AN’ VANGA TAWRHNA
Vanglaini
Mizorama chanchinbu pakhat hming chu Vanglaini a ni. Kum 1978 aṭang khan tihchhuah ṭan niin Mizorama nitin chanchinbu darhzau bera chhàl ngam a ni. Varṭianah chanchinbu semtu-in kan kawngka bulah a lo dah ṭhin. A semtu step-a a lo kal rik thlak khauh khauh hnua thawh hian zing thawh a fuh duh bik riau! A tho hmasa berin uluk deuha a chhiâr zawh hnuah lo tho leh turin a thawh huna an chhiar thuai theih turin khum bulah kan dah sak thlap ṭhin. Kan inngaihsakna lantirna leh ‘zing thawh nuam’ kan tihna a ni deuh ber.
Sunday zingah erawh chuan kan hawihäi rual dial ṭhin, keini chhûng chu! ‘Infiamna chanchin ziaktuten Mizo ṭawng an ziah nalh ṭhin dan em em hi Ṭhalai Huang ziaktute hian inzir nan hmang se la aw! Mizo ṭawng chher thar leh thleh-mawi an tum lutuk nana ulh deuh deuha an chhuah leh si ṭhin hi a zia deuh ang mawle’ tia rilru sêl theih hian chanchinbu hi a lo chhuak leh zauh ṭhin.
Vanglaini digital edition
April, 2013 (23/04/2013) aṭang khan internet-in a thlenphak chin apianga thleng chawpchilh nghal thei turin Vanglaini chu digital edition-a tihchhuah ṭan a ni. Zing dar 5 ah website (www.vanglaini.org) hi update ṭhin a ni, zingkara a hardcopy dawn a remlohna hmuna ka awm chang hian zing dar 5 ka nghakhlel lutuk hian ka phone-a ka bookmark pakhat (www.vanglaini.org) chu ka virnawn-tír chhên ṭhin. Vanglaini hardcopy hi a chhuah tuk chauha dawng te, chawhnu lam daiha dawng te, a karleh lama a hlawma dawn a ngaih hialna hmun kilkhawr deuh deuh zoramah hian a awm a, mah se internet signal awmna a nih chuan khawi hmun aṭang pawhin zing dar 5-ah kan chhiar mial mial thei a ni.
Inkal pawhna kawng a ṭhat loh avanga chanchinbu tihchhuahna ṭul pawimawh Mizorama phurhluh a harsat lai ber pawhin digital edition hi chu a dan pangngaiin a kal reng a, ‘zing thawh nuam’ titu kan tawng chhunzawm reng tho a ni. August, 2013 (23/08/2013) aṭang khan Vanglaini digital edition chu paid edition/ content-a tihchhuah a ni a, a hardcopy thla khatah Rs 150/- a nih laiin digital edition email kaltlanga la erawh chuan thla khatah Rs 100/- chauh an chawi thung a ni. Paid edition a nih hnu hian man chawia late chauh lo chuan editorial leh article hi an chhiar ve thei tawh lo a, news erawh chu man chawi ngai lo-in www.vanglaini.org luh nachang hria apiang chhiar theih turin a thlawn liau liau a ni.
'State pawna awm hmelhriat leh chhungte nei tán chanchinthar hriatna rintlak ber pakhat a nih avangin midang pawhin an hmelhriat leh chhungte email kaltlangin laksak ṭheuh se’ a duhsak thu a fate phaia awm email kaltlanga laksaktu nu pakhat chuan min hrilh a. Vanglaini digital edition-ah hian ziah sual a awm zauh zauh a mah se a hardcopy-ah hian a lo dik leh thluam thung a. News item ṭhenkhatah phei chuan mi hming hriat chian loh a awm ṭumin Tetea zawh chian tur, a hre chiang ang tih te hi a lo in ziak tel leh khauh ṭhin; nuihzatthlak deuh deuh dang pawh a awm leh nulh zel.
