UNION GENDER BUDGET BIHCHIANNA

Budget ngaithlak leh chhiar hi a ngaihnawm mawh khawp a, ngaihnawm tura duan a nih loh vang a ni mahna. A pawimawhna avanga ngaithla a, chhiar tur kan nih zawk avang leh Union Budget kan ngaihven ang ema ngaihven hlawh lo, Gender Budget hi kan lo hriat thar leh ngaihven zual a nih theih nan tawitê ka rawn ziak ve a ni.

Union budget hi kum khat chhunga sawrkarin sum a hmuh leh hman ralna tur ruahmanna a siam tarlanna a ni. Union budget chhungah hian budget dang, Gender Budget tih a awm a, he budget hi hmeichhiate pual budget bik ni lovin, mipate nena kan budget inṭâwm a ni. Mipate chanvo ṭhahnem tak a awm a, mipa leh hmeichhiate’n rual taka hma kan sawn theihna tura duan a ni. Union budget chhunga gender budget kan neih hmasak ber chu kum 2005-06 budget aṭang khan a ni a, India ram 9th Five Year Plan (1997-2002)-ah khan hmeichhiate pual Women Component Plan dah tel a lo ni tawh a, 11th Plan (2007-2012) hun lai khan sawrkar laipui leh state zawng zawnga department hrang hranga Gender Budgeting Cell din tura hmalak a lo ni tawh bawk.

He budget kan neih kum aṭanga 2023-24 budget thleng khan part hniha ṭhen a ni a, Part A leh Part B tiin. Kum 2024-25 budget aṭangin Part C belh a ni. Part A hi hmeichhiate pual scheme 100% dah a ni a; entir nan One Stop Centre, Beti Bachhao Beti Padhao, adt. Part B hi mipa leh hmeichhiate inṭâwm theih scheme atan 31-99% dah a ni a; entir nan Midday Meal Scheme, MGNREGA, EMRS, adt. Part C chu scheme 30% hnuai lam hmeichhiate chanpuala dah a ni a; entir nan PM Kishan, Sahitya Akademi.

Gender budget kan neih aṭang khan Union Budget aṭanga 3-5% bawr zel he budget atan hian dah a ni a, 2022-23 Fiscal Year (FY) khan 5.2% niin, 2023-24 FY-ah 5% leh 2024-25 FY-ah 6.8% a ni. Nikuma kum dang aia a punna a san chhan chu Part C an belh tak vang a ni. Kum 2025-26 budget tharah Union budget aṭanga 8.9% vel dah a ni a, hei hi 4.49 lakh crore niin, gender budget kan neih hmasak ber 2005-06 aṭanga a la tam ber ṭum a ni. Chutih rual erawh chuan, he budget chhunga Part A, 100% hmeichhiate pual hi nikum budget aiin 6.1% dawnin a tlahniam a, mipate nena kan inṭâwm Part B erawh 63%-a tihpun a ni thung. Part C 30% aia tlem hmeichhiate pualah nikum aiin 12.14% velin a pung bawk.

Gender budget thara hmeichhiate pual scheme langsar zual–Mission Shakti atan estimate Rs 3,150 crore niin, Rs 3,146-ah a tlahniam a; Smarthya scheme (working women hostel, ujjwalia homes, adt.) atan estimate Rs 1,310 crore anih lain, Rs 1,146 crore dah a ni bawk. Kumin gender budget-ah hian hmeichhia SC leh ST entrepreneur thar mi nuai 5 huam turin loan nuai 2 kumin aṭanga chhiara kum 5 dang thleng a lak theihna tur scheme thar duan tura ruahman a ni.

Gender budget hi kum nga kal ta chhunga a punna 128% vel lai ni mah se, hmeichhiate pual (Part A) aia mipate nena kan inṭâwm Part B hi ngaih pawimawh leh budget pawh dah tam zawk zel a nih mai bakah, hmeichhiate pual scheme langsar zualte tan a estimate aia an dah tlem bawk hian kan sawrkar laipui meuh pawhin hmeichhiate kaihhruai hmasawnna lamtluang (women led development) a dah pawimawh tâwk lo niin a lang. Tin, mipa leh hmeichhiate’n hmasawnna ke rual taka kan pên theihna tur leh kan intluktlan lohna kar zau tak tizîm tura hmalakna a beitham hle tih a lang bawk. Heti reng kan nih chuan SDG Goal 5: Gender Equality chu hlen a har khawp ang.

He budget hi a taka Mizorama hmeichhiate hmasawnna tura hai lut thiam sawrkar kan mamawh a. He budget hlawhtlinna tur a pawimawh em em, mipa leh hmeichhe zat thliar hranna data (sex disaggregated data) mumal leh felfai kan neih a ṭul tak meuh bawk. Scheme hrang hrangin a huam theih tur hmeichhiate kan hriat theihna tur a nih mai bakah, heng scheme-te hian engtiang takin nge hmeichhiate a nghawng (impact assessment) chhui zui nan a pawimawh tak meuh a ni.

Mizorama hmeichhe pual scheme hrang hrangte tihhlawhlinna kawnga nodal department Directorate of Women & Child, GoM thawh hlawkzia erawh sawi hmaih chi a ni lo. He budget thar mila an hmalakna kal zel turah pawh sawrkar department hrang hrang leh hmeichhiate hmasawnna ngaihtuahtu pawlte’n an ṭawiawm ṭhat a pawimawh hle dawn a ni.

Gender budget hian a tira ka sawi tak ang khian, hmeichhiate chauh ni lovin, mipate pawh a huam a, he budget-in a tum ber huapzo hmasawnna (inclusive development) kan neih theih nan leh rual taka hmasawnna ke kan pênho theih nan ngaih pawimawh ni mawlh rawh se.

- Prof. Lalhriatpuii, Department of Economics, Mizoram University