Kelkangah Synod-in hma la se

Kan Synod hi Pa­thianin iptepui bannan a hmang tiin kan sawi ṭhin a. Kelkanga Pathian hnathawh he ti taka a lo thlena mipui sang tam takin nitin sum sengin kan pan ruih ruih a. A khaw neituten chauh leh nin pawh sawi hleithei loin kum hnih vel lai an lo buaipui tawh a. Synod pawh hi engemaw ti kawng tala thlengtuah kan ṭan a ṭul tain a lang.

In 200 vel lekah mipui a nuai tel kan lut a, daikal in rimchhia pawh a tam ta a, kan ei leh in bur ruak pawh buaipui tham a ni. Sawr­karin inthiarna, tui, kawng leh eizawnna lamah hma a la ṭan a, a lawmawm hle.

A khaw neitute hian Thlarau Thianghlim pawi sawi an hlau em em a, an mutna leh khumpui hialte pawh mikhualte an ken chang a awm. Mutna tur atan khawi maw laiah mi sangkhat vel tal riahna zawl siam a, a theih phei chuan eirawng bawlna buatsaih a ṭha. A kal tam ber chu Aizawl mi kan ni a, gas leh bel ken a eirawng in bawl chu kan harsat lo, mimal in chu zokhaw lam mite thlen nan kian thei i la a ṭha ang.

Feet 200 a thui leh feet 20 vela zau han laih mai chu an har lo ang a, Synod mala hmalak a rem lo a nih pawhin, Mizoram Kohhran In­zawmkhawm hruaituten hma la se a ṭha ang.

Tunah chuan Biak­inah mikhual tam tak an riak lo thei lo a, meizial an zu a, tuibur leh sahdahte nen lam pawh. Kohhran hruai­tute rilru a na deuhin a lang a, Thlarau Thiang­hlim pawi sawi an hlau bawk si a. Heng avangte hian in chhungah mipa leh hmeichhia in mut pawlh nulh a ngaih changte a awm a, chungte leh a chhan hrang hrang vangin mi sangkhat emaw sang hnih emaw riahna tur hi chu ngaihtuah a ngai.

Tin, Biakin kawt zawl phei vel diak em em reng mai, haw lam leh kal lam intawllenna pawh khi zar hul a ṭha khawp mai. Hetianga ka rawtna ang ni lem lo pawh hian, engtin emaw tal a khaw neitute tha tihchak a, Thlarau Thianghlim lo dawngsawng ve tura ke kan pen chu a ṭul a ni.

Tin, reciption Coun­ter-ah ni leng zan­khuain upa hovin KṬP-te an duty reng a, tlaivar chang pawh an ngah. Kan KṬP-te hian mi 5-10 vel te chuan kar khat vel te te a inchhawkin han duty-pui se a ṭha lawm ni? An ei leh in tumsak ila. Chutiang a an han puih chuan, thuhnuairawlh taka a khaw neitute chet dan pawh an zir thei nghal bawk ang.

Kelkang harhna hian India ram leh khawvel hmun dang pawh kangkai zel turin i ṭawngṭai ang u. Hindu-te pawhin Yoga hmangin khawvelah hma an la thei a ni. Vara­nasi-a kan vai ring tharho han kalte pawh kha an rilru a hneh hle asin.

Khatiang khan Orissa ringthar te, Nepal ringtharte leh hmun danga hnamdang ring tharte kaltir ve dante pawh hi awm thei se. Chutiang tur chuan chunglam ṭan­puina leh remruatna pawh dil ang u.