Mipui manganna sukiangtu – ruang phurhna sum budget-a dah

ZPM Ministry chuan budget an pharh tirh phat aṭangin ruang phurhna sum budget-ah an dah ta a. He system thar hian MLA-te phurrit a chhâwk zângkhai hlein a rinawm. Kum rei tak kan politics kalpui danah kan MLA-te ko a rit thei em em a, damdawi ina awmna sum thlengin MLA-te’n mawhphurhna an lâk châng a awm ṭhin. Vanduaina tâwpkhâwk–thihna a thlen phei chuan ruang thawn chhuahna tur sum chu bialtu MLA tum turah kan dah hmak tawh mai ṭhin a, hei hi kum rei tak kan kalphung nghet a ni tawh. Zan tairêkah pawh bialtu MLA kaihthawh ngaih châng a awm fo. Thingtlang khaw hla tak taka ruang phurh chhuah ngaite chu sum sên a sâng ṭhin hle a ni.

ZPM kaihhruai sawrkar chuan ruang thawn chhuahna sum hi kum 2024-2025 budget-ah cheng vaibelchhe 5 a dah a, nikum 2024 September thla tir aṭang khan sawrkarin mawhphurhna a la ṭan a, 6.02.2025 thlengin ruang thawn chhuahna sum atan hian vaibelchhe 2.33 pek chhuah tawh a ni. Vaibelchhe 2.33 hi mi 238 ruang phurhna man a ni a, ruang phurh man dilna lut zinga 83 chu pek chhuah a la ni lo thung. He ruang phurh dilna hi online-a dil theih tura buaipui mek a ni bawk.

Ruang phurh denchhenin MLA hlawh tihsan a lo ni tawh

MNF Ministry hunah khan ruang phurhna atana MLA-te sum sên tam lutuk chhâwk zângkhaina turin hlawh tihpun a lo ni tawh a. November ni 21, 2019-a Mizoram Assembly thasik ṭhutkhawm an neihah khan MLA 40-te hlawh chu 130.77% laia tihsan niin, MLA pangngai thlakhat hlawh chu Rs 65,000 aṭangin chu Rs 1,50,000-ah an tipung tih kha kan la hre ṭheuh awm e. MLA hlawh tihsan a nih hma khan Speaker-in MLA fund aṭanga morgue van lei theihna turin rules a siam danglam a, mahse, awmzia a nei vak lo nge ni, hlawhsanna bill chu pass a ni ta tho.

ZPM Ministry erawh chuan kalphung thar, system thar duang chhuakin, kawng thui dan azirin rate a siam a, budget-ah ruang phurhna tur sum a dah thung. He system-ah hi chuan MLA-te’n mawhphurhna an nei ta lo a, an pocket aṭangin sum a hêk tawh lo a, opposition MLA tan a chhenfakawm zual hle a ni. He system hi a fel famkim bik kher lo mai thei, mahse, ruang thawn chungchanga system kalpui chinah chuan a la zia berin a lang.

MLA-te mawhphurhna eng nge ni?

MLA-te mawhphurhna bulpui ber chu legislator an nih ang leh Indian Constitution Seventh Schedule (Art 246)-in thuneihna a pek angin State List (List-II) leh Concurrent List (List-III) huam chhunga dan siam hi an hna pui ber a ni. Financial power ni se state treasury sum hman tur zawng zawng pawmpuitu an ni a, Money Bill an pass a ngai. Executive power lamah chief minister leh council of minister-te chêt lakna kawng hrang hrang an control thei a, no-confidence motion an tel lova pass a ni thei hek lo. Executive hmalakna hrang hrang control turin MLA-te hian question hour, cut motion leh adjournment motion-te an exercise thei bawk a. A nihna takah chuan Executive hmalakna zawng zawng hi MLA-te control-na hnuaia awm a ni. Indian Constitution siamṭhat hna thawk turin state tinte MLA approval lain Parliament-in a amend ṭhin a, President of India thlanna pawh an kuta innghat a ni. Hei bakah hian ram leh hnam tan hmasawnna ruangam din te, ram mipui harsatna tawh chinfelte hi an mawhphurhna a ni.

Kum rei tak kan kan lo kalphung nghet chu–damlo kan, ruang thawn chhuahna sum tumsak, mitthi ina kal tam, ruang zawn leh mibo zawn, etc. hi kan MLA-te mawhphurhna leh tih turah kan lo ngai nghet tawh ṭhin. Chhiatni ṭhatnia an inlan tam loh chuan MLA hawihhawm lo, phungthlu lo leh bial mipui ngaihsak lo nih an hlawh letling hlauh si a; MLA ṭha leh ṭha lo kan tehna hmanrua ber pakhat a ni ṭhin.

Kan aiawha hna thawk tura kan thlante hi chuan an rilru, hun leh thâ sêngin kan ram tana dan ṭha zawk duang chhuak tur leh hmasawnna ruhrel duang chhuak turin hun thâwl zawk pe ta ila; kawng hrang hrangah pawt buai lovin phût buai lo bawk ila hma kan sawn phah zawk ang em tih hi ngaihtuah ngai tak a ni. Amaherawhchu, system nghet tawh vawi leh khata thlak thawk thawk theih a nih lohzia erawh mipui hian kan hrethiam vek awm e.

