Tualsumsu leh Zunhindawt chungchang kha
Vanglaini June 18, 2015 ngaihdan huangah khan Pu R. Lalfakawma, Seling khan Tualsumsu leh Zunhindawt chungchang a rawn ziak a. Khatah khan Bible thua "Thlarau hi a tam a, Thlarau nazawng chu ring suh u" tih rawn changchawiin a ngaihdan a rawn ziak a. Thil a hre ṭhelh niin ka hria a, ching tawh lo hram ang u, mi rilru kan intih nat sak mai mai lo maw?
Kan pi leh puten kha article kha chhiar ve se an sa phatin ka ring. A chhan chu buan chak lo leh dam lam thil ngainaa a rawn chhuah mai leh Tualsumsu leh Zunhindawt chungchangah hian a taka tawng leh sawi theite tan chuan hnar phit dat datna tham a ni mai si a. Puithuna hi chu a tam a, kan pi pute hunlai khan Paula sai hlau reng rengin tlangvalten hun an hmang a ni.
Zunhindawt - hurherh thila han puh ngawt hi chu a zialo deuh; ni ta se, an hing haw ve khawp ang le, nutling zun lehnghal! Thil awm ngei a hmutuate chuan he zunhindawta hi Dumde anga dein, a kutchang tin hi a de ṭhin ni awma sawi a ni. Thil vang tak a ni a, sawi tur ting chuan tawng chu an awm a ni chek ang a, a hmutu pawh zel anga awm angin sawi ṭhin a ni.
Tualsumsu hi Pu James Dokhuma sawi ang hian thlarau/ mang hriat emawa chhuak hi chu a ni a, thil awm chiang hmuh zen zen loh a ni. Mi pangngai tan chuan chhip zawnga suka kal ve ngawt chu thil theih loh ang a ni. Tualsumsua chang hi mipa pawh hmeichhia pawh an awm. Amaherawhchu, hmeichhia a suate hi an mal a lang kher lo a nih hmel. A sua leh a su-tu-a-te hi an inhre ve ve ṭhin.
Tualsum suk danah hian 'mi ai' an suksak thei a, an suk-saka-te hi natna nei lawk lo pawh ni se an na thut a, an dam loa an thi zui mai ṭhin. Tualsumsua sute hi an mut hlana an thlarau chhuaka su an ni tlangpui a, dam ṭha an su ṭhin tlangpui.
Heng thla ai te, thla kui te, thla rum te, thla bawhte leh zana mi ar ina luta an ar ring thuai chhuma ar chhuah chingte hi awm a ni a, Chhawihfaa changte pawh an awm.
Ka tawn hriat thilte an ni nghe nghe a, heng thlate hi vaua reh chi a awm ve bawk. Dam lai thla neite kan la awm zel bawk a, a lem a ni lo. Zawhte ki nei leh film-a hranga thlawk chi te nen tehkhin chi a ni lo.
Kum 2000 hnu lamah hian kan tawng ta lo mai rih zawng a ni.