YMA leh Mizoram

June thla laihawl vel khan Pu K. Zothanpara'n 'Rual tin khumtu YMA' tiin YMA fakna lam article ṭha deuh mai a rawn ziak a. Khatiang deuha ziah kha YMA hian a phu viau bawkin ka hria.

Mizorama tlawm ngai pawl kan neih dang MZP, MSU, MHIP etc. te pawh hian fak phuna lai tam tak an nei ṭheuh a, a bikin YMA hian fak a phu viauin ka hria. Mi tam takin YMA an sel ṭhin a, an duh khawp lohna lai tam tak pawh a awm ngei ang. Mahse YMA aia ṭha zawk pawl dang kan nei chuang lo a, chuvangin YMA hi a ṭhat lohna lai eng emaw han sawi ve ṭhin bawk mah ila Mizo mipuite tana ding atan chuan YMA aia ṭha pawl dang kan nei lo e.

Hman deuh khan ruihhlo do leh hnam humhalh tih velah YMA hian selna tam tak a lo tawk tawh a, chuting boruak kara tun thlenga Mizoram tana an hnathawh hrang hrang ka chhut hian YMA tluka pawl hlu hi Mizote tan a awm tlat lo.

YMA hi ṭanpui ngaite ṭanpuitu a nih piah lamah eng harsatna pawh tawk ila YMA hian Mizote rilru a luah hneh nghal viau ṭhin. Mitthu lumen leh thlan laih hahthlakzia hi mi tam tak chuan kan tih ṭhan a nih loh avangin kan hre chiang lutuk lo maithei a, mahse he hna hahthlak lutuk hi YMA chuan a koah a nghat a, midang tumah phut ren run loin hma khaw sang ata vawiin ni thlengin a la thawk a ni.

Mahse YMA ropuizia leh a hna thawh ṭhatzia kan sawi rualin tunlai ṭhangthar lehzualte tana chona siam ka duh chu YMA aia ṭha pawl kan nei si lo a, YMA hi tun aiin i ngaihsak deuh zawk ang u tih hi a ni.

Ṭhalai mahni thu duh ve tak, kohhran leh khawtlang, ṭhenawmte engah mah ngai lem hlei lo, nu leh pate thawh chhuah sa ringa aia upate zah nachang pawh hre lem lo tak tak hi an va tam ta em! Heng kan ṭhangtharte hi nu leh paten awmdan phung kan zirtir a ngai a, kohhran belh inchhiarawm lohzia te, khawtlang tana mi hnawksak nih pawizia leh khawtlang hnuchhawn hi Mizo zia a nih loh thute hi kan zirtir a, kan hrilh fo loh chuan nakin ṭhang hnih/ thum a liam leh meuh chuan Mizoram hi tun angin a nuam tawh lo tawp ang.

Chuvangin, ṭhangthar zawkte hnenah YMA hlutna leh a pawimawhna hi nu leh paten i zirtir ila, YMA thlahthlam lo turin kan fate i kaihruai ang u.