Buhfai man 'ennawn' tur thu
Vanglaini chanchinbu hi ka chhiar regular viau a, chanchinbu dang chu han lak mai tur leh chhiar mai tur a awm remchang lo bawk nen ka chhiar vak lo. TV lamah Doordarshan leh Zonet chanchin thar ka ngaithla regular viau bawk. Chuvang chuan Mizoram chanchin tharte hi chu hre vek lo mah ila, kan chanchinbu leh TV news ten an puanzar chin hi chu ka hre ve zel mai.
Chanchinbu leh TV news aṭanga ka lo hriat danin, tun kum thar 2025 January ni 13 khan MNF Party chuan kumin 2025 atan an office Hnam Rûn chu an hawng a, chutah chuan an President Pu Zoramthanga'n thu a sawi tih puan a ni. Pu Zoramthanga hian kum 2028 MLA inthlan leh hunah MNF tlinpui kum a thlen a rin thu te, MNF an sawrkar leh a nih chuan ZPM sawrkarin buhfai man a tihpun leh petrol leh diesel man a tihpunte chu an ennawn tur thu a sawi thute puan a ni.
MNF Hnam Rûna inkhawmah vek kumin January ni 17 khan MNF Treasurer ni chho ta Pu Lalruatkima pawhin buhfai man tihpun chu MNF an sawrkar leh chuan an ennawn dawn thu a sawi thu chanchin tharah puan a ni bawk.
Pu Zoramthanga leh Pu Lalruatkima ten tun ZPM sawrkara buhfai man tihpun leh petrol/diesel man tihpuh tawh MNF an sawrkar chuan an ennawn dawn thu an sawi hi thil lawmawm tak angin a lang a. Mahse, ngaihtuah chian chuan lawmna tur a awm lem lo tih kan hre thei ang. Eng nge a chhan?
A chhan chu Pu Zoramthanga leh Pu Lalruatkima te hian buhfai man leh oil man an 'ennawn' dawn thu ringawt an sawi a, a man an 'tihhniam' dawn thu an sawi lo. A man 'ennawn' hrim hrim chu a harsa hleinem, an ennawn avangin an tihniam dawn tihna pawh a ni hek lo. Chuvang chuan 'Kan ennawn dawn' an tih ringawtah hi chuan lawmna tur a awm lo. Sawrkar ta se, buhfai man leh oil man an ennawn ang a, tihniam lovin an tisang zawk hlauh thei ve tho asin!
Pu Zoramthanga an thukruk em ni?
Tunah hian kumin February ni 12-a VC leh LC inthlan neih turah political party hrang hrangte'n chak tumin theihtawp an chhuah mek a. Party hrang hrangin an hotu lu ber berte nen mawngvawm ba ang maiin an hmanhlel a, an zin chhuak mawlh mawlh mek a ni.
Congress ho hi an President Pu Lal Thanzara hovin hmun hrang hrangah an zin kual a, ZPM pawh an President Pu Lalliansawta leh Minister leh MLA-te hmun hrang hrangah an zin kual thu chanchin tharah hmuh tur a awm châmchi a ni.
Chutih laiin MNF President Pu Zoramthanga hi VC leh LC inthlan atan campaign-a a zin chhuah thawm hriat tur a awm ve ngai lo a, chanchinbu leh TV news-ahte ka hmu ve ngai lo. Ka hmuh chhun chu Hnam Run inkhawma thu a sawi chauh a ni.
MNF hian an President Pu Zorama hi campaign-a kal kual turin an duh tawh lo va, a campaign ve chuan mipui an hîp lo zawk dawnah an ngai a, chuvang chuan an thukru ta deuh em ni chu aw ka ti rilru a. Dik tak maw le?
- Lalthansanga