CCTV leh street light chhiatna khawpui
Kan Aizawl khaw-pui hi khawpui dang ai chuan a fai a, NE state zingah phei chuan fai ber lawmman pawh AMC-in a dawng a nih kha, a lawmawm ngawt mai. Hetih rual hian zan lama khawpui kawngpui eng chau lutuk erawh hi chu ngaihmawh tham tak a ni. Chumi piah lamah CCTV vuah thar camera a chau lutuk pawh hi enfiah a ngai hle mai.
Tunah chuan hman-raw changkang ber ber nen Aizawl khawpui chu police-ten darkar 24 an vil a, an vil dan erawh camera hmangin a ni a, street light chhe lutuk hian police hnathawh a tikhaihlak nasa a ni. CCTV chu hmun hrang hrangah vuah a ni a, mahse an camera hman erawh duhthusam a ni lo hle. Night vision camera tal vuah se street light chhe deuh mahse a
ṭangkai leh zual tur.
Aizawl khawpui chhung kawngpui dungah hian zan lamah sualna tam tak a inlar a, police patrolling te'n vilin, camera hmangin darkar 24 vil reng mahse chetsualna emaw, misual chetna kha duhthusamin a chhui hlei thei tlat lo a ni. Street light tal ṭha ta ang se hnu chhui a awlsam sawt ang. Kea kalte tan pawh hetiang leka street light vuah hi chuan a him lo hle a ni.
Khawpui vil tura police-te hmalakna chu a chak thawkhat viau niin a lang a, mahse an hmanraw hman ber camera-te hi night vision camera a ni tlat lo. Tender
aṭang a rate a sang fu awm si laiin camera
ṭha law law vuah turin home department lam hian eng vangin nge an tih loh le? Hetah hian eirukna a awm em tih pawh hi media lam hian chhui deuh se a ṭha ngawt ang.
Thil thar leh hmanraw thar nen Aizawl khawpui darkar 24 chhung teh meuh vil a nih lai hian kawngpui dunga chetsualna finfiah theih loh a awm ta nual mai. Mi pakhat pawh car ni ngeia ngaihin a su a, kawngsirah a let reng a, a hnuah motor dangin a rawn chil zui leh a, chung car pahnihte chu a number a lang thei tlat lo. Kha chetsualna kha chhui chhuak turin CCTV camera a ṭhat tawk loh bakah street light a ṭha si lo a, a pawi hle.
Misual hnu chhui tur chuan camera a
ṭhat a ngai a, street light a ṭhat tawk a ngai bawk. CCTV vuah thar hi eng hmanraw ṭha leh chhia nge tih kan hre mai lo a, mahse light eng loah pawh fiah taka hmuh theih camera ni ngei se a va duhawm em. Chutiang bawk chuan camera changkang ber vuah lo mahse, a ṭanpui turin street light lamah tal
ṭan lak a ngai a ni.
- Lalmuanawma