Hruaitu Ṭha ni turin Engte nge pawimawh?

Inpekna: Inpekna tak tak tel lo chuan hruaitu ṭha a nih theih loh. Degree sang aiin, inpekna a pawimawh zawk. Kan kaihhruai pawla kan inpek zawh poh leh, hruaitu
ṭha nihna kawng chu kan zawh a ni mai.

Pawl thil tum hriat: Kan awmna pawlin eng nge a tum, eng nge a nihna laimu tih hi kan hriat chian a, chumi lama kan kal thiam chuan hruaitu
ṭha kan ni thei ang.

Inzir peih: Pawl kaihruaitu kan nih chuan kan hriatna te pawh hi a zau tur a ni. Ngawng lutuk leh chut lutuk tan hruaitu ṭha a nih theih loh. Kan hriatna tih zau nan chanchinbu, news channel leh lehkhabu ṭha te kan kan rawn taima tur a ni.

Huaisen: Hruaitu ṭha ni tur chuan kan rilru a huai a ngai. Kan rilruin a cho loh sa run chuan pawlin thil thar leh ropui a ti thei lo. Chutihrual chuan huaisenna ṭha lo laka inthiarfihlim thiam erawh a ngai hle. Huai tih vanga tawngpawng pal pawp pawp a ni chuang lo.

Midang huikhawm: Hruaitu ṭha chuan midang huikhawm an thiam ṭhin. Kan huikhawmna hmanrua chu eng pawhnise, kan awmna pawlin a chak phahna tur kan zawn thiam a ṭul. Hruaitu ṭha nih kan duh chuan, midang huikhawm kawngah ṭan kan lak a ngai hle a ni.

Hmahruai leh hnung dawl: Hruaitu ṭha ni tur chuan eng kawngah pawh hmahruaitu kan nih thiam a, hnung dawltu kan nih peih a ngai.

Midang thawhpui thiam: Midang thawhpui thiam miah lo tan chuan hruaitu ṭha a nih theih loh. Hruaitu kan nih chuan thawhpui theih loh kan nei thiang lo; chutihrual chuan thawhpui duh bik erawh a neih loh theih loh ang a. Hruaitu dinhmuna kan din a, hruaitu ṭha nih kan duh si chuan thawhpui theih loh kan nei fo tur a ni lo.

Tlawm ngam: Hruaitu nihnain a ken tel tlat pakhat chu, a huna tlawm ngam hi a ni. Tin, tlawmna nun neih tel te pawh hi thil ṭul tak a ni. Tlawm duh miah lo hruaitu, tlawmna nun nei lo lutuk hruaitu, hruaitu ṭha an awm ngai lo.

Thurawn: Hruaitu ṭha chuan midangte thurawn a la peih ang a, a khaikhawm thiam bawk tur a ni. Chutihrual chuan tute emaw thurawn ang apianga kal reng hruaitu chu hruaitu ṭha an tling thei ngai lo.

T5: Hruaitu ṭha chuan tum--ruhna, taimakna, tawrh-chhelna, thawhrimna leh tih tak takna nun a nei tur a ni. Tum mumal nei lo, thatchhe si, tuar zuau bawk, thawk
ṭha peih bawk si lo leh, tih tak takna nunpui lo tan chuan hruaitu ṭha nih hi thil har tak leh nih theih loh tawp a ni.

Huaitu ṭha ni tur chuan a chunga ka'n tarlan takte hi chu tlem tak a ni. Hruaitu nih hrim hrim hi thil har a ni lo, hruaitu ṭha erawh mahni inzir peih tak takte tan chauh a ni thung. Chutihrual chuan zir zawh theih loh hringnunah hian pass kher kan tum vek chuan kan fail fo thung ang. Chuvangin, nun hi zirna a nih angin kan inzir zel tur a ni.

- Biaksiamtluanga