AMC ṭang fan fan!

July 1 aṭangin parking fee tihsan a ni dawn tih June 25, Vanglaini chhuakah khan a lo lang a. Heta hnarkaitu Pu Rosiamngheta hi mi tam tak chuan an sel in ka ring, kei chuan huaisen ka ti tlat. Kan khawpuiah hian mihring aiin lirthei an lal zawk emaw tih tur khawpin lirthei hian min nekchep tawh a ni. Ram a ṭhang lova, kawngpui pawh a ṭhang hek lo. Chuvangin hmalak a ngai; nitin traffic jam reng te, kawng sira lirthei dah hnawk reng te vanga hun kan hloh nasat zia hi i ngaihtuah ngai em?

Lirthei neih hi inkhap sak ngawt theih a ni lo ang, mahse kan khawpui tawt chhan hi kawngpui zim vang niin a lang silo. Kolkata te anga mihring tamna ni silo-ah hian kan va tawt em em ve le! A chhan chiang tak chu lirthei hi a ni. VVIP te an lokal a, kawngpui a thawl duai mai zel, hei hian a entir chu ṭul loa lirthei hawlchhuah tam lutuk emaw, ṭul viau thil pawh nise kawngsira man tlawmte chawia hun rei tak tak kan hun ṭhin vang a ni.

Parking fee tihsan hian 'indirect' in lirthei hawlchhuah a titlem turah ngai ila, chu chu AMC lamin an tum ber pawh a ni. Lirthei hawlchhuah a tlem chuan mipui ph<rtute (public transport) kan bawh nasa ang. Mipui indaihlohna tur hre sa rana 'Green Line Express' tlan tir an tum te kha a ṭha dawn riau mai. AMC hotute hi zam loin kal zel rawh se. City bus aia tlanchak leh ding zinglo zawk, tlema ch<an man to tur 'Green Line Express' hi mipuite chhawk zangkhai tura ruahman tho a ni. Tuna city bus hi chu a ding zing si, a ding rei thei si; tawt deuha inhnawh ṭun te hi a hahthlak bawk. Green Line Express hian mipuite phurrit a chhawk ngei ka beisei.

Tunhnaiah AMC hmalakna in garage nei anga inziaklut si, zankhuaa kawngpui sira lirthei hung leh si an awm em tih an endik a. Lirthei ṭhahnem tak an man reng a ni. Mizote hian dan anga hmala turin midang kan duh a, dan ang taka kan laka sorkar a chetin kan phun leh si. Dan palzut thei nih te, induhsak or inhmelhriat vanga a ruka dan bawhchhe thei nih te hi kan uan pui ṭhin. Dan ang chuan lirthei nei zawng zawngin Garage an nei tur a ni a; garage an neih leh neih loh hi MVI in an endik ṭhin. Ṭhenkhatin garage nei anga ziahsaktu MVI te an dem a, mahse MVI te hi dem tur an awm lo tlat. A chhan chu mipuite hian kan bum ṭhin vang a ni.

MVI in lirthei register thar tur te chu lirthei hunna tur an nei em tih an endik hian 'garage' ṭha tak an lo kawhhmuh tlat zel. MVI lam tan "in ta a ni lo" a tih ngawt theih loh ṭhin. Tichuan dawt sawiin zofate hian lirthei kan lei a; kan lirthei hunna neih loh vangin vantlang tan hnawksakin kan hungchhuak leh ṭhin si. Mobile phone te, fridge leh thil dang man tlawm zawk khawlaia kan hun phal loh laiin a to zawk chu kan hungchhuak a. Misual kuthlei a tuar fo lo hi vannei tak kan ni. Pi leh pute huna "uire chu sakeiin a seh duh" an tih ṭhin ang khan garage nei anga dawt sawite lirthei hi misualin khawih fo ta se tunge dem thei awm ang?

Sumo sawnchhuah te pawh kan sawisel a, mahse he hmalakna hi a ṭha zawnga hmasawnna a ni. Khawpui hmun dangah Rail leh Thlawhna mai nilo Bus thlengin khawdai aṭang vekin an chhuak ṭhin. Ch<an man tlawm zawk bus kan thlauhthla tawh si a, ch<an hrehawm zawk Sumo kan bawh vek si; a stand sawnchhuah hi a ṭul reng a ni. Engvangin nge Mizote hian tihtheih loh leh harsatna tawk viau turah kan inngaih le? Retheihna leh thingtlangmi nihna awmphawa hmanga chapopui kan tam khawp mai. Bus chuang peihlo khawpa hausaa inngai, MST bus pawh BPL bus tia nuihsawh ṭhinte hian retheihna hi chapopui tum lo teh ang u.

Engpawhnise sorkarin (AMC) nakin hun thlira khawpui tana ṭha zawk turin hma an la a. A rahchhuah sawi tur pawh la awm hma hauha kan lo sel chiam hi a mak ka ti. Mizote hi insawi ṭhaih hnam kan ni ber e; Zu zawrh kan insawiṭhaih a, sikul ṭan hma kan insawiṭhaih leh a, Sumo stand sawn leh YOGA thlengin kan insawiṭhaih a nih hi. Chuvangin parking fee tihsan, sumo stand sawn chhuah leh parking lot/area tihtlem kawngah hi chuan AMC hmalakna hi ka thlawp tlat a; "Pu Rosiamnghet ṭang fan fan, i hmalakna zarah Aizawl-in hmelthar a hmu dawn e" tiin duhsakna ka hlan a ni.