City bus lam bawk

Tun Mizoram sawrkar hi mipui sawrkar a ni bawk a, mipui, a bik takin mi hnuaihnung lam ka nihpuite hamṭhatna leh thawven ve deuhna tur lam leh awlsamna tur lam bakah, mihring kan nih anga nuam tak leh zalen tak, thlamuang taka kan khawsak ho theihna tura nunphung dik leh rilru dik hrisel kan neih theihna tur lam hi chu ka theih chhung chu uar tak leh na takin ka ziak zel dawn.

Smart city-a city bus stand-a ding rei ṭhin lutuk hi chu ka sawi peih tawh lo; sawitu nih bik reng pawh ka zak tawh. Tihian mipuin veivah nana innghahtlak lohah an ngai telh telh ang. Hetiang thunun thei lo sawrkar neih reng pawh hi a zahthlak. City bus-te hi tu thunun tur nge? STA nge AMC, city bus owner association zawk em ni?

Traffic jam tihziaawm nan public transport hman uar tur kan ti. Public transport man tlawm ber leh phur hnem thei ber bus rintlak leh si lo hi eng nge a awmzia? ZPM sawrkar hian kum 5 chhung hian an thunun thei ang em le?

Ni 6.1.2025 chhun dar 11:30 vel khan Ṭhuampui kal turin Zarkawt aṭangin bus-ah ka chuang a; engtik lai mahin bus-ah hian ṭhutna zawn kher emaw, mi min ken kher emaw hi ka duh ngai lo. Hmel tar lam ni tawh mah ila, rilru chu a la tlangval tlat. Mahse, hemi ni kher hi chuan ka nawm loh ve deuh avangin ṭhutna ka beisei ru ve deuh a, ka lâwnna hmasa zawkah chuan kei aia upa âwm hmel ka hmu lo chungin tu ma'n min ken loh avangin ka chhuk leh a. A hnunga lo kalah ka lut leh a, a hmasa ang thoin tu ma'n min kian chuang lo, ka ding ta tho a. Hetah pawh hian kei aia upa niawm chu pakhat chiah ka hmu.

Kawngka bula ṭhu nu pakhat chuan a fa kum 4/5 vel chu a hmazawna pawm ding deuhin, kei chu lo ṭhu ve turin mi ti a, ka ṭhu ta a. Stand dang kan thlen chuan, pian tirh aṭanga kut leh ke ṭha lo (zeng ang deuh) pa pakhat hi tiang nen harsa ti takin a lo lut a. Kan han kal leh thleng chuan tu ma'n ṭhutna an kian ta lo va, ka ṭhutna chu ka kian ta a.

Bus chhunga mite chu a rûk têin ka en kual a. Ka rilrua thil lo awm chu–kan ramah hian chi tin hnam tin kan lut khawm tam ta lutuk niin ka hria a. Mizo nunphung dik tak leh kan society nun mawi tak te, Kristian dik takte nun dan ṭhate hre lo leh, rilru hrisel lo chhungkua leh zilh loh fate hian hmun tin hi an chang tam ta mah mah a nih hi ka ti ta. Aizawla piang seilian emaw, Mizorama piang seilian ngeite nena khawsak ho chu a la nuam hle reng si.

Ramhlun North DIET pêng kan thlen chuan nufate chu an chhuk a, “Pawisa min la kir lo” a ti a, conductor chuan, “Pawisa nawi a awm lo, mi dang pawh ka kir lo,” a ti hmuk a. "Cheng za lai a ni si a," a ti leh a. Titau tih hriat reng hian cheng 50 emaw ni chu a pe sawk a. Nu erawh chu a lawm vak hmel loh. A nih dan tur ni lova cheng khat pawh a rîrala kan rilru nawm loh dan ngaihtuahin, chu nu rilru tur chu ka dáwn zui ta zel a.

Passenger-te’n kan theihnghilh emaw, kan dil lêt zak emaw beiseiin bus conductor-te hian pawisa min kìr loh hi an theihnghilh der ṭhin a ni lo maw? Nit in pawisa kan zawn ṭheuhna ramah hian ualau tak leh langsar tak, chawpchilh taka pawisa duhna tilang huam huam ber chu city bus hi an ni ta ber âwm e ka ti ta a ni.

He bus serial number leh registration number pawh ka hre reng, mahse, tunah ka sawi lo ang.

- K Hmingthankaia