CYMA chungah gas consumer-te an lawm
Kum hnih vel liam ta chhung khan eirawngbawlna gas kan hman dan hi ka chhinchhiah ṭhin a. Gas bur kan thlak ni kha Calendar-ah gas tia ziakin ka thai bial
ṭhin. Ka chhungten an lo ziah loh palh pawhin a ni ka chhui chhuak a ka ziak leh mai ṭhin. Kum hnih chhunga gas kan hman dan hi a inang lo hle a, a ṭhen chu ni 15, a ṭhen ni 22 kan hmang a; ni 18 leh 19 hi a tam ber a ni a, ni 22 han hman thlen chang hi chu a khât hle.
CYMA-in gas tihchingpen chungchanga hma an lak hnu hian gas bur hnih kan la tawh a, ni 25 chhung kan hmang tling ve ve. Heti hian kum hnih liam taa gas bur khat kan hman rei zawng chu chawhrualin ni 19 ah dah ta ila, CYMA-in hma an lak hnu hian ni 6 in gas kan hmang rei tihna a ni. Hman deuhah laklawh thil avangin ṭhenawmte gas kan puk a, police department gas agency aṭang an lak a lo ni a. Hei pawh hi ni 25 chhung kan hmang. Gas tihchingpen loh hi hman dan tlangpuia hman chuan ni 24, 25, 26 chhung kan hmang thei a; tihchingpen a nih chuan ni 18 leh 19 kan hmang tlangpui.
Gas khat ṭha pangngai bur li kan lakin ni 100 vel a daih. Tihchingpen a nih chuan ni 75 vel kan hmang thei. Gas tichingpentute hian bur 4 a bur khat zel hi gas connection nei zawng zawngte min ruk sak tihna a ni a, a rapthlak ngawt mai. Kum khatah chhungkaw tinin gas bur 15 vel kan tla tawk tur kha tihchingpen a nih chuan bur 19 emaw 20 vel lak a ngai ta daih mai a ni. A ni lo berah connection nei zawng zawng hi kum khatah bur 4 min ruksak zel tihna a ni. Gas tihchingpen hi kum 2 liam ta-ah mai khan kan hria a ni lo a, kum tam tak a ral tawh a ni. Hun kha leh chen min ruksak tawh tling khawm hi a tam tham tawh ngawt ang.
Gas khawih chingpentute hian sual lian tak an ti tih hi an inhria em aw? In tinah lut lawrin ni 6 chhung an hman tur gas an ruk sak tihna a ni a, chhungkaw tin deuhthaw kum khatah Rs. 1800/- chuang an laksak a ni. Gas tichingpentu tih pawh hian an thil tih hi a phawk pha lo, 'gas ruk ching' ti tawh ila a ṭhain a dik zawng bawk ang. Gas ruk chingte hi thuneituten an man fo a, hremna a nep lutuk a ni ang, an chhuak leh mai a, an sum chawi hmuh let leh nan a aia nasa in gas an ru leh mai ṭhin niin a lang. Gas ruk ching man chhuahte chu an hming leh thlalak chanchinbu leh TV ah tarlan ni tawh ṭhin se, vawi 2 aia tam man te chu 'gas ruk ching ka ni' tih ziak awrhtirin Aizawl khawpui fan pui ila a ṭha ang.
CYMA a han chet a chinah hetiang tih chingte chu an tawm tawk ta mai. Gas buk tling lo la ṭhin khan khat
ṭha tak kan han la ve ta a nia! Gas consumer-te kan lawm a ni. Mahse hetiang lam buaipuitu Legal Metrology an awm a, hlawh tam tak la chungin hun rei tak ata tawh kawla ni chhuak chhiarin an lo thawk chhuak tawh ṭhin a ni. CYMA, hlawh pawh nei loin ni reilote an han thawk chhuak a, eirawngbawlna gas chungchangah danglamna nasa tak a thleng ta si. Staff indaihloh chhuanlama hmang reng lo hian han in sang mar deuh se tih hi mipui beiseina a ni.
- Varthanzama,
Republic Vengthlang