Mizote leh William Shakespeare

Mizo zingah hian thu leh hla thiamna lamah sap ṭawng thiamnaah te,t hu leh hla han chheh mawi lamah leh hriatna zau tak la khawm thei tura Wiliam Shakespeare nihna chelh thei leh hming invuah thei tur hi an la vang hlein a rinawm. William Shakespeare chanchin hre thei tur chuan a thu leh hla sûlhnu ṭhenkhat chhiar taimak a ngai viau awm e.

Hla phuah thiam kan hriat lar thenkhat–William Wordsworth, Lord Byron, John Keats leh mi dangte nena huang khatah an zâl za zawk tih erawh an chanchin kan chhiar ṭhin aṭangin kan hre thei awm e. Heng mite kutchhuak hi mâwlmangin lang mah se, chhiar a nuam a, mipui nawlpui nun an phawrh thiam a. An thu leh hlate hi heng mite ngaisangtu tan chuan lung tileng tak leh lairil fan an nih hlawm a rinawm.

Keini Mizoteah hian William Shakespeare thu leh hlate hi kan la hmelhriat tlem deuh avangin a nihna tak kan zuk hre pha lo ṭhin a. Chuvang chuan kan ngaihruatnain a nihna âwm ang kan ralkhat hriat avangin han bel chiang tak tak phei chu kan Mizo zingah hian an tam vakin a rinawm loh.

Shakespeare chanchina kan hriat danin, Shakespeare hi ṭawngkam ril tak hmang thiam, nalh thei ang ber leh dik leh mawi thei ang bera pho lang thiam tak a ni a. Hla phuah thiam ṭhenkhatte’n an hla phuah vawi khat a chhiara hre thiam nghal thei ang chi leh thu leh hla rem nghal mai ang chi kha ni lovin, thu fing leh ril tak hmanga a kutchhuakte chu hawi lam leh kawh a tum, a awmzia chhut fê hnuah ngaihruatna nena hriatthiamna kalpui ngai a nih zel avangin, chutiang mi chu kan Mizo zingah an awm a la rinawm chiah loh a ni.

Khawvela mi langsar tak pakhat chuan William Shakespeare chungchang hetiang hian a tarlang a; ‘Tunah zawng a kamchhuakte kawnghmang neia hrethiam turin a kut chhuakte kan bih tlang ṭan ta a nih hi,’ a lo tih angina, Shakespeare-a kutchhuak hi zir tham a nih mai bakah, a thu leh hlate nihphung hi Shakespeare-a ziak chhiar ṭhin chuan in hrethiam mai awm e. Thu leh hla thiamna chauh a nih lohzia kan hre fiah nghal thei ang.

Kan Mizo zinga kan ziak mite kutchhuak chîk mite chuan thil awm sa reng kha thu leh hlaah mawi takin an tarlang ṭhin tih kan hmu thei ang a; thu chheh dan kal hmang nalh tak takte chu zir tham a lo tling ṭhin a ni.

Thil mak ve tak mai chu, mit a kan hmuh reng, benga kan hriat kan sawi thiam mai si loh, mawi tak leh dak thlarha han rem chhuah kawngah hian kan Mizo zingah hian engtikah tak hetiang mi hi awm ve tak ang maw.

- George L. Ralte, Vaivakawn