Corporation Chairman te ban la rem rih lo
Tun hnaia pawl pakhat thu chhuah "Corporation Chairman ban rawh se" tih thu kha han inhrilhfiah ngai awmin a lang a, thil chin fel ngai tam tak a la awm a ni tih hre lo tan chuan khatianga han tih mai kha thil awl tak tur a ni. Amaherawhchu, engemaw chen an awm a la ṭul chhan a awm a, chungte chu tawi te tein han sawi ila.
Corporation Account chin fel (finalisation) chung changah: Corporation-te hian audit chhawng thum an hmachhawn ṭhin. Chungte chu: (a) Internal Audit: Hei hi Corporation-in Chartered Accountant appoint-in an audit ṭhin. (b) Statutory Audit: Statutory Auditor hi Comptroller & Auditor General of India-in a appoint ṭhin a, an audit report hi Corporation-in an dawn hnu-ah Accountant General Office-ah copy pek leh tur a ni a, hemi rual hian Board-in a pawmna copy pawh thawn tel tur a ni. (c) Supplementary Audit: Accountant General Audit Wing aṭangin an rawn audit ve leh a ngai a, anni hian an final mai thei bik lova, an report hi Comptroller & Auditor General, Delhi-ah an thawn thla a, anni hian final comment an rawn pek hnu-ah Corporation Board of Director meeting-in an pawm a la ṭul cheu va. Hemi hnu-ah hian Account chu chin fel (finalised) a ni thei chauh a ni. Chuvangin, Corporation Board te hi chuti vut vuta ṭhiah mai hi a remchang lo a ni.
Tin, sorkarin Corporation te hnawk a tih chhan ber a thawktute hlawh pek harsa a tih chu tunah hian Corporation ṭhiah takte tan hian sum pakhat mah Sorkar hian a seng tawh lova, Board Chairman-te hi la awm reng pawh nise Sorkar hian hekna pakhat mah a nei tawh lo a ni. Tin, heng Cor-poration te ṭhiah a nih avang hian Sorkar hian sum a indaih phah dawn chuang lo a ni tih te pawh hi hre tel ila a ṭha awm e. A chhan chu heng Corpo-ration pathumte tan hian Sorkar hian kum khatah Rs. 5 crore pawh a seng ngai lo a, he Rs. 5 crore emaw lek hmang hian Sorkar hian ram ropui min thlen theih a rinawm chuang lo a ni.
Employee-te hmakhua atan: Heng Corporation-a thawkte hian Employees Provident Fund Organisation (EPFO), Ministry of Labour, Government of India an zawm vek a, EPF dan angin thla tin an hlawh (Basic + DA) aṭangin 12% an chhung lut ṭhin a. EPF danah hian 1995 aṭang khan pension theihna dan a awm ve a, hemi ching fel tur hian EPFO - North East Sub-Regional office, Shillong-ah chin fel tur a la tam hle.
Heng Corporation ṭhiah taka thawktute hi Super-anuation pension-a la kal thei lo deuh vek an ni a, a tawi zawngin tih fel tur a la tam hle ti mai ila a dik mai awm e.
Heng bakah hian Group Saving Link Insurance chung changah LIC Office, Silchar-ah thil tihfel mai hleih theih loh, hotute la awm ngaihna tam tak a la awm ṭeuh bawk. Heng ching fel tur hian Board leh Managing Director bakah thawktu tlem azawng chu an awm hi a la ngai tlat a ni.
On goings scheme chung changah: Heng Corporation ṭhiah takte hian scheme kal lai leh khawih lai an nei hlawm a, chungte pawh chu a hmawr bawk fel tur a la awm bawk. Hengah te hian Scheme neitu Department/ Ministry te aṭanga lehkha lo kal chhan ngai leh tihfel ngai an la nei reng bawk a ni. Hengte hi zawi zawia tih fel chi a ni e.
- Lalthlahlova Sailo, ZOHANDCO