Gas chungchanga kan dan hman hi

Tunlaia Gas chung­changa min kaihhruai dan hi ram ropui panna kawng a va ang lo ve!

Chhungkaw tinin tunlai khawvelah kan innghahna, a tel loa kan awm theih loh gas chungchanga kan dan hman mek hi chu a va han duh khawp awm lo ve le! Gas phurtu motor-ten eizawnna hlawk takah an hman laiin keini mipuite erawh chuan gas kan nghei phah lek lek thla tin mai a. Gas man a to tulh tulh laiin gas tihchingpen chingte erawh chuan an duh thalin an duh ang an ti thei thung si.

Bazar nuho khaw­laia ṭhu tlarte pawh hi gas tihchingpen chungchangah hian a venhimna dan siam rawh u le ti ta ila, hetiang em ema dan awmze nei lo hi chuan an duan chhuah chu kei chuan ka ring thei tlat lo a ni. Tuna kan dan neih ang vel lek hi chu state sorkar dan siam leh kenkawh atan chuan a iaiawm lu deuh tlat a ni.

Gas chungchanga tuna kan dan siam ve dan hi zawng, gas phur ṭhintu driver-ten an hamṭhatna ngaihtuah ran chunga an siam dan ṭha tak ni ta se la a inhmeh tawk vel viau ang em le?

Tuna gas chungchanga dan kan hman mekin a entir chu mi tu pawhin thil lo ru sela a ru lai an man fuh emaw sawrkarin a hriat chhuah chuan a rul leh ngei tur a ni tih ang vela dan hlauhawm lo niin ka hria.

India rama cheng kan ni a, democracy ram nuam taka cheng kan ni a. Tin, Dan pawh hi kan neih tam tehlul nen kan rorel dan leh kan dan neih hi chu a inhmeh lem lo hle a ni. Ram changkang zawkah sweet kawr khawlaia an paih a nih chuan dollar 400 (India pawisain Rs. 2400) te an chawi tir hial te nen chuan a va han inpersan tehlul ve le.

Engpawh nise Pathian thu hmang bawkin inhnem leh phawt ila. Pathian thu chuan roreltu chuan taima takin ro rel rawh se, a ti a ni.

Kan hruaitute hian gas chungchangah hian hei aia dan ṭha leh him zawk tur hi uluk takin ngaihtuah duang chhuak se. Ti­chuan, Zoram mi­puite nitin mamawh eirawng bawlna gas hi tun aia eirawngbawlna gas ṭha zawk leh hnianghnar zawk kan nei thei mai ang.