En tur dik (lo)

Pangpar mawi ti ve tho, mahse, a ngaihna hre vak lo ka nih hi ka ṭhian leh laina hnaite hi chuan an hre viau a. Mumal leh nalh taka pangpar khawi hi ka thiam loh zawng tak a ni. Chuti chung chuan engtik lai emaw aṭang khan kan biak ina pangpar khawi hi ka chîk thei ta riauva; khawi tura min ruat ve aṭang khan a ni tain ka hria!

Kan biak ina pangpar khawitute hi chuan Inrinni zana dah hman turin tlai lamah kan khawi tlangpui a, Chawlhni nileng leh Nilaini thleng a inkhawi ṭhin. Kan kohhranah chuan pulpit aia sanga khawi loh duhthusam a nih thu pangpar khawi tura ruat apiang min hriattir nghal bawk ṭhin.

Biak ina pangpar khawi chu Inrinni zan inkhawm hian ka mit la hmasatu a ni fo va, rilru hian tehna hrang hrang hmang hian ka’n teh ta ṭhin a nih chu! Ka teh hnuhnun ber pangpar khawi chu Rose senno kuhmûm leh hnah hring sín chi khawi pawlh a ni a, a style pawh a mawi khawp mai. Mahse, ka’n en chîk chuan a chhîpah hian pangpar chi dang, a rawng var hi a awm vâng mai a, ka ṭhutna aṭang phei chuan a ngil lovin a hé deuh nghe nghe. A bul chiaha hnah hring sín chi pawh chu a hé deuh tlén hian ka hmu a. Ka ngaihtuahna a luah ta em em mai a, a sir leh a hnuai vela Rose senno kuhmûm mawi tak takte chu hmu reng chung si khan ka mit chuan a chhip lam kha a melh thleng zel a; a timawi lotu nia ka hmuh chuan ka mit a tikham em em ta a nih chu! Chawlhni chawhma, chawhnu leh zan bakah, Nilaini zanahte pawh chuan pangpar khawi lam chu enin, a chhipa pangpar var chu ka hmu lo thei lo.

Hetianga ka rilru leh mit ka sawh sawn theih loh lai hian ka ngaihtuahna chuan ka rilru puthmang dik lohzia chu a hre reng a; ka inthunun thei si lo lai tak hi keimah ka inchhuan lohna lai tak chu a ni. Pangpar khawi, a pangpar tam ber leh mawi ber Rose senno ka hmuh reng leh mawi ka tih tho aia pangpar dang pakhat lo awm ve ka hmu lian tlat mai leh ka mit a timîm tlat mai ang zia hi kan hringnunah hian a hnawk tih hi kan ngaihtuah ngai em? Nge, mihring ziaah pawmin, pawi lovah kan ngai zel mai zawk dawn?

Mizorama cheng Mizote hian keimah anga rilru pu hi duh aia tam kan nei hial ang em? Tun hnai leh tun hma deuh tawha kan rama thil thleng eng eng emawah hian kan rilru puthmang hi biak ina pangpar khawi ka lo thlirna anga thlira ngaihdan siam kan tam hle ni hian a lang.

Tun hnai maia thil thleng ṭhenkhat aṭang hian he ka rilru puthmang anga ngaihtuahna hmang leh thutlukna siam zung zung mai kan tamzia te, chu ngaihdan chuan thil dik zawk min hmuh ṭhelhtir theihziate a lantir ni hian ka hria a. Keimah ngei hi inen let hmasa tur ka nih tih hi ka zir chhuakin ka hria.

Mi pakhat, khawtlang kuta thi chungchanga kan thu khel danah hian, rose aia pangpar var hmu lian kan tam tih hi zêp rual a ni awm lo ve. Kha thihna thlen chhan kha chhui chiang lem lova a chhehvela zêldin thu nena ngaihdan lo siam kan tam dan en hian, rose senno tam tak leh mawi tak en liam a, pangpar var pakhat tê lo awm ve avanga mit kham leh lo thinrim hi engzat tak awm ang i maw!? Kha thil thleng duhawm lo em em leh mi tin ngaihven kha, a laimu aia a káwr lam kan buaipui nasatzia te, tu emaw pakhat mawhphur bika kan dah avanga a thawh ang thawk zawng zawng kan dem zui chiam te, ṭhenkhat phei chuan a ruaitu kohhran thlenga kan sâwt chhova kan thawhlawm thawh thlenga kan sawisel chho kha chuan kan en tur mawi leh ṭha tam tak kara a chhe lai kan hmuh len hmazia a tilang hle a ni.

Mi pakhat, eng emaw ruih nei thu leh hla avanga a chhung leh khat leh an awmna pawl thlenga dem châk kan awmte hian pangpar mawi em em mai hmuh ṭhelh a, keimah anga pangpar dang, a rawng pawh dang leh mawi lo lama mit lên ngar ngar chu hi kan la tam viau tih a tilang.

Kan hringnun khawvel hman mekah hian ṭha famkim tu mah kan awm ngai dawn lo va, mi dang sawiseltute ngei pawh hi sawiselbo kan awm ngai dawn hek lo. Mimal leh chhungkua ang tho hian pawl, kohhran leh sawrkar pawh hi a enkawltu mihring ve bawk an nih avangin a ṭha famkim thei lo tih hi kan hriat a pawimawh. Chutih rual chuan, pangpar mawi tak tihmelhemtu pangpar dang bik, mi mit timîmtu nih hi a ṭhat lohzia kan hriat ve a pawimawh hle bawk.

Tun hmaa zirtirtu hna, hna zahawm tak ni ṭhin kha zahawm ta lutuk lova a lo lang a nih chuan, kei hi chu mawhphurtu chu ka ni thei tih hriain inen lêt ila.

Daktawr kan thlamuanpui em em ṭhinte hian kan damna aiin an sum lak luh tur an dah hmasa zawk nia a lang chho ta lek lekah pawh hian pangpar mawi leh rimtui kara mawi lo leh rimchhia lo awm ve ka ni em tih ngaihtuah a ṭul.

An beramte enkawl tura Pathian rawngbawltu tam tak zingah beramte aia ngaih pawimawh nei, Pathian leh kohhran aia mahni leh mihring thupuia neih zawk rawngbawltu kan awm a nih chuan sim a va hun em!

En tur dik en tur hian kan mit aia pawimawh kan rilru thunun ila; mi dang en tur mawi leh ṭha kara an mit la pêng thei tur dang bik, mawi si lo ni lo turin kan rilru sûkthlêk tihdanglam ngai a awm chuan huaisen takin tidanglam ang u.

- Dikteii Hnamte