DEEPSEEK (Khawvel nghawrnghingtu artificial intelligence model chhuak thar ber)

DeepSeek chu eng nge ni?

Deepseek chu tunlai thiamna sang tak hmanga kan hriat duh hnehsawh leh rang taka internet khawvel zau taka zawng hmu thei Large Language Models (LLMs) advanced artificial intelligence (AI) chi khat, Chinese researcher/company kutchhuak a ni. Deep learning techniques hmanga open source nena siam a ni. Chinese funding company High-Flyer hnuaiah independent AI research lab-in a awm mek. Ṭawng hriat theihna (natural language processing), milem aṭanga thil zirchianna (image recognition) leh hna khirh leh harsa zawk thawk thei turin AI model thar a ni ber e.

Kum 2022-a OpenAI’s ChatGPT an release khan Chinese tech firm-te chuan AI chatbots el tur leh AI lama US lehpelh ngei tuma ṭan la nghalin, July 2023 khan Zhejiang University aṭanga zir chhuak Chinese mi Liang Wenfeng-a chuan Deepseek hi a rawn siam ta a ni. Version hrang hrang–DeepSeek Code (2 Nov 2023), DeepSeek LLM (29 Nov 2023), DeepSeek-MoE (9 Jan 2024), DeepSeek-Math (April 2024), DeepSeek V2 (May 2024), DeepSeek V3 (Dec 2024) an release tawh. 2025 January 20 khan version thar ber DeepSeek R1 an release leh bawk. Apple Store-ah download hlawh ber a ni.

A rawn lar tak hluai chhan ber pakhat chu AI model dangte’n an neih ve loh zawhna chipchiar leh kimchang zawk chhan theihna cutting-edge deep learning techniques a hman vang te, man tlawm tak leh hman awlsam tak a nih vang a ni ber. China President Xi Jinping chuan thawmhnaw, furniture leh advanced tech–chips, electric vehicle thlenga an hman ṭangkai tur thu a puang. Advanced chips tlemte hmanga siam, man tlawm leh hman awlsam tak si a nih avangin chips siamtu lian American multinational technology company Nvidia stock market $600 billion (£482bn) laiin a tlakhniamtir. US history-a ni khata hloh hnem ber record a ni.

Feature langsar zualte

Thil a zawn hian a mil chiah (match keyword) bakah a kaihhnawih AI model pangngaite’n an zawn phak loh nen a hmu vek thei. Entir nan: Hlawk zawka thlai chin dan zawt ta ila, AI model tam zawkte’n kan zawhna thu mil awmna chauh an rawn sawi aia chipchiarin thlai chin dan report, technical breakdown bakah social media hrang hranga thlai chin dan hlawk zawk an post leh sawihona ang chi thlengin a zawng chhuak thei. Thu chauh bakah milem leh video hmangin zawhna a chhang thei bawk. Source hrang hrang structured database, unstructured document, news feed, social media aṭangin data a lak khawm theih bakah AI model dangte’n a thlen phak loh deep web thlengin a zawng chhuak thei. Rang takin a phuah khawm a, information chipchiar tak a pe thei. Economic data chhui ta se Google/AI model-te’n surface web huam chhunga mi bak an zawn theih loh laiin Deep web thlengin government database, mithiam lehkhaziak, sumdawnna chet vel dan leh social media aṭangin data a zawng hmu thei.

Venhimna khauh tak hmangin data a zir chiang thei. Data him lo rang takin a hre thei. Hei hi internet khawvela thil pawimawh ber pakhat a ni. Pawisa kaihnawihah data lak khawm leh za him leh him loh zir chian nan a ṭangkai hle. Data him lo a awm chuan information rang takin a thawn thei a, venhim dan a hrilh thei nghal bawk. Data maktaduai tel aṭangin rang tak leh dik tak siin duh zawng a la chhuak thei. Tih dan phung ṭha zawk leh rang zawk hmangin chipchiar takin a zir chiang thei. Hei hian hun kal mek hma lam hun dik taka thil hriat theihna a neih phah. Internet kaihnawih pawikhawihna thleng thei ang chi-ah log file, news article leh online report ṭhahnem tak rang takin a chhui thei a, cyber-attack a awm chuan rei lo te chhungin hmu nghal a, cybersecurity team-te’n invenna hun an neih theih phah.

Industry/sector (cybersecurity, finance, healthcare, or government) atan a siam rem theih. Regional news, official statement leh social media-a mipui rilru put hmang hre chiang turin government agency-te’n an hmang thei. Hei hian sumdawnna tlakchhiat lakah leh ram buaina tur thleng thei a hrilh lawk thei. Khawvel hnam hrang hrang ṭawng leh nunphung a hrethiam a, hei hi Deepseek danglamna lian tak a ni. A bik takin data lian tham zirchiannaah English ṭawng chauh ni lo, ṭawng hrang hrang a hriat thiam avangin zir chian duh kaihhnawih zawng zawngte la khawmin a phuah khawm thei. Ram hrang hrang hriselna chungchang zir chian nan English bakah Chinese, Spanish leh Arabic ṭawnga siam report pawimawhte a la khawm vek a, uluk taka a zir chian hnuah report kimchang tak a siam thei.

Ram dangte’n kan hmang ve thei em?

An siam chhan leh focus ber chu China ni mah se, khawvel huap data protection law leh cybersecurity regulation fel tak a awm sa a, hemi mila siam tho a nih avangin AI dangte ang bawkin a duh apiang tan hman theih a ni. Enchhinna (pilot project) uluk tak neih a ngai thung. Vendor certification a awm a, hetah hian independent audit or security accreditation tarlan a ni. International security standards nen a inmil a nih chuan a him.

