'Ka/kan lawm e' ti mai ila

Mizote hi kan ṭawngṭai hian Pathian hnenah kan lawm a ni tih kan sawi/hrilh dan tlangpui chu, 'Lawmthu ka/kan hrilh a che,' tih a ni. Hei hi a ṭha lo hauh lo a, thinlung taka kan ṭawngṭai a nih phawt chuan ṭha reng mai a; mahse, a ṭawngkam erawh a dik tâwk lo!

Kei chuan 'Lawmthu ka/kan hrilh a che' tih hi pumpelh hrâm hrâm ka tum ve tlat a; mahse, mi tam tak tih dan a ni a, ka hriat ṭhan êm avangin han tih ve zauh châng erawh chu ka nei. 'Ka/kan lawm e,' emaw, 'Ka/kan lawm em em a ni,' ka ti mai ṭhin a; hei hi Mizo ṭawngah a dik zawk ka tih vang a ni.

Miin thil min pe a, emaw, min tihsak a; kan lawm a ni tih kan hrilh a, 'Ka/kan lawm e' emaw, 'Ka/kan lawm lutuk' emaw, 'Ka/kan va lawm tak em' emaw (a dangte pawh) kan ti mai ṭhin. 'Lawm thu ka/kan hrilh a che (u)' kan ti ngai miah lo.

Mahse, ṭawngṭainaah erawh chuan mi tam tak chuan 'Lawmthu ka/kan hrilh a che' an ti ta tlat mai a; hei hi chu mi hnenah kan lawm a ni tih kan hrilh (hriattir) ṭhin dan ngaihtuahin, a dik zân lo tlat a ni. Nge, 'Lawmthu ka/kan hrilh a che,' tih hi ṭawngṭaina ṭawngkam bik riauah kan ngai zawk nge maw ni?

Ṭhenkhat chuan 'Lawmthu kan rawn sawi e' te pawh an ti a; hei pawh hi 'Lawmthu kan hrilh a che' tih nen thuhmun ang deuhah a ngaih theih a, a dik tâwk lo. Mi ṭhenkhat phei chuan 'Lawmthu ka/kan sawi duh a' te an la ti ta deuh deuh a! Hei phei hi chu dik lo tak a ni tawh.

Pathian hi hmun tina awm, khawi kipa awm a ni a; ka bul maiah, i bul maiah khan a awm reng. Kan bula mite hnenah, 'Ka lawm e' kan ti mai ṭhin ang hian, kan ṭawngṭai pawhin kan bula awm reng Pathian hnenah 'Ka/kan lawm e' ti mai ila; lawm thu sawi dan dik tak a ni.

A hrim hrimah, 'Lawmthu ka/kan hrilh a che' tih hi chuan han thu uar lehzual dan hi a váng khawp a, hetah hian a tawp deuh tawp mai. 'Ka/kan lawm e,' tih ang chi-ah erawh hi chuan uar lehzuala tihna ṭawngkam a awm nual mai. 'Ka/kan va lawm em' tih te, 'Ka/kan lawm lutuk/tak zet' tih te, a dang pawh a la tam.

Engpawhnise, kan ṭawngṭai hian kan rilru a pawimawh ber a, ṭawngkam hi chu pawimawh ber a ni lêm lo. Chuti chung chuan, ṭawngṭai hi Pathian kan biakna a ni a, ṭawngkam kan uluk ve tur a ni a, ṭawng dik hmanga Pathian biak (ṭawngṭai) a ṭha e. Mi zingah, mi tam tak aiawha ṭawngṭai kan nih phei chuan ṭawngkam kan uluk lehzual tur a ni.

- Kezo