Mizo Kristian kuthnathawk taima leh rinawm taka thawkte tana thurawn

Sawhthing chi ṭha: Sawhthing chin i tum chuan sawhthing hrisel ṭha ngei, sawhthing bawr bial chi, a chhip bial, a chawh hunah pawh a thar a bial chum bat chi ni thei se.

A leilung duh zawng: Lung chang lungme ni lo lung chang tak hmun chem leh tuthlawha cheh palh pawha lo ti bal hlawk thei khawpa lung chang hmunah ni se. A lei pawh lei dum me lo a ni tur a ni. Lung no hmun, changel a nih pawhin changthir hmun a ni tur a ni lo; chungpui hmun ngei a ni tur a ni. Sawhting hmun atan chuan heng thing ṭona te hi a ṭha lo - thingsia, khiang. Thing ṭo tura duhthusam ber vang-thing a zing a nih loh chuan zuah tur. Theitat, hnahkhar, thingkha, changel chang-pui ṭo se a pawi lo.

Lo vah hmaa hriat tur: Ting a khat tawka zuah tur. Changel hi sang takah sat chhum lo deuha kih uai tur. Kangvarah a kung leia dah a, a hnuaia sawhthing chi va tuh tur a ni. Changel khan sawhthing lei ṭha a pe a ni mai. Lo hal hian kang ṭha lo se a pawi lo, sawhthing a hrisel duh a, mahse a har duh deuh.

Sawhthing chi siam dan: A chi zai hian a lian lam a pawi lo. A mit hi mit hnih pawh ni se a pawi lo. A chi hi lo vuai deuh hret se, a chi a chawr hma tuh tur.

A tuh hun: May ni 15 hnu lamah a ṭha, a lum avangin. A chi-ah sawhthing no tak hmang suh ang che: sawhthing hrisel ṭha a chi lian chu a in chin hawh tir theih a nia, a chi hlui kha. A mit a ṭhat chuan uluk takin ching leh rawh. A chawr tir a te deuha zung a thlak hunah a
ṭha leh mai. Sawhthing bi khat zawng hi feet khat danah chin ni se, a bi hi bal bi ang hian cheh dur zauh a ṭha. Thlawh apiangin a tak lang rih vur zel tur. Sawhthing bi khatah a tam duh lo thlawh a nuam. Rihvur a awl.

Phaiah chuan chin tlai hret a, khat deuha chin a buh hi chang thlak hram ila, a tam duh lo. Thing zuah uar hram hram tur, thal ni se a ngam vak lo a nia. Sawhthing vaitamin, a chaw ṭha lei ngai lo hnim tawha a kung khuh mai tur a ni. Sawhthing chi te leh a bi ṭha lo a chin ai chuan a chi lian lam a bi ṭha taka chin lo zir ve teh. I vau a hnim kha a ler lam sat la sawhthing damdawi pe ang che aw.

Lehkhathiam ka ni lo a, lehkhabu rawna hria pawh ka ni lo. Ka thawha ka zir chawp a ka hriat a ni. Kum 10 ka zir ṭhinna ka hlawhtlin pui ve
ṭhin dan a ni. Pathian zarah kumin thleng hian kan chhungkua kan eizawnna a ni a, sawhthing tam hi kan la nei ve ngai lo hlauh. Kawla ni chhuak chhiara eizawng kan ni e.

Hunin rem a tih chuan thlai dang chin dan ka hriat dan sawi ka chak hle bawk a, remchang kan zawng leh dawn nia. Lalpa'n thu awih taka in awm chuan in rama thil ṭha in ei ang a ti - lei leh van lalin.

- K. Lalruata, Khanpui