VC/LC member atana ka duhthusam
1. VC/LC hi eizawnna emaw, sum tuakna emaw ti lo, mahni tana pawisa siamna tur remchang dap ru tlat reng ṭhin lo tur leh hausakpuina tur lo, intihlar leh intihpawimawhna tur ni lo, tlawmngaih chhuaha veng nu leh pa nih huama inpekna a ni tih hria.
2. VC/LC nihnaa lungawi tak leh ṭhahnemngai taka eng kawngah pawh rintlak leh nun hmang mi. VC/LC hi MLA kailâwn a ni thei tih hriaa engkima phûr taka thawk mi.
3. Mi chi hrang hrang, a tê ber aṭanga a lian ber, rethei ber aṭanga hausa ber, rui ṭhinte leh pastor thlenga nêl ngam, fiam ngam, engkim zawh ngam leh hauh bawrh bawrh ngam.
4. Zan men rei leh zing thawh hma ngaia nei thei mihring. Khawsak dan, nun dan leh ṭawngkama inla high lo, chapo lo chhungkuaa mi.
5. Englai pawha electric êng leh êng lo ngaihven reng peih, department hnena report zat zat a, mipui hnena information pe zung zung thei.
6. Electric lama veng bil hmasawnna tur ngaihtuah thiam pha; transformer volt sang zawk neih leh dah belh dan leh thil dangahte kawng dap thiam.
7. Veng chhung tui sem kawnga ṭan lak thiam leh information pe zat zat ṭhin. Tui leak leh mimal tui tibaw nasa lutuk ṭhin report ngam.
8. Veng chhung kawng ngai pawimawh.
9. A taka ui khuahkhirh ngam. Ui leh a neitu laka na taka action la ngam. Mahni compaund pêl leh mi dang tibuai ṭhin ui suat rawt ngam.
10. Faina kawnga tih tak zeta hma la ngam; kawra ṭawih thei lo paih chingte hau ngam.
11. Pêm thar te, refugee te, foreigner leh hnam dang reng reng nungchang ṭha zirtir ngam.
12. Zahna nei map lova ruih hmang leh mi hnawksakte leh mi chapote huai taka khak ngam.
13. Engkima a ngaihna hria, office leh officer dawr ngam leh dawr dan thiam. Officer leh mi tu pawh, sawrkar thu neitute nêk ngam leh hau ngam.
14. Veng chhunga awm nghet ngei kan nihzia hriatpuina, residential witness hi veng chhunga awm nghet ngei kan ni tih an hriat chuan, a lehkhain emaw, form awm saah emaw an sign mai tur a ni. Stationary man vel atan tlem azawng an lak chu thuhran, kan hmanna tur azira pawisa min chawitir ṭhin hi tih loh tawp tur a ni. An sign chhan kha kan thil tih tur lama an thuneihna ni lovin, an khua leh tui kan ni tih hriatpuina mai a ni. Keini’n chu lehkha chu kan duh duhnaah kan hmang ang a; kan hmanna tur min zawh ziah hi a ṭul lo. Vai permit siam nan te, mi bail nan te, dawra thil man bat nan te, nupui zawn nan leh nupui rûk nan emaw, zu man bat nan thleng pawhin kan hmang ang chu.
15. Engkima rilru hrisel neite hi engkimah an rintlak a, engkimah innghahna tlak an ni e.
Hetiang mi hi kan khua/veng ṭheuhin kan neih theih nan kan vote hlu tak hmangin fimkhur takin vote i thlak ang u aw.
- K. Hmingthankaia