College versus Politicians

Tunhnai a Mizoram sorkar order - “Zirna in, a bikin College zirtirtu/ Subject
ṭhenkhatte’n politician-te lecture pe tura an sawm chungchangah thuneitu (authority) beng a lo thlen thu leh he thu hi hotute’n an ngaih run (serious) hle thu leh chumi avanga tun aṭang chuan College zirlaite leh zirtirtute chu anmahni remchanna leh subject inlaichinna (concern) thilah pawh politicians te aṭanga inthiarfihlim tur leh pawn lam mi (outsider) tumah sawm tawh lo tura hriattirna” a chhuah chuan nghawng a nei thui a. Social media leh forum hrang hrangah inhnialna namen lo a chawk chhuak mek a ni.

He issue hi ka phak ang tawkin a nihna dik tak leh awn lam nei lo (pheno-menological interpretation/ unbiased critical comments) pek ve ka duh a ni. Thlirna tarmit fim tak, eng backround mahin a pawlh nut loh, pawl leh mimal, Kohhran chena dahtha a thlirna (reflec-tions) aṭanga comment kan tum a nge.

Zirna ṭobul tlem:

Abstract Vis-à-vis Praxis

Zirna hrilhfiah theihna (possible interpretations) tam tak zingah, kan thupui mil turin zirna chu kawng hnihin a chunga kan dah ang khian, a thu (theory) leh a tak tak (practical) zawngin han hrilhfiah ila. Zirna hi knowledge zauna leh mithiamte thil hmuhchhuah sa lo thiam ve zel emaw, tunlai thei ang bera kalpui mai hi a ni lo. Innghahna bulṭhut (conceptual clarity) fel tak nei a ni tur a ni. Chu chuan hawi zawng awmze neiin kan target goal-ah min hruai lut thei dawn a ni.

Entirnan, tunlai Information Techno-logy-ah chuan kan hriat duh information engkim a awmsa tawh avangin, ready-made knowledge tite pawhin a sawi theih. Miin computer a thiam nal viau emaw command a pek thiam em avangin mithiam an tling chuang hauh lo. Finna (intellect) hman ṭangkaina leh a dik leh dik lo tehna (test of truth and error) leh fim taka thil buka khaikhinna (reasoning) a tlakchham chhung chuan thiamna kawngbo a ni tlat. Zirna bulṭhutah chuan heng, chetze mawi (temperance/ manners and ettiquette), ngaihhlut zawng dik (value system), thiamna (intellect), mihringmihrinna (humanity), thutak (truth), etc te hian hmun laipui an chang tlat tur a ni. Chungte chu thua zirna innghahna (abstract foundation) kan tihah hian beh tir ta ila.

A pahnihnaah chuan thiamna thurukte (theory) chu nitin nunah a tak taka hman
ṭangkai a ṭul ta a ni. Chumi awmzia chu kan thiamna chu a practical tur a ni. Triangle concept hriat bel viau kha thlamsak dan leh insakna-ah te a tak taka hman ṭangkai theih a ni tur a ni. Chumi a nih loh chuan thiamna kawngbo emaw ṭangkaina nei lo (irrelevant) a ni leh tho. Chung zawng zawng hlawmkhawmna chu zirna hi abstract leh practical inbelhbawmin a phuarkhawm (intertwined) tlat a ni.

Tunlai issue

College zirlaite a bikin Political Science zirlaite hian thu khirh tak tak entirnan Nationalism versus Nationality tih te, Freedom versus Liberty, Peace and Conflict, etc. tih te an zir ṭhin. chung te chu awlsam taka hriatfiah mai theih a nih rualin a khirh hle thei bawk. A chhan chu hun leh hmun a danglam angin, heng concept te hi hrilhfiah thar a ṭul fo ṭhin a ni. Entirnan, hmanah chuan ‘inneih’ chungchang lecture pe tur chuan mipa leh hmeichhia inneihna (opposite sex marriage) background ringawt aṭanga hrilhfiah ṭhin a ni. Tunlai khawvelah chuan neih inang inneihna (same sex marriage) - mipa leh mipa, hmeichhia leh hmeichhia inneihna te pawh telh a ngai ta nawk mai! A dik kan tih leh tih loh chu thuhran nise, ‘inneihna’ concept-ah chuan hmaih theih a ni tlat tawh lo ang hian, College-a zirna har tak takte hian lecture hausa a mamawh a ni.

