Kelkâng kal ve lo tan aw...

Thlarau Thianghlim hna­thawh thar beiseia Kelkâng kal a lar viau lai hian, kal ve lote dinhmun tur han ngaihtuahho daih teh ang. A kalte'n pawl tharna duhawm tak an rawn hawn kan duhsak a, kal ve lote leh Thlarau Thianghlim inkarah hian eng nge thleng thei a, eng nge thleng tur tihte han inzawt bawk ila.

Thlarau Thianghlim lakah hian eng nge beisei tur kan nih?

Mizoten kan lam zin tak Thlarau Thianghlim hi eng anga hnathawk turin nge kan duh ṭhin le? Boruak thar, hlim, khawihtharna, phurna, thil mak etc. hi kan beisei ṭhin avangin thil thar danglam deuh apiang kan ngaisang ṭhin. Hetiang tel lo chuan Thlarau Thianghlim hi che ta lo anga ngaih hial a awl khawp mai.

Hei hi i hria ang u - Krista hmangaihtu an awm chuan Thlarau Thianghlim a chê tihna a ni a; Krista Chanchin Ṭha dik taka hril a nih chuan Thlarau Thianghlimin hna a thawk tihna a ni a; Krista hminga sual hneha a awmin Thlarau Thianghlim a che nasa hle tihna a ni. Hei hi Kelkangah a awm thei a, kan vengah pawh a awm thei. A awm mêk a ni tih kan hria a, khawi hmunah pawh lo awm zual zel se kan ti.

Thlarau hnathawh nge Thlarau Thianghlim?

Pathian thuin thlarau hna­thawh mak danglam tak tak ûm turin min ti lo a, Thlarau Thianghlim tilungngai lo tur leh Thlarauva khat turin min ti zawk a ni tih hriat a pawi mawh. Chumi kawnga hmasawn tur chuan i awmna kohhrana thinlung leh tihtakzeta Pathian i zawn kha a tawk ngei ang. A chhan chu Thlarau Thianghlim din, Pathian kohhran a ni si a. Pentecost nia chatuana a kohhrante awm pui tura Pa Pathianin a rawn tirh Thlarau Thianghlim ngei kha he kan kohhrana min awmpuitu hi a ni a. A la danglam lo a, hna a la thawk reng a ni.

Pentecost hnu khân tuman Thlarau chang turin hmun bîk an insawi hmuh tawh lo a, hmun ropui bîkah thawk loin mi bîk ‘ringtu zawng zawng’-ah a thawk tawh a ni. A hnathawh ropui ber kan chan sual chhûngkhungte ‘Pathian fa’ atana min siam tawhna aia ropui anga ngâi leh tuipuia a hnathawh tharlâm zawng chûk chûk loa amah Thlarau Thianghlim hruaina chang turin min duh tih kan hria.

Harhna leh

Thlarau Thianghlim

Mi tam tak chuan harhna leh Thlarau Thianghlim hi an ngaih pawlh avangin an buai deuh ṭhin niin a lang. Harhna kan tih hi khawtlang huapa phurtharna lawmawm tak pawh a ni, amaherawhchu a ken tel zawng zawng hi Thlarau Thianghlim hna­thawh a ni vek lo ang tih chu a hriat theih mai. “Thlarau Thianghlim chu harhna zawng zawngah a awm vek; mah se harhna thil zawng zawng hi Thlarau Thianghlim thil a ni vek lo” te pawh ti hial ila a dikin a rinawm. Lal Isua aia Thlarau hruai nasat leh Thlarauva khat an awm miah lo; mah se Isuan boruak nu tak leh maksak tak a chan kan hre miah lo thung (Isua chanchin hi Pentecost hnua an ziah a ni a, maksak deuh an hmehbel miah lo hi a mak zawk) A tawn chinah a Pa thu a awih zel a nih zawk kha.

Thlarau hruai leh Thlaraua khat ni turin ‘boruak nu’ tak leh ‘pun­khawm tam’ a ṭul chuang lo tih kan hria. “Lalpa Isua ang turin…” tih hla kan hlapui a nih kha theihnghilh lo ila. Isua an hi a tawk a, chu chu a harsa ber a ni thung.

Kelkâng kal leh kal lo

In ngaihnep tawnna a thleng thei tlat mai. A kalin a kal lo hmuhsit theih a nih laiin a kal loin a kalte endawng theih a ni ve tho. A dik lo ve ve a ni. Invên thiam a ngai. Kelkângah thla 3 pawh va châm ila, kan haw kawngah chuan Thlarau Thianghlim kan mamawh reng tho dawn a; hetah lo awm pawh ni ila kan mamawh dan a pangngai reng bawk. Hmasawnna tur chu a awm reng. Mahniah a innghah chin a awm zêl ang. ABC hi kan vêngah a zir theih a, New Delhi-ah pawh a zir theih tho, miin New Delhi ngeia zir a duh chuan va zir ang hmiang, a in sêngso tam deuh dawn a ni mai a. ABC ropui deuh zawk zir tur erawh chu a hmu dawn chuang hauh si lo.

New Delhi hmuh chak emaw, chuta sikul kal châk hrim hrim emaw, chu hmun chauha zir tum emaw an awm chuan New Delhi ngeia va zir chu a ṭha tho ang. Mahse nu leh pa ṭha chuan, “A pawimawh ber chu ABC thiam hi a ni a, New Delhi-a sikul siamtu khu he kan vênga sikul siamtu tho hi a ni a, heta i thiam hi a duh ber a ni; chuvangin hetah hian thiam phawt la, i kal zelnaah a ṭul a nih chuan New Delhi aia hlâ pawh i la thleng êm êm ang,” an ti ngei ang.