Eng ngati nge kan dam theih loh?

Ropui taka vuiliam nih aiin dam taka thawh theih a ropui zawk a; chhungkaw châwm hlawm nih aiin chhungkaw châwmtu nih hi a hlu lehzual. Beidawnna kawng aiin beiseina kawng a thui zawk a; mi beidawngte zinkawng zawhtu chu a dingchhuak ngai lo vang. Hun harsa ber lai pawha beiseina kawng zawh hram hramtu chuan hlawhtlinna a chang nge nge ṭhin. Mi fing leh remhria awm mai mai aiin remhre lo tak chung pawha thawk hram hram chu chhungkaw tan innghahna tlak an ni zawk. Finnain ngawih a chuh reng si chuan eng nge fin a ṭulna? Ram leh khawtlangin chhan a ngaih laia kut kuangkuaha lo thlirtu chu fingah inngai mah se, mi chut takah ngaih a ni tho tho ang.

Pathian mihriat, kohhran mi, upa, tual upa, ṭhalai hruaitute’n kan ram leh khawtlang politic laka hian an inthiar fihlim a. BC hunah khan kan Pathianin a mite ngei ram hruaitu tur a zâwlnei kaltlangin a thlang ṭhin a nih kha. Tu hian nge kan khawtlang hi siam ṭha ta ang? Khawvel mite siamṭhat atan kan dah a nih chuan mawh kan phur ve asin. Ngati nge i thlir liam a, i en liam mai mai theih zawk le? Diknain kawng sira hrût mek a; dâwt erawhin ring takin aw a chhuah mek a nih hi.

Nang Pathian rawngbawltu, i mawhphurhna kha kohhranah chauh sáwr bing suh. Tho la, i ram leh khawtlangah hian au chhuak ta che. Kan ram leh khawtlang hi chhan tlak a la awm asin. Mi dik lo leh mi dawtheite’n inlulinna an chan hma hian i ram leh khawtlang chuan a ko a che.

Ram leh khawtlang hruaitu ṭha neih kan duh chuan Pathian mihriatin kan ram leh khawtlang hi an hruai a ngai. Chu chu, Israel fate hun lai khan lal tam tak hriat zui hlawh lote aṭang hian zir chhuah tur kan nei a ni. Israel fate khan lal ṭha lo tam tak an nei a, eng vang nge? A thlangtu mipui dik loh vang a ni. Pathian thu an awih lo va, lal sual tak leh nunrâwng tak takte’n Israel-te kha an awp ṭhin a nih kha.

Keini pawh kan rin Pathiana innghat lovin therhlô kan dawn theihna tur mi kan vote tling a; hamṭhatnaah damna kan zawng a, kan dam chuang si lo. Kohhranah kan dam lo va, a pe tam thei a piangin hruaitu fawng an vuan a; sumin a lei theih loh nun tuihâlnain kohhran a ngui zo ta. Cross ropui tak kan din a, hetiang din theia min hruaitu nge ropui ta a, a dintu?

Jeremia 8:22–“Gilead-ah thinghnai damdawi a awm lawm ni le? Chutah chuan tidamtu a awm na nge? Engati nge ka mite, ka fanu a hrisel theih loh?

Mizo Kristiante kan inbihchian a hun ta. Ram pum huapin VC leh LC kan thlang leh dawn. Zu fûn hnih khat leka lei theih ringtu kan nih chuan khawtlang hruaitu ṭha kan thlang chhuak ngai lo vang. Kan phu ang tawk chiah mi pamham Lalpa’n min pe ang.

Nangni thlan tlinte u, ngati nge khawtlangah chan ṭha in chan avanga he din hmuna hlangkaitu che Pathian hi i hlamchhiah tak mai le? Lalpa malsâwmna kan dawnah hian lawmthu sawi aiin, a malsâwm kan dawn hi kan buaipui zawk ta si a. VC/LC kan thlan tlin ngeite laka kan dam zo lo va, kan beisei an pha lo va, kan duh ang kan dawng lo va, kan phun leh ṭhin a nih hi.

Ram leh khawtlangah damna a awm lo va, khawvel mite laka innghat a, party-a lut thûk apiangte hi an vui nasa ting mai dawn a ni.

II Timothea 4:5 – “Nang erawh chu engkimah fimkhur la, hrehawm tuar la, Chanchin Ṭha hriltu lam hna thawk la, i rawngbawlna kha hlen rawh.

- Zothansanga, Chhiahtlang Kawnveng, 9612333536