Thu lar tak ‘nation’ tih kan hriat dan tlanglawn, “hnam emaw mipui ram khat chhunga chengte” tia kan hrilhfiah mai ṭhin kha, ram leh hnam ṭhenkhatah chuan hrilhfiahnan a rem hauh tawh lo. Nationalism tih a nih phei cuan hrilhfiahna hi a tam theiin a pawhsawih tam theih tawh em em a ni. Palestinian te leh Tibetan te hi en ila a chiang mai awm e. Hnam chu niin ram an neih dan erawh chu a danglam hle. Chuvang chuan subject har leh khirhah te, inkaihhnawih leh inchawbe (inter-related subjects)-ah te lecture tihausa tura pawnlam mi mithiam sawm hi zirna-in ṭha zia dik tak a ni.

Ram dang/ State dang a institutes ṭha te’n khual ṭha an nei ve em?

He zawhna mawl tak chhanna chu nei ve ṭhin teh reng mai. India rama zirna in ṭha - IIMs, IITs, NITs, NIFTs, leh Central leh Deemed Universities leh College hmingthang hrang hrangah te pawh hian ‘faculty’ ni lo pawn lam mi lecture ngaihthlak tur hi chhum lo chat lovin a awm a ni. Tunhnai maiah pawh Rahul Gandhi pawhin IITs leh Universities hrang hrang a lecture a pek thu leh students ten an hlawkpui thu kan hriain kan hmu chamchi a ni. Mipuite President an tih, APJ Abdul Kalam(L) ngei pawh Institute ṭha a tlawh nasatzia leh a hun tawpa IIM Shillong a lecture a pek laiin vanduaina tawk a, a thi ta tih kan hria. University enkawltu leh thuneitu sang, University Grant Commisssion (UGC) leh a thawhpui heng Indian Council of Philosophical Research (ICPR), All India Council for Technical Education (AICTE), Indian Council for Historical Research (ICHR), Indian Council of social Sciences Research (ICSSR), Indian Institute of Advanced Studies (IIAS), etc. te pawh hian zirna in te’n mithiam (resource person) an sawm theihna dan (invited lecture provision) an nei vek a ni. Tin, hemi provision atan a lecture pek man rate pawh bithliah fel sa vek a ni. Heng dan piahlamah pawh hian Indian Classical and Fine Arts promote na tur programme (SPICMACAY) an tih pawh a chhawr nasa ber zingah zirna in a awm a ni.

Heng dan hian mithiam a thliar dan erawh chu a zam dim dem lem loh avangin mi chi hrang hrang an leng hnem hle. Bank lam mithiam te, Business lam mithiam te, Film chang thiam te, Sipai officer te, Social activists te, Sports persons leh Politicians leh Journalists thlengin an leng vek a ni ber e. Ram changkangah phei chuan milarte hman ṭangkai hi an uar em em a ni. Tunhnai maiah pawh London School of Economics-in lemchan thiam Angelina Jolie chu an Institute a lecture pe tura an sawmna chu khawvel pumah a darh a ni. Vawikhat chu kei pawh research paper pakhat (Artificial Intelligence lam) ka buaipui ve laiin IITGuwahati-in kum tina festival an hman ṭhin ‘Techniche’ an tihah England rama an siam Robot chikhat ‘Jaberwacky’ an tih kha hrilhfiahtu mithiam (demonstrator) nen an rawn phochhuak mai chuh ka lawm kher asin. Ka paper ziaklai a nih avangin a tak ngeiin ka hmu a, ka hlawkpui teh asin. Professor te rawn buai em em lovin research article ṭha tak ka buatsaih theih phah tlat a ni.

