IAF hnena Airport hlan – ka neutral viau
Tunlai chu Lengpui Airport sawrkarin IAF hnena hlana enkawltir a tum chungchangin titi a luah hle mai. Airport chungchang, enkawl dan te, mamawh hrang hrang te, thil kal vel dan hrang hrangte hi ka hre tlem khawp a. Mi thuziak chanchinbua ka lo chhiar ve te, TV vela an sawi ka lo ngaihthlak vete hi ka hriat ve chhun a ni mai a.
IAF hnena Lengpui Airport hlan chungchangah hian ngaihdan mumal ka nei lo, a ṭha zawk tur pawh ka hre chiah lo. A ṭhatna leh ṭhat lohna a awm ve ve ngeiin ka ring a, mahse, a ṭhatna leh ṭhat lohna ka hriat chian ve loh avangin keimahah bûk rit zawk a awm hleithei meuh lo. Chuti chung chuan, IAF hnena hlan loh ka âwn mah zawk em aw, chu ka inti rilru.
NGO Coordination Committee te, opposition party te leh mi tam tak chuan IAF hnena Lengpui Airport hlan an duh lo va, an dodal a. An duh loh chhante an sawi tawh ṭhin. Mahse, duh lotute hian an duh loh chhan an sawite hi thil hre chiang bik tak tak chuang lova (hria inti tak chung si a) an 'rin thu' an sawi ve mai tho ni hian ka ngai pek!
A ṭhat lohna sawitute hian IAF enkawl airport dangahte a hmunah ngei kalin an zir chiang a, IAF enkawl airport hmangtu mipuite'n harsatna an tawk ṭhin reng em tihte an finfiah a nih chuan pawm mai tur a ni a. Mahse, chutiang chu an ni em tih ka hriat loh avang leh, ralkhat aṭangin an ti ve mai mai tho nia ka hriat avangin a him lohna an sawite hi ka awih ve mai lem lo. Hria nia inngai zinga tam tak hi chu kei aia hre zawk turah ka ngai lem lo ve tlat bawk a!
IAF hnena hlan hlautute hian, a bikin NGOCC leh mi ṭhahnemngaite'n thil nihna dik tak hre chiang lehzual turin kan hnaivaia IAF enkawl airport–Silchar Airport leh Bagdogra Airport te tal khu a hmunah zuk tlawh se. IAF hian an enkawl airport, mipuiin an hman ve si ahte hian mipui tan harsatna an siam reng em, tihte a hmunah zuk chian thei se. Airport thuneitute leh a hmangtu mipuite leh civil society hotute zuk dawr kual thei se ka ti hle mai. Chuta ṭang chuan dinhmun dik tak kan hre thei ang–theory ni lo, practical kan mamawh.
Heng ka sawi avang hian IAF hnena Lengpui Airport hlan hi ṭha ka ti a, ka duh zawk tihna pawh a ni chuang lo. Sawrkar hian uluk takin, fimkhur takin ngaihtuahna hmang se la. Chief Minister emaw, Chief Secretary emawte pawhin IAF leh Airport Authority of India hotu lu te, Aviation Ministry hotute thleng pawhin hmaichhanah dawr se a ṭha khawp ang.
Engpawhnise, sawrkar hian Mizoram leh mipui tana ṭha ber tur an ngaihtuah chhuah a, thutlukna an siam ka lo beisei ve e.
- Vanlalhlanpuia