POLITICIAN TE ṬAWNGKAM CHHUAK

August 3, 2016 Vanglaini chhuaka Pu Rualkhuma Hmar in a rawn tarlan hi a bengvarthlak hle mai.

Amaherawhchu, kan Politician ho ṭawngkam zawng zawng sawi sen ni lo mahsela, sawi awm tak a rawn sawi lan loh “Kan sawrkar hunah chuan Chakma District Council kan
ṭhiat ang”, “Kum thum chhungin ei leh barah kan intodelh ang”, “Chakai farm kan siam ang”, “ Sawhthing ching rawh u kan ti a, a lei erawh kan ba lo” adt. heng hi rawn telh law law se ṭha ka ti deuh.

August 13th , 2016 ah MNF leh BJP tih thupui hmangin Pu Ruala vek hian article a rawn ziak leh a. Heta a thu rawn ziah danah erawh chuan a hma-a a article ziah chul mamna lam a hawi lek lekin ka hria. BJP leh MNF te hi an thawhho leh ho loh chu sawi sawi ngaiin ka hre tawh lo. Puanzar pakhat hnuaiah an ṭhu tlar tawh a, kan thawkho lo la tih fo chu a rem tawh chiahin ka hre lo. NEDA a tel Party dangte hian BJP nen kan thawkho lo an tih thawm tun thleng hian kan la hre lo. An sawi pawhin a rinawm lo.

Pu Ramngaihsaka ziah Pu Ruala’n a rawn tarlan Congress + ZNP + MPC + tih hi a helh deuh a nih chuan heti hian ti ve ta i la. BJP + MNF+ Chakma + Tuikuk (Reang) a inhmeh viau dawnin ka hria. Hetianga kan kal chuan Party ṭhen-khat duhthusam angin Mizoram hi Two Party System ang deuhte pawhin a kal thei mahna.

A tawp bera ka sawi duh chu, Politics hi kan sawi a, kan la sawi zel dawn a, fak hunah infak ila, sawisel ngai a awm chuan in sawisel ngam bawk ila. Tehkhin nana kohhran hman erawh chu a rem chiahin kei chuan ka hre lo. Kan kohhran hote hi ring lo mite lakah kan tihmelhem hlauh dah ang e. Hawh u, kan ram hi a tlukchhiat hmain a tundin hna i thawk hram hram zawk ang u. Chhan tlak a la awm lai hian.

- J.V. Pahlira