MNF party-ten politics khelh nan VC Association an hmang em?
Mizoram sawrkarin VC term a pawh tawi chungchangah MNF party-in hruaitu pawimawh zawng zawng deuh thaw an chelhna All Mizoram VC Association chuan an kher nasa ngat ngat viau nâ a, an hlawhtling ta lo va. Gauhati High Court Aizawl Bench chuan a lo hnawl a, sawrkarin thiam a chang ta tih kan hre tlang awm e.
ZPM sawrkarin VC term a pawt tawi kha a ṭha nge ṭha lo, a dik nge dik lo tih chungchangah ngaihdan nei tho mah ila, ka sawi tum a ni lo va. AMVCA ten sawrkar an khinna chungchang hi ka sawi tum zawk chu a ni a. Ka sawi châk deuh tlat!
AMVCA ten sawrkar an khinnaa thil kal vel dan ka thlir hian MNF party-te'n AMVCA hi politics khelh nan kaihbu atan an hmang niin ka hmu. A chhan min zawt maw? Ka'n sawi ang e.
1. Mi sawi ka hriat danin, AMVCA President hi MNF mi leh sa a ni a, MNF aṭanga VC atana thlan tlin a ni. Hruaitu dang zingah pawh MNF an tam ber an ti. Kum 2020-a VC inthlan rûnpuiah khan state sawrkara rorel lai MNF party an chak ber a, VC an ngah ber avangin AMVCA hruaitua an tam ber pawh hi a âwm viau. VC pawl pawh MNF-in an thunun a, chuvang chuan MNF party duh dan angin VC term pawh tawi chungchanga sawrkar thutlukna kha an kher ta ngat ngat mai niin a lang. Congress, BJP leh PC party lam chu an inrawlh lem lo a nih hmel e.
2. AMVCA ten sawrkar an khinnaah khan ukil atana an hmante kha MNF mi leh sa an ni fur. An ukil mi panga emawni te kha MNF mi leh sa vek an nih leh nih loh chu ka hre lo. Mahse, a hotu bera ngaih Pu C. Lalramzauva chu MNF Gen.Hqrs. lama hruaitu pawimawh tak, vawi eng emaw zat MLA inthlana candidate ni tawh a ni a. Pu J. Malsawmzuala pawh MNF Publicity Board lama Vice Chairman a nih bakah, kum 2023 MLA inthlana tuna Chief Minister Pu Lalduhoma khingtu a ni.
3. AMVCA ten sawrkar an khinna leh a kaihhnawih thil hrang hrangah hian MNF Gen. Hqrs. lam mite an inrawlh nasa viau. VC pawlte thu leh hla thehdarh kawngah pawh MNF party mite an phusa hle bawk. Congress, BJP leh PC party lam an inrawlh vak lo tlat.
4. Sawrkar an khin hneh loh hnuah AMVCA President-in press conference a nei zui a (a zak lo ka ti). Kha press conference neih chungchangah leh a thu leh hla thehdarh kawngah pawh MNF party mite pawh an inrawlh viau bawk.
Heng point-te hi han thlir ila, VC term pawh tawi High Court-a khingtute kha AMVCA ni mah se, a bul tumtu tak tak chu MNF party an niin a lang tlat a ni. Chuti a nih chuan a awmzia chu, VC leh LC inthlan turah hian AMVCA hi MNF party hovin politics khelhna atan an hmang tihna a ni ber. MNF party hian an ṭhatpui dawn nge, an chhiat phah zawk dawn tih chu hunin a la rawn hrilh ang chu.
- Lalhlanpuia