Vanglaini venthawn
Kum 2014 aṭang khàn thlalak awm tel apiangah Vanglaini website hming dah tel (watermark) a ni a, chumi ringawt chuan ven sen loh chin a nei a ni ngei ang, ni 11/03/2015 aṭang khan website hming (www.vanglaini.org) hi news tlar tawpah ziah tel zel a ni a, a karlakah a inzep tel zauh zauh bawk. Hau-a zilh khera sual leh thil ṭha lo tih sim tumte kan awm ṭhin a ni tih tichiang turin Ni 20-21/05/2015 khan website ami la chhawnga mahni ziah niawm taka thehdarh ṭhinten an thu lakna (www.vanglaini.org) ziak tel zél tur leh a ziaktu anga mahni awmna group (facebook, whatsapp, adt.) hming ziak tel tawh lo tura ngenna chanchinbu phek hma a langsâr lai berah ziak langin an tichhuak hial a ni.
Mizo zingah social media-a lo chaka mahni hi pawimawh leh mi bik ta riaua kan inhriat vang ni maw? internet kaltlang hian kan duh duh hi kan aû pui a, sual khawih leh hrem theihna thil a ni em tih pawh hi tam tak hi chuan kan ngaihtuah vak ṭhin lo a ni. IT Act 2000 kan nei khiu khiau a ni tih hre lo online ätchilh tlat pawh a awm theih a ni - he dan hnuaiah hian IT hmansual hremna chi hrang hrang a inziak ṭeuh a ni. Mi-in duhtaka thla an lak te, thu an ziah te adt., hi an phalna loa lo thehdarh hi kan tihtur a ni lo tih hi i hre nawn fo ang u.
An’ vanga ka tawrhna
Zing dar 5 ah khel lovin ‘zing thawh nuam’ titu ka tawng char char dawn emaw ka tih laiin Vanglaini digital edition chu March, 2015 (11/03/2015) aṭang khan an’ vangin chawhma dar 11 ah update ṭhin a lo ni ta a ni. ‘Zing thawh nuam’ tih chawhma dar 11 a dawn chu a nuam viau lo! i hriat kha. Vanglaini website-ah an’ vangin ka luh khät phah hial reng a ni.
Journalists Welfare Fund-in a huam phak lo tih hriat ngawih ngawihte’n pawimawh leh ṭha, ngaihnawm leh mi chhiar duh chì ni-a an hriat chauh thur chhuak a, lachhawnga social media-a an suan-kual vel ṭhin avangin zing thawh a nawm loh phah a nih chu! An’ vanga ka tawrhnaah hian ka lung a awi thei thlâwt lo a ni ber mai. An boral palhin cheng nuai khatin sorkarin a rál (ex-gratia) a rinawm loh a, natna khirh tak leh harsatna nasa tak pawh lo tawk palh se sorkar hian a pawng a puiin a ngaihven chük lo ang tih hriat chiante’n mi-in rim leh hah taka news an zawn khawm, rilru sêng deuha an phuahkhawm, ṭhenkhatin hmaisa leh ṭawngkam dengkhawng tak tak an dawn phah hialna thil awlsam taka zing an thawh hma tak avanga an lo thehdarh ve vak ṭhin kha a lo va pawi em! An awmna group (facebook, whatsapp, adt.) tan thil ṭha tiah an inngai ve ngei awm si a, ṭhenkhat phei chuan Vanglaini-in news kara anmahni website hming an ziah tel kha an group hmingten an thlak ngam nia mawle! hlawm tak chuan.
Thil pawi leh sual an khawiha hremna hial an tawk thei an ni tih hi hrilh nawn awn awn an ngai a ni, chu mai a ni nang digital edition-a Vanglaini chhiar ṭhin zawng zawngin an’ vangin kan tawrh phah a nih hi maw! An’ vangin.
Thulakna :
2. http://www.pibaizawl.nic.in/fe...
3. dict.mizoram.gov.in/page/it-act-2000.html