chhawn peih tehlul nen sa leh thianghlimna kawngah hian hnamdang tih dan ṭha zawk entawn nachang kan hriat a ngai. Sa zuartu pahnih khat talin thianghlim leh itawm takin han zuar thei ila kan in hrilh pun vat theih a rinawm.
Sa thianghlim leh hrisel zawk kan ei theih nan sorkar emaw khawtlang leh tlawmngai pawl ang te hian in zirtirna nei thei ila a duhawm ngawt mai. Tin, sa talh leh sa zawrh danah pawh sorkar hian phal dan chin bithliah fel fai tak nei thei se a chakawm hle mai. Tun dinhmunah chuan duhthlan tur awm lo rau rauah duh kan thlang a nih ber hi maw!