KAWNG SIRA MOTOR DAH KHAP

Traffic Management Coor-dination Committee Chair-man, Home Minister, Pu R. Lalzirliana'n Zirtawpni khan Aizawl khawpui chhunga lirthei chêt vel dan chu awmze neia siam tum a nih thu leh, Traffic Management Coordination Committee ruahman angin hman deuh aṭang khan lirthei neitute chu garage fel taka nei tura tih an lo ni tawh thu a sawi a, hei hi khauh taka bawhzui a, a dahna hmun ni lova motor dahte chu man a, pawisa chawitir zel tum a nih thu a sawi. Kawngpui hlata awmten motor dahna an neih ve theih nan hmun remchang laia hmun neite chu man chawia motor dah hawh theihna siam turin Minister chuan a ngen a, hei hi mi rethei zawkte rah beh tumna ni lovin, mi awm thei zawkte motor avanga khawpui tawt lutuk tihziaawmna tur niin a sawi bawk a ni.

Hei hi thil pawimawh tak a ni. Aizawla veng hrang hrangah hian han kal kual ila, kan buaina hi kawng a zim hrim hrim a ni lem lo. Kawng sirah motor, kawng area-ah kan dah nasa lutuk a, Local Council ṭhenkhatin a dah man an lo la thùl. A ṭhenin lungtum, thir tlawn, mau tél leh in sakna hmanraw dangte an lo dah.

A ṭhenin motor chhia, engtikah mah tlan tawh lo tura ngaih, vai damlo ang maiin an lo khuh reng mai bawk si, a buaithlak lutuk a ni. A chang chuan Aizawl khawpui hian enkawltu a nei lo emaw tih tur a ni fo a, AMC kan ti, Pollution Control Board kan ti, Police kan ti... a tu-a-mah hian enkawl fel hi kan tum tak tak lo emaw tih tur a ni a, kan tih ve chhunah pawh 'sorkar hna' fahranin, a fel tak tak palh ang tih hlau ni àwm tak hian kan bei a, veng chhung Road Protection Committee thawh zat pawh kan thawk thei lo emaw tih hial tur a ni.

A duh duhin kawng sirah two wheeler workshop an hawng ringawt a, a chhungah a pantute an leng si lova, kawng area bawk a hnawk leh a. An siam sa en chhinin a mak a maka bengchhengin an ti-ri a, khaptu emaw, zilhhautu emaw an awm lo. A duh duh hi kan duh duhin kan awm emaw tih mai tur a ni a, a zah ngai lo leh zak thei lo apiang, a huangtau leh mi dang pawisa lo apiang hi an che na thei mai a nih chuan, thuneitu tan chuan tih tur a tam hle tihna a ni. Hmun ṭhenkhatah phei chuan kawng sir tuakah motor kan dah a, a karah a intâwkin kan han kal a, a sirah two-wheeler nen, a manganthlak duh khawp mai. Mipui hi thununtu tel lo chuan kan fel ngawt thei lo hle a, thunun te, hrem te kan mamawh. Chutiang a awm loh chuan a hrehawm telh telh dawn a ni ber mai. Tuna Minister thusawi pawh hi thu thar tehchiam a ni lo, a sawi leh invau lai vela duh tâwk, bawhzui si loh thil pakhat ve mai a ni.

Hmun remchang laia hmun neite, man chawia motor dah hawh theihna siam tura Minister-in a ngen pawh hi thil pawimawh leh ṭul tak, mi tam takin an tih mek a ni. Hetah pawh hian ka sawi ve nual tawh. Tunah chuan in hmun nei ṭha ṭhenkhat chu kawng sira in an sakin, kawng àn chungah an cheng a, kawng àn chu anmahni leh mi dang motor dah nan an ruahman ta hlawm nual. A ṭhen phei chuan chhawng hnihte an dah a, pawisa tam tak, hahdam takin an la lût tawh a ni. Engmah uluk leh ngunthlûk taka tih ngai lo, electric, septic tank, tuizem, pindan bang leh engmah ngai lo, a luahtute an ngawi chawi bawk si! Mihring luah aiin a man a tam hma bawk si, a luahtu tan kawng sira dah ngawt ai chuan thlamuang taka mut theihna a ni bawk si.

A ṭha vel vek ringawt mai a ni. Hetiang neite hian tlangval fel deuh, motor khalh thiam kawl tel se, a tihfai, a ke thlâk leh an chhuah dawna a hmaa lo dahte, chhuah loh ṭum pawhin oil thlakte... a tam lutuk... 'sum chang thlai' vek a ni mai!

- RK Lianzuala