LC leh VC kutah hmasawnna
India ram democracy rorelna hnuaiah local council leh village council hruaitu kan thlang zo a ni ta mai a. Khawtlang hmasawnna atan hna an thawh ṭheuh beisei ila; mahni pumpui hmakhua chauh ni lo, khawtlang tan thawk tak tak turah kan beisei a ni. Kan beisei angin hna thawk mawlh se a duhawm hle.
MLA leh minister-te'n bial an nei a, an bial khaw hrang hrang leh veng hrang hrang hmasawnna turin an enkawl vek sêng lo a, chutiang tura phût theih loh khawpin an hnaah an buai tih kan hmu vek awm e. Chung an hmalakna tur leh hmasawnna tura thawk tak tak tur chu LC leh VC-te an ni. An kutah an khaw hmasawnna leh an veng hmasawnna a innghat thui dawn hle a ni.
Hetihlai hian, sorkarna chelhtute hian an mahni party ni lo LC/VC-te an hnuchhawn duh fo. Eptu party-in khawtlang ro an rel chuan sorkar angin hmasawnna tur pe loin anmahni party worker-te emaw, unit hruaitute emaw an vulh duh viau. Tunah pawh ZPM a sorkar mek a, an party ni ve lo LC leh VC-te an rêp viau chuan hmasawnna a kal ṭha thei lo ang tih a hlauhawm.
Politics aṭangin ram hmasawnna thui tak a innghat a, chutihrual chuan politics vanga inrêpna a awm erawh chuan hmasawnna a ṭhuanawp ṭhin. Mizoram ngeiah pawh inthlan hma khan minister pakhat chuan eptu party an thlan tlin chuan minister hmuh an har sawt tur angin a sawi ni awm takin video a darh a nih kha.
Khatianga sorkar laiin an party mi chauh duhsak an neih a, eptu party-te'n khawtlang hmasawnna hnathawh tur an dâl tlat a. Sum leh pawimawh dang an pek duh miau loh chuan hmasawnna a awm thei dawn lo tihna a ni a, politics-a inrêpna a ni nghal bawk. Hei hi politics thli chhia an tih chu a ni a, khawtlang roreltute'n khawtlang tana an mamawh an ngaih pawimawhsak duh miau loh chuan democracy palzûtna lian tak a ni ve thei a ni.
Kan hrawn tawh sorkarte'n LC leh VC-te eptu lam an nih chuan an rêp ngei ngei ṭhin a; an unit leh party mite an duhsak tlangpui ṭhin. Enga pawh chu ni se, party mi an ni emaw, khawtlang hruaitu an ni emaw, hmasawnna hna chu ṭha takin thawk ṭhin se a duhawm khawp mai.
LC leh VC-te ruling lam an nih vanga inlulin palh pawh a awl hle ang a, thil ṭha lo tak a ni. Ruling lam LC/VC an nih a, hmasawnna tur sum an dawng a nih pawhin a hna a ṭhain mipui tam zawkin an chhawr theih turin an ruahman tur a ni. LC/VC ruling nih vanga inluling tura kan thlan chhuah an ni lo tih hi hruaitu tharte chuan lo hre mawlh teh se. Khawtlang tana thawk tur an nih an inhriat reng a ngai e.
- Lal Rinmawia