A him chiah em?

Venhimna ṭha tak tel lo chuan data privacy & security-ah harsatna a awm thei. A ṭha lo zawnga hmang duh tan mimal leh sorkar company rûk chhuah theih a ni. China tan buaina awm lo mah se, ram dang tan erawh foreign technology hman hi risk a sang hle. Data protection standard rintlak tak leh vendor rinawm tak neih erawh chuan harsatna a awm lo tura ngaih a ni.

Eng vangin nge USA-in bengkhawn em em?

China-in hetiang AI model thil ti thei tak a siam chhuak hi social media leh TV news channel-ah viral nasa hle. Mithiam ṭhenkhat phei chuan Deepseek hi US leh a thurualpui ram hrang hrangte tan a hlauhawm chho hle thei turah an ngai. US pawhin a enliam mai mai thei bik lo niin alang. AI model dangte aiin chak zawk leh him zawkin data tam tham tak economic report leh cybersecurity data thlengin ching let thei a. Hei hian market trend, security threat leh technology lamah China hi rang takin thutlukna a siamtir thei dawn. Hetiang hi US-in a siam chhuak vat thei lo a nih chuan US el phak lohvin China hian nasa takin hma a sawn phah ang.

Cyber security lamah digital network-ah thil kalphung leh dinhmun hlauhawma a awm leh awm loh rang takin a hmu chhuak thei. Network logs, social media chatter leh global threat report maktaduai la khawmin rang takin a zir chiang thei a. Chinese cybersecurity agency rang taka thu thawnin, thil thleng tur dawnsawn dan leh invent dan a ruahmansak thei bawk. China network system him taka a ven theih laiin ram dang network him lohna lai a chhui zung zung thei dawn. US leh a thurualpui ramte aiin invenna a nei ṭha hle dawn a, US inbuaina lian tak a tawh laiin China erawh a inveng hman zel dawn tihna a ni.

Economic & strategic planning lamah deepseek hian AI model dangte’n an tih theih loh ram hrang hrang data volume tam tham tak rang takin a la khawmin duh tawkin a zir chiang thei. Hma lam huna economic leh politics inlumlet tur rang takin China sorkar a hrilh lawk thei dawn. Ram dang hriat phak loh a hriat theih dawn avangin China hian khawvel hi a la thunun thuai an ring. Thil ti thei fâl lutuka China a awm chuan khawvel digital leh economics balance a tichhe thei dawn bawk.

A ṭhatna

OpenAI’s GPT model aiin hman a awlsam a, senso a tlem bawk. AI industry (OpenAI, Google, Alibaba, etc) tan competition ṭha tak a ni. Alibaba chuan Qwen 2.5-Max an tlangzarh nghal der mai. US leh western country AI chauhva innghat lova khawvel ram dangte pawhin an siam thei tih a pho lang. US siam AI chips man to tak taka lei ngai lova senso tlem zawka lei theih a ni. China, Japan leh Korea te chuan anmahni ṭawng ngeiin AI an hmang thei a, ChatGPT leh Google Gemini aiin a duh zawk.

A ṭhat lohna

Phalna nei lova open AI model awm sa entawna Deepseek model hi training pek a ni tiin an puh. User data leh document pawimawh a la khawm ṭeuh thei si a, ram ṭhenkhatte chuan hengte hi China sorkar a ruka a pek zel an hlau. Texas sorkar chuan a khap nghal hmiah. Chips man tlawm takin an siam theih avanga stock market-a a rawn sang thut hian US ram AI company (Nvidia leh OpenAI partner) chips siam man to tak taka an hralh ṭhin kha a vaw chhe dawn. Global tech stocks-ah $ 1 trillion lai an hloh der tawh. Hei bakah Deepseek hian khawthlang ram leh khawchhak inkarah inelna nasa zawk a rawn thlen nghal a. US President Donald Trump-a chuan AI lama China lehpêl turin US company-te fuih nghal. US leh China ralthuam leh politics inlaichinna pawh a nghawng thui thei hle tura ngaih a ni.

India sorkar lam ve thung

India ramah pawh boruak a nei lian nghal hle. Innovative technology lama tui tak IT Minister Ashwini Vaishnaw chuan AI model man tlawm tak hi India IA invesment atan hman ṭangkai a tum hle a; kum 2025 chhung ngeia India-in generative AI model siam a tum thu a sawi. Data privacy leh sovereignty issues-ah he foreign-developed AI model-te hian India mipui leh sorkar data a rûk chhuah loh nan venhimna ṭha tak nen India pawh a inbuatsaih mek bawk. China hi an fing khawp a, an ram hmingchhiatna leh him lohna tur ang chi a nih chuan DeepSeek AI model hian engmah a sawi duh lo. India leh China ramri issue te, 1962 Indo-Sino War ang chite hi han zawt ta se, "Sorry, that's beyond my current scope. Let's talk about something else," a ti daih zel tiin reporter-te chuan an sawi.

Engpawhnise, AI khawvelah kan cheng mek a, khawchhak leh khawthlang ram inelna a sang hle. Deepseek hian AI model man tlawm leh hman awlsam siamna kawngah digital company-te chak zawkin hma a laktir ngei dawn a; kuminah pawh AI model changkang, man tlawm zawk a rawn chhuak ngei ang. Keini Mizo mipui leh sorkarte’n kan hlâwkpui thiam phawt chuan zirna, sumdawnna leh ram inrelbawlnah a ṭangkai hle ang.

- Er. Chhungpuia Rethlei

Senior Technical Officer, NIELIT Aizawl