PC ho hi inṭhiat tawh mai rawh se
People Conference hian political party an nih anga an tih tur tam tak hun rei tak chhung an tih ngai tawh loh avangin Election Commission of India-a registered party an nihna hi titawp tawh mai se a mawi tawh zawk ang. Tuna hruaitute hi PRISM hruaitute deuh vek kha an ni tawh a, PRISM ang khan NGO pangngai angin kal leh tawh se a fuh zawk awm e.
Hetianga ka sawi chhan chu–PC party hian political party an nihna anga an tih tur an tih ngai tawh loh vang a ni. Political party tih tur leh tih loh turte ka hre thûk lo va. Ka rilrua a lan ve danah chuan, political party chuan ram siamna leh hmasawnna a ngaihtuah tur a ni a, chumi tur chuan inthlan an chuh tur a ni tih hi a ni.
PC party hian hun eng emaw ti aṭang khan inthlan an chuh ngai tawh lo, a bik takin tualchhung roreltu (local body) tur thlannaah. Ka hriat danin, kum 2023 tir lama Lunglei Municipal Council inthlanah khan PC party hian candidate an nei lo ṭhak a; a hnua Aizawl Municipal Corporation by-election hrang hrangah leh local council by-election-ahte pawh candidate an nei ngai lo.
Tunah pawh autonomous district council area tih loh Mizoram pumah VC leh LC inthlanpui neih a ni dawn a, hetah pawh hian PC party hian Mizorama khua leh veng heti zat awmah hian candidate an nei dawn lo ṭhak bawk niin a lang. Ka hre vek lo va, mahse, PC hovin candidate an neih thu sawi ka la hre miah lo.
PC party hian kum 2023 MLA election leh 2024 MP election-te kha chu an chuh ve a. Mahse, MP thlan hnuhnung ber kha chu an candidate ni duh tur an zawng nasa a, an hmuh tak mial avangin an chuh ve ta hram niin a lang.
Hengte avang hian PC ho hi political party inti tlak an ni tawh lo va, Election Commission-a registered party an nihna pawh hi hnûkdâwk law law se a dik tawh zawk ang. Inthlan chuh duh lo na nâ nâ chu political party nih ve reng a ṭulna a awm lo.
PC party-ah hian mi leh sa an nei vak tawh lovin a lang bawk. Tuna hruaitu mi tlemtete hi PC mi leh sate chu an ni mai tawh niin a lang. Hei vang hian political party han tih tlak an awm tawh lo a ni ber mai. Election Commission pawhin recognised party a nihna a tihtawpsak tawh a, registered party a nihna pawh hi a tihtawp thuai a rinawm.
PC party (a changin MPC) hi tun hmain party chak tak an lo ni tawh a, Mizoramah sawrkarna pawh an lo chelh tawh ṭhin a, ram tan thil ṭha tam tak an lo ti tawh. Mahse, tunah chuan an hun a liam tawh a ni. PC nihna kengtu tak takte an awm tawh lo va, tuna President leh hruaitu pawimawh dangte chu PRISM aṭanga PC-a inchhung lut deuh vek kha an ni tawh. Anni hian PC nihna (identity) tak tak an keng zo lo a ni.
- Zodinsanga