Enge a nghawng tur

Mauruangi thawnthu a “Hmanah chuan hmanah chuan Vai lal nupuiah ...tunah chuan tunah chuan ka pu Sazaltea nau ka awi” tih ang deuhvin, he order “...to all teachers under Government of Mizoram that they should refrain themselves from inviting politicians or any outsiders for delivering lecture...” a chhuah hnu chuan Politicians leh mi tupawh college pawn a mi chuan lecture tha eltiang pawh pe dawn mahse awih a ni dawn ta lo a ni. Dik tak chuan Google CEO, Sunder Pichai te Apple CEO Tim Cook te, Reserve Bank of India Governor Urjit Patel te, tunlai ziaktu lar Chetan Bhagat te, Talisma Nasreen te, Arundhati Roy te, economist lar Amartya Sen, Chidambaram, leh Manmohan Singh, te hian kan Higher Institutes-ah hian lecture min pek sak se thil inhmeh ber zing a mi a ni ang. Mahse tunah chuan maw heng zawng zawng hi phal a ni ta lo tihna a ni.

Hmanah chuan keini pawn students te hmakhua (career) ngaihtuahin sipai lalte pawh sipai lama kawng awmte kawhhmuhna lecture te pawh kan pek tir kha maw le. A hlawkthlak hle a ni lawm ni? NEHU-ah khuan vawi khat chu JNU Professor lar, India rama chi leh chi inkara inthliarna do nasa em emtu Gopal Guru-an tlai dar 6:00pm ah lecture a pek dawn meuh chuan mithiam leh challang te kha seat chuh hmasa sa an ni. Thil chin tlak tak a ni reng a ni. Civil Services leh competitive exam a tlingte, mizo tihmingthatu ngei pawh sawm an han phallo dawn mauh mai chu a tha lo tak zet a ni. Students te zalenna rahbehna pawh a ni hial zawk.

Ram siam turin zirna in

Ram ngelnghehna leh tlukchhiatna hi zirna ṭha kan neih leh neih lohah a innghat thuk hle. Mizoram siam ṭha tur leh hnam ropuia mizote siam tur chuan zirna ṭha bawk hi a ni kan mamawh. Kan hriat theuh angin kan hma lamah hian Mizoram hian thil hmachhaawn tur lian tak kan nei dawn a, Sorkar laipuiin Act East Policy a kalpui mup mup hi a taka kan chhawr tangkai hun tur hi kan ngaihtuaha kan inven ngun hle angai dawn a ni. International Market kan luhchilh tak tak a tluklehdingawn tam tak pawisa ‘transaction’ in mizoram a rawn nan hun chuan, hnam ang hian kan dingchhuak ang nge, kan ral ang tih pawh hi chhut tham a tling a ni. Hengte lo hmachhawn thei tur chuan kan zirna in te kan thuamthat (revamp) a, mithiamte sawi angin value-based education hmanga thuam chak sauh sauh a ṭul.

Hnam tlem tak kan nih avangin kan sakhua leh rinna te, kan zonunmawi tlawmngaihna thuruk zawng zawngte pawh hi heng development lokal tur hian min chhuhsak vek thei a ni. Hei lo pawh Khawvel sang zel leh hmasawnna tlanchak takin a hrinchhuah intlansiakna nasa tak karah hian Mizote dingchhuak tur chuan ‘Zirna’ tha leh rintlak bawk hi a ni kan mamawh reng tur chu. Khawvel history-ah hnam ropuite dinchhuahna chu zirna tha leh tluantling aṭang zelin a ni. Modern Korea te, Japan te, China te dinchhuahna thuruk pawh zirna in aṭang vekin a ni.

Chuvangin, thuneitute hian ngun takin ngaihtuah leh sela, Mizoram leh hnam hmakhawngaiin he order hi chu sut leh hram teh se. Politics kan khelh chhan bulpui ber pawh ram leh hnam tan a nih kha maw.

- Dr. Vanlaltanpuia