Kan kalphung nghet tawh thlak danglam tur hi chuan sawrkar hian system ṭha a duan chhuah a ngai ṭhin. Tunah pawh MLA-te phur tirittu ber ṭhin ruang thawnna sum chu sawrkar-in budget-ah a dah ta hian MLA-te eirûkna thlengin a sut kian a rinawm. Ruang thawnna atana sum sên te, damlo kanna atana sum sênte a tam tham poh leh MLA-te’n kil hrang hrang aṭanga an sen ral hmuh let (recover) an tumna a nasa ṭhin a; mipui sum tláng a heu phah leh ṭhin tih kha kan hrethiam awm e.

Budget-a DAH hi mipui phurrit chhawk zangkhaitu

Dam lohna leh thihna pumpelh thei tu mah kan awm lo a, vanduaina hi thlasik anga khél lova thleng ṭhin a ni. He manganna hunah hian chhung tinte hian thlamuanna kan mamawh ṭhin. Ram changkang apiangin policy an nei ṭha a, mipuite’n security an neih ṭhat vangin an thla a muang ṭhin. Kan ramah erawh mipui phurrit chhâwk zângkhaitu scheme hi a beitham hle ṭhin a, hei hi kan retheih vang leh kan economics dinhmun chhe lutukin a hrin chhuah a ni.

Damna duh vangin neihthinglung kháwngin hmunpui damdawi in ṭha kan pan hram hram ṭhin a, mangan tâwpkhâwkah bialtu MLA kan pûr leh ṭhin. Chutah vanduaina kan han tâwk a, chhungkaw pa berin zah pawh dáwn lova MLA-te hnena khawngaih a dil hun hi a her chhuak leh ṭhin. Tunah erawh chuan ruang phurhna chu sawrkarin min tumsak tawh vangin eng ang vanduaina pawh tâwk ila, kan lungduh ruang dàite’n kan in lum ngei an thlenna turin sawrkarin ruahmanna felfai tak a siam ta hi mipui hian a hlutzia kan hre chiang chho zel turah ngai ila.

Mipui tan budget-ah a lo DAH theih nameuh mai

Traffic jam solve kan tumna PAHOSS scheme atan MNF ministry-in cheng vaibelchhe 100 tél an vawm liam ngam laiin, Mizoram mipuite’n rualkhai taka kan chhawr theih ruang phurhna sum ZPM ministry-in budget-ah a dah ngam ve thung a. Congress leh MNF ministry-te’n a thlawna sem tur NLUP sum vaibelchhe 3,000 lai leh SEDP sum vaibelchhe 1,000 lai budget aṭanga an ruahman ngam laiin, ZPM ministry chuan kut hnathawktute thlai thar leina tur budget-ah kum khatna atan vaibelchhe 200 a dah ngam nghal bawk. Ruang thawn chhuahna budget-a dah bakah, health care system ṭha taka kalpui chho leh turin beisei bawk ila; mipui thlamuanna thlen chho zel turah ngai phawt mai teh ang.

Ruang phurhna tur sum budget-a DAH theih a nihzia kan hre ta a; thlai thar leina pawh a DAH theihzia kan hre ta bawk. A kum khatna hmel kan hmuh awrh ZPM ministry kalphungah hian engkim hi a felfai duak duak bik dawn lo a, fûr laia kawng siam tura nawr vak vaktute au thâwm kha ṭhál a lo thlen meuh chuan thereng vuak thlak ang maiin a reh ta hmak a, alkatra rim vangin an ká an hup a ni mahna.

Leibá bâk hnutchhiah lotute khan ZPM ministry naupang tê hi engkim tifel nghal duak turin an han nawr ta ngat ngat a. An leiba hnutchhiat health care bill, electric bill, pension, etc. bâ chu ZPM sawrkar chuan a lo pe chho mawlh mawlh a; kawng tinrengah sum inremchenna chuan rah ṭha a chhuah chho zel a. Mual lehlama khawh lut zur zur, liam zur zur, mi tlemtê bakin an thàl ve theih loh khurpui ang kha hmuh tur a awm ve ta lo ringawt pawh hi Zo fate thlamuanna thlentu a ni.

Mi hausate vawk chaw leh ar chaw atana ration kaltlanga sum sen thlawn ṭawk ṭawk te, MR bill dik lo tak tak te, electric bill pek ṭhat loh vanga sum chawi ṭawk ṭawkte pawh a kiam chho ta zel a. Delhi drip khaia kutdawh rilru kan put rengna hi paih bo chho zel ila; keimahni thawh chhuah aṭanga theihtawpa intodelh tuma hma kan lak chhoh hi kan ram leh hnam zahawmna tur dik tak a ni.

Mipui nawlpuite’n rualkhai taka kan chhawr theih ruang thawn chhuahna sum budget-a dah bakah hian, mipui tana chhawrnahawm system thar ṭha dang hi kan sawrkar hian a duang chhuak chho zel turin beisei phawt mai ila. Ram mipui sum hi dik tak leh daihzai taka hman a nih zel chuan rah duhawm tak a chhuah zel ang. ZPM chunga mipuite’n rinna kan nghat ngam ang chiah hian, ZPM ministry pawh hian mipui rin ngam ang ngeiin hna an thawk ang tih beisei phawt mai teh ang.

- Lalnunmawia Pachuau