Mizo Kristiante kan rinawm em?

Theological College-a hna kan thawh hian kan zirtir-tute hian mi en zui ngai lo. Kan hna chanpual ṭheuh chu kan thawh ṭhat leh chhiatah a mawhphurtu kan ni a, rinawm takin kan mawhphurhna kan hlen em tih chu mahni kan inzawhna a ni ṭhin.

Mizoram Kristian ramah hian Kristiante hian kan hna leh kan mawhphurhna hi rinawm takin kan puitling em tih hi inzawt ta ila, kan chhanna pek chu a inang lo thei hle awm e.

Sorkar hna leh NGO a nihna pawi-mawh tak tak chelhtute hi Lal Isua din Kohhranah pawh nihna pawimawh tak tak chelhtu an ni. Kohhran bel miah lo leh inkhawm ngai miah lo hi chu a tlem zawk kan ni ang. Kristianna aṭanga thlir chuan kan ram hi eirukna leh hlemhletna hrang hrangah hian zaa sawmriat tal chuan fihlim tura ngaih kan nih lai hian kan fihlim lo tih hi kan nih dan a ni tlat.

Sorkarin ram hmasawnna tur Project lian tak a kalpui dawn a, tute huan leh ram emaw chu tihchhiat a ngai ṭhin. Chung mite hnenah chuan zangnadawmna pek a han ni dawn a. Tun hmaa huan leh ram nei nia kan hriat lohte khan ram an lo nei sup sup a, Sorkar hriatpuina document leh LSC/ House Pass te an lo nei dim diam a. Ṭhenawm khawveng te pawhin an awih loh leh mipui pawhin kan rin loh a ni - an ram neih chu. Chung mite chu han belchiang ila, Sunday Sikul zirtirtu, Kohhan Upa leh sakhaw mi em em te an lo ni leh tlat zel. Eng Kristian nge kan nih?

Kan Politician leh MLA te hi mipuite hian mi rinawm (faithful) niin kan hmu em? Kan thinlung chhung ril ber ah chuan kan MLA te leh Politician te hi eiru turin kan beisei vek em? Thiam taka eiru a, an thiltitheihna leh an hausakna zar zo tum Kristian chu kan ni em?

Kan rilru put hmang hian Kristian rinawm tak nih a retheih nge kan thlan Kristian dik em em lo, mi tih ang ti ve zela hausa ve thuai thuai duh? A langsar laia rinawm hi nge lang lo chung pawha Lal Isua thuawih vanga rinawm tlat hi hlu zawk? Mi min hriatpui loh leh tu chan ai mah tihek loa engmaw lo fanghma no ei hi rinawmna nge rinawm lohna? Dik taka nun hi mawlna nge mi pawisawina?

Mizo Kristiante hi khawiah tak nge kan din? Lal Isua’n rinawm tura min tihna hi eng chen nge? Khawi chinah nge kan zawm ang a, khawi chenah nge kan reh bun dawn? Mahni hamṭhatna turah chuan engkim kan tih hi Pathian malsawmna lo thlen dan tur a ni em? Setana malsawmna kan dawng thei em?

Pathian hian tute emaw ‘fair’ vak lo kal tlangin mal-sawmna hi min vur thei em? A chhan-na chu kan rin Pathian i zawt ang u.

- Rinfela Zadeng