Saruak thlalak - F Vanlalrochana

Tunlaiin Nude Photo an tih ang tur hi ka hmu tam hle a. Art kan ti liam mai zel bawk a.

Sap ho pawhin saruakin thla an la ve fo mai, an hausak pui lawih lawih a. Mahse, an thalatuten an duh duhin an pho chhuak chhuak lo a, an lanna tur media (Magazine etc) in a chhuah hun turah an ti chhuak mai ṭhin.

US President candidate Donald Trump-a nupuiin tun hma kum 20 chuang kal ta a, Magazine kawma saruaka a lanna chu tun hnuah an phawrh thar sak leh a nih kha. Hnam dang model chuan, saruaka thla an lak dawn meuh chuan news a tling ṭhin. Model tam tak chuan an duh bik kher lo. Playboy, Penthouse, Sports Illustrated vela lang chin chu a lang awm tak an ni e, an ti fo mai.

Pirelli calendar a lang pha chin model te pawhin thlalatu nazawng hmaah an in phelhin, an inpho duh miah lo mai. Mihring taksa hi ruaka awm a
ṭul lem loh avangin thawmhnaw ha kan ni a. Miin pawisa hmuh duha a lo ti a nih pawhin a thu a ni e. Mahse, mi hmuh tura in phelh ruak tur meuh chuan, India Rupee phek engemaw zah ni ve rawh se.

Nun dan thiam hi a har a, mah se zir hi a theih a ni. Modelling te pawh hi taimaa insum theih a, tih tak tak chuan thui tak a thlen ve theih tawh ang - mahse, awmze nei ni rawh se. Mi dang thurawn la thiam ila, "ka ti duh ang em?" "A tih chi ang em?" tih zawhna hi zawh fo tur a ni.

Henry James-an The Portrait of A woman tih a ziahah chuan, a changtunu chu hmelṭha leh talent nei ṭha tak a ni a, ro tam tak a rochun a, mah se holam takin a nun a khawhral a. "What have you done with your life" tih zawhna a dawn phah ta a ni. Kan talent leh kan theihna, kan nun hi holam taka khawhral loh tur a ni. Kan nun dan erawh kan thu chu a ni teh meuh mai.