Office ṭan hun leh sikul ṭan hun

Mizoram sorkarin sikul ṭan hun a sawn hma a, mi tam tak an lawm a, ṭhenkhat an lawm lo a, ṭhenkhat chu an ṭap hial awm e. Zing thawh hma harsa titute tana zingkara buaina lian tak chhuak hi mi ṭhenkhat chuan a thawventhlak zawngin an thlir. Keia vei ve zawk chu office ṭan hun lam daih hi a ni.

Office hi zing dar 9:00-ah an ṭan a nih chuan traffic jam hun hi dar 8:30 vel tur a niin ka ngai a. Tunah chuan zing dar 10 vel hi Aizawl khawpui traffic jam hunlai a ni a, hei hian office kalho an punctual lo tih chiang takin a tilang thei a ni.

Office kal hun hi Chief Secretary kan neih tawhte hian an vei viau ṭhinin ka hria a, an siam ṭhat theih loh chuan siam ṭhat a ni dawn lo kumkhua a nih hmel. Chief Secretary te berin an tih theih tawh loh chuan a manganthlak khawp dawn a ni.

Sorkar hnathawk zing dar 9:00-a thleng chu tiṭha an inti em em mai a, chu chu a dik lo nghal pang. Mahni tih tur tih vanga tiṭha intih viau chu a dik thei tlat lo a ni. Taxi driver hian taxi a khalh avanga tiṭha a intih chuan miin an nuih mai ang, a hna tur a thawk ve a ni mai a, chutiang zelin sorkar hnathawk pawh dar 9:00-ah office an thlen chuan an tih tur an ti a ni mai. Dar 9:00-a thleng chin hi chu tlem te an ni.

Kei hi ka mawl deuh bawk nen thil hriatthiam loh ka neih chu sorkar hnathawk lal deuh chin, Secretary level hi chuan office kai hun hi an vawng dik viau hlawm e an ti si a, an hnuaia mite zawk an vawn dik tir thei lo hi chu hotu hlawhchhamah ka puang. Mahni berin an hman dik theih chuan an hnuaia mi, an hrem theih la ni bawk site office kal hun leh haw hun dik lo hi chu an vil ngam ngei ngei tur a ni.

Mawl deuha ngaihtuah chuan sorkar hnathawkte tluka discipline vawn ṭhat awlsamna hi a awmin ka ring lo. Dan an bawhchhiat chuan hrem theih an nih bakah a hrem theitu lam chu office hour hmang dik an ni bawk si, a harsa tawh lo ang an tum tak tak chuan.

Tichuan sikul ṭan hun dar 8:00 tia hmang tura beitute hian dar 9:00-a office ṭan hun hi hmang dik ve rawh se. School Education Office hote phei chu an thawhpuiten dar 8:00-ah an hna an ṭan tawh tih hre tel se a ṭha lehzual ang.