Hnam hnufualte leh Indian socialism

‘Hnam hnufualte leh Indian socialism’ tih thupui hi academic paper ziah tur ni ta se la chuan political science leh history lama kan mithiamte’n sawi tur tam tak an nei ang. He article-ah erawh hi chuan a theory lam luh thûk leh sawi zau ka tum lo. Keini anga hnam tenau leh hnufualte tan chuan India anga socialist rama kan awm hi kan vanneizia ka mimal ngaih dan leh hmuh dan mâwlmang deuhvin leh tawitein sawi ka tum a ni.

Mi tam tak chuan India hi democracy zîktluak ram niin an ngai a; hei hi a dik lo–socialist ram a ni. Nimahsela, socialist ziktluak ram ni lovin, socialist secular democracy ram a ni. Constitution Preamble ngeiah India chu ‘SOCIALIST SECULAR DEMOCRATIC REPUBLIC’ ram a nihzia chiang takin a inziak a, khawvelin India a hmuh dan leh a hriat danah pawh socialist ram a ni (https://en.wikipedia.org/wiki/...).

Kan hriat ṭheuh angin socialism kalphungah chuan ram leilung leh a hausaknate neitu chu mipui an ni a, chutichuan, socialism thil tum chu ‘social and economic equality’ a ni. Social equality tih hian hnam tin, ṭawng tin, sakhaw tin leh hmeichhia leh mipa intluktlanna a kâwk a; economic equality chu khawsak rêlbâwlnaa khua leh tuite intluktlanna a ni. Chuvangin, mipui neihna, insem rualna, rethei chhanchhuah leh intluktlanna tihte hi socialist kalphunga thumal laimu berte chu an ni awm e. Hemi avang hian socialist ramah chuan mihausa leh mirethei dinhmun inthlau lutuk lo tura ngaih leh beisei a ni a, ram hruaitute pawhin hruaitu an nihna chu an chhungkua leh an vua leh vângte tihausakna atan an hman tur a ni lo.

A chunga kan sawi tak socialism kalphung leh thil tumte khi an ṭha hle a. Nimahsela, tunlai khawvel leh India-in zalenna a hmuh vel lai khan socialism leh sakhaw zalenna awm lohna one-party dictatorial system chu unau pianpui anga ngaihna a awm tlat avangin, socialist ram nih chu ram duhawm ber leh ram duhthusam ber anga ngaih a ni hran lo. Chutiang a nih si chuan hruaitu hmasate khan eng vangin nge India Constitutionah ‘socialist’ tih hi tel kher a, socialist ram nih kher duh nge an nih ang le? India ram dinhmun enin socialist kalphung leh thil tum tam tak chu ṭha an ti a, nimahsela, sakhaw zalenna awm lohna one-party dictatorial socialist kalphung ni lovin mipui rorelna leh sakhaw zalenna socialist secular democracy kalphung an thlang niin a lang.

Chutichuan, Indiaah chuan eng party pawhin sawrkarna siam se la, central leh state sawrkarte chuan socialist secular democracy policy kalpuiin India khua leh tuite social and economic intluktlanna an ngai pawimawh hle a; chumi atan chuan ruahmanna ṭhate siamin budget pawh tam tak an dah ṭhin. Hnam tê zawk leh hnufual zawkte leh sakhua member tlem zawkte chu khua leh tui dangte dinhmuna an din ve theihna turin an tan quota, reservation, concession leh scholarship, etc. siamsak a ni. Khua leh tuite social welfare ngai pawimawhin, damlote leh miretheite ṭanpuina leh chhawmdawlna program chi hrang hrang a nei a; essential commodity – buhfai, cooking gas, electricity, tui, etc. subsidy a siam bawk. Chu chauh a ni lo, India hian theihna dang nei (differently-able) leh hmeichhiate humhimna leh an dinhmun chawikanna program pawh a nei ṭha hle. Roreltute thlanna thlengah hmeichhia leh hnam tê zawk leh sakhua member tlem zawkte tan reservation a awm leh zel a ni.

Heng hamṭhatna zawng zawng hi socialist democracy ram kan nih avanga kan hmuhte leh kan neihte a ni. Capitalist democracy ziktluak ram ni ta ila, heng tianga hnam hnuhfual, sakhua member tlem leh miretheite tan hamṭhatnate hi kan hmuh a rinawm lo. Chuvangin, keini anga hnam tenau leh hnufualte tan chuan India anga socialist democracy rama kan awm hi kan vannei hle. Chutih rualin, sipisiala enkawl ngai hnam hnufual tribal nih reng erawh tum lo ila, tuna kan dinhmun hi ṭhansan a, hma lam pan kan tum tur a ni.

