AMC parking fee khawntu thlan dan kha
Aizawl Municipal Corporation (AMC) chuan tunhnai khan Aizawl khawpui chhunga motor parking fee khawn turin tender a ko a, kum khat chhung parking hrang hrang khawntu tur an thlan dan kha a lungawi thlak loh takzetin ka hria. Kha thil kha PRISM chuan media hmaah a puang a, a chhang sang berte kha pe ta se Rs. 32,21,040 lai a hlep tur a ni a, mahse duhsak zawng an pek avangin nuai 32 zet kha a hloh ta a ni.
Parking fee khawn-tu zawnna tender-ah khan dan leh dun a awm vek a, a chhang sang ber pek loh theihna dan an siam mauh mai kha thil dik lo, mahse duhsak zawngte pekna chance ṭha lutuk a ni a, chu dan ngei hmang chuan a chhang sang ber zel pe lo khan, a chhang hniam lam an pe ta tlat a. Kha vang khan AMC chuan nuai 32 zet a hloh nghal der kha a nia, hriatthiam theih niin ka hre lo.
Mizoramah party mi induhsakna a nasa a, chutiang bawk chuan AMC-ah pawh mahni party mi duhsak theih nan dan an siam a, an dan siam chu hmangin nuai 32 lai an hloh a ni. Kha dan kha enfiah leh ngei se, a chhang sang ber zel pek theih nan siam-
ṭha ngei se a ṭha ngawt ang. Mahni duhsak zawngte vur duh vanga kum khata cheng nuai 32 zet hloh a ni kha a dik hian a dik thei mawlh lo. Dan ṭha lo tak, mahni inlak vawng theihna Dan a nih miau avangin siamṭhat leh ngei rawh se.
AMC hian sum lakluh theihna turin theihtawp an chhuah a, property tax leh thildang tam taka mipui aṭanga sum a khawn mek a. Khawpui chep tawh tak rem leh rem loin sum lakluh a nih dawn chuan tiin vehicle parking an siam belh ṭeuh bawk a. Chung parking an siam belh avang ringawt pawhin traffic a jam nasa tawh hle a ni.
Parking fee khawn-na area pawh hi tihtlem zung zung zawk nise, dropping-ah siam ta ṭeuh zawk se a fuh zawk ang. Taxi stand pawh hi hmun ṭha lai ber zela pek pawh hi
ṭhiah ṭhen hret hret a, dropping zone-a siam tam a ṭul tawh khawp mai. Hetianga hmun
ṭha zawng zawng Taxi-te nilenga an hman bik hi a duh lo mai ni loin, mipui vantlang zalenna rahbehna lian tak a ni.
Tin, lirthei kan lei tharin kum 15 atan life time tax kan pe a, chu kan chhiah pek tawhna kawngsirah parking fee kan chawi double leh te pawh hi thil dik lo hulhual a ni. Lirthei neitute hian kan dikna leh chanvo kan ngiat ve hunah chuan kawng sira parking fee kan chawi hi a awm thei tawh dawn lo a ni.
Chuvangin AMC dan sakei, tender chhang sang ber pek theih bik a nih lohna an siam hi sut leh se, a chhang sang sangin an chang ngei tur a ni. Bakah chhiah kan pek tawhnaah chhiah dang kan chawi double pawh hi tihtawp ni ngei bawk rawh se.
- Lalpekhlua