Socialism kalphung hi Kristian zirtirna nen pawh a inzui ṭha hle. Isua kha thlarau chhandamtu a nih rualin tunlai khawvel aṭanga thlir chuan, a nun, a thil tih leh a zirtirnate ngaituahin social activist dik ber, ṭha ber leh chak ber a nihna lai a awm. AD kum zabi pakhatnaa din tawh Kristianna chu kum zabi 19-a din socialism aia upa zawk a ni a, chuvangin, socialism policy hian Bible leh Kristian zirtirna tam tak a entawn ti ila kan sawi sual em em lo ang. Socialism hmuchhuaktu Marx, Lenin, etc. te kha Bible leh Kristian zirtirna hria an nih hlawm avangin.

Kohhran a din tirh laia an khawsak inrelbawl dan kha Kristianna leh socialism inanna langsar ber pakhat chu a ni awm e: “An zîngah tu mah tlachham an awm lo. In emaw, ram emaw nei apiangin an hralh a, a man chu an rawn keng a. Tirhkohte hnênah an hlân a, an châkkhai daih ṭheuhvin an insem ṭhîn,” (Tirhkohte 5:34-35). Nimahsela, hetianga tih zel chu tlin reng a har a ni ang, monasticism ho tih lohah chuan a hnua kohhrante zingah hetiang ang ema titu hmuh tur an awm tawh lo. Engpawhnise, socialism kalphunga kan hmuh mipui neihna, insem rualna, rethei chhanchhuah leh intluktlannate hi Kristian zirtirna laimu la ding rengte an ni.

Kristian zirtirna leh socialist policy inanna Bible bung leh changte tam tak zingah tlemte tarlang ila: “Leilung leh a chhûnga thil awmte hi Lalpa ta a ni a, khawvêl leh a chhûnga chêngte nên hian,” (Sam 24:1 ref Exodus 19:5; Deuteronomy 10:14). “Hnam tin hlima lâwmin au se, hnam tinrêng chungthu chu dik taka rêlsakin, mi tin i kaihruai si ṭhîn a,” (Sam 67:4). “Juda leh Jentail, bâwih leh bâwih lo, mipa leh hmeichhia a awm chuang tawh lo, Isua Kristaah chuan in zain pumkhat in ni,” (Galatia 3:28). “Lalpa, retheite chu i ṭan ṭhîn tih ka hria, pachhiate tân dik takin ro i rêl ṭhîn,” (Sam 140:12). “Mahni tâna sawi thei lo chu sawisak la, baihvaite pawh chhan rawh. Retheite leh pachhiate thu chu dik takin rêlsak ṭhîn ang che,” (Thufingte 31:8-9). “Ruai i ṭheh hun chuan pachhia te, piangsual te, kebai te, mitdel te sâwm zâwk ang che; tichuan, malsâwmna i dawng ang, rulh vena tûr che an nei dâwn si lo va; mi felte thawhlehnaah chuan rulh leh i ni dâwn nia,” (Luka 14:13-14). “Thil ṭha tih leh inṭanpui tawn hi theihnghilh suh u, chu chu Pathian lâwm zâwng inthawina chu a ni,” (Hebrai 13:16).

USA President hlui Harry Truman chuan, “Politician a nih avanga hausa min hmuhtir u la, rûkru ka hmuhtir ang che u,” (Show me a man that gets rich by being a politician, and I'll show you a crook) a ti a. Eiru lova a chanvo dik tak chauh a dawn chuan politician tan chuan hausak theih a nih lohzia a sawi a ni. A dik hle. Tripura Chief Minister hlui Pu Manik Sarkar kha kum 20 lai Chief Minister ni mah se, a hausakpui lo (https://www.ndtv.com/india-new...).

Kan ram politiciante pawh hian anmahni intihhauhsak tum loin, an kaihhruai ram hi ram intodelh nihtir tum zawkin, ram hmasawnna tur leh miretheite dinhmun chawisanna tur programme-te an duang tur a ni. Anmahni politician-te leh a ngheta sawrkar hnathawk an eikhawp hlawhte hlawh tipung lovin, an khamkhawp hlawh lo, ni tin inhlawh kuthnathawktute hlawh leh casual leh contractual worker-te hlawh an tipung zawk tur a ni. Kuthnathawktute thil siam, ran vulh leh thlai tharte market an ngaituahsak tur a ni a, sawrkar pawhin leisakin a zuar chhawng ṭhin tur a ni. Chungte chu socialist democracy rama hruaitute rilru put dan tur leh ram hruai dan tur dik leh ṭha chu a ni.

Mizorama cheng tam zawkte chu Kristiante kan nih hlawm avangin India socialist democracy thurin zâwmtute chauh ni lovin, Christian socialist democracy thurin zâwmtute kan ni tih kan hriat reng a ṭha. Kan ram hruaitute pawh Kristian an ni vek a, chuvangin, hmathlir ṭha nei a, rorelna a dik chuan Mizoram hi tu mah tlachham lo a, social leh economics-a ram mipuite intluktlanna ram ni turin kan siam thei a ni. Chu chu Mizoram anga socialist democracy rama Kristian ram hruaitute leh ram fate rilru put dan tur leh rawngbawl dan tur dik leh ṭha chu a ni e. 

- Laiu Fachhai