Lengpui Airport – MOU-ah innghat ang

Lengpui Airport chungchang hi tunlaia Mizorama thu (issue) lian ber leh lar ber a ni hialin a rinawm; social media (youtube, etc) aṭanga sawi hona lo chhiar/ngaihthlak vangtein a mi nawlpui chuan a tlangpui chu an hre tawh ang. He lama thil hriate sawi loh lam tlem ka'n sawi ve thung ang e. Ka sawi ṭha tawk lo a nih chuan, GMLC AA-a ka thawhpui, kan advocate chhuanawm, Lalrempuia Mizo, amah ang thoa advocate thiamin ni tin rawng a bawlsak a, a thawmhnawte sûktir a, a inbual pawha a hnung nawhtir thei ngat, dan leh a kaihhnawih hre tak, mi thiam tak hian rawn tui hnih ve se la a ṭha ang e!

Aw le, kan hriat ṭheuh angin airport enkawl hi a hautak êm avangin kan Ministry kal tate pawh khan Airport Authority of India (AAI) kuta hlan an lo tum tawh a, mahse, AAI chuan lak a phûr êm êm loh avangin tun hi kan thleng a ni. Tuna kan sawrkar hi ZPM kaihhruai ni lovin, eng party emaw kaihhruai ni ta se la, a chêt lakna chu tuna kan Ministry chêt lakna ang tho hi a nih hmel. Chuvang chuan, a hmaa mite zui ni si, tâwp ringawt lo va, hma lam pan tumin kan sawrkar hian rem hre tak leh pà takin, mipui hamṭhat nan hma a la ṭan niin a lang.

Indian Air Force hnena hlan a nih pawhin uluk taka MoU ziah a nih chuan enghelh tur awmin a lang lo. Ram muan lai emaw, indo awm loh lai emaw chuan tun aia tam daih hi flight a awm theih phah dawn a, chutiang chu tun din hmunah chuan thil theih a ni si lo. Sawrkarin IAF kuta hlan a ṭha ang em, tiin mipui cheng a dek dêk dêk a, he kawng hlun hi kan zawh thei a nih chuan nasa taka thlawhtheihna lo pungin, chung chu damlo te, sumdawng te, zirlaite leh mi nawlpui zinte tan chhenfakawm, hlu leh kan duh ber a ni.

Engpawhnise, ram a muan laia khualzin thlawhna (civil flight) tluang tak leh zalen taka hman dan tur leh Zo fate tana ṭha ber tur chu kan sawrkar hian a hre êm êm ang tih ring ila; MoU-in kawngro a sú ang. MoU point hrang hrang Mizoram sawrkarin duh thála a draft chu IAF lamin an remti a nih phawt chuan, chu tluka hlu chu a awm thei lo vang. Mahse, inremna hrim hrim hi a lehlam lehlam tana ṭha tur a nih dawn chuan inphah hniam ve ve pawh a ngai ṭhin. MoU-a ziah hnan tawh thil ṭha chu a ding reng dawn alawm (see doctrine of estoppel in law); lungngaihna tur a awm lo. Ram a buai a, indonate a awm chuan eng airport mah civil mite tan hman theih a ni chuang lo.

Thil dangah han pakai ila. Mipui rorelna (democracy)-ah chuan hmasawnna (development) hi a hlu ber a; hei hi hriain sawrkar laipui pawhin development-a hma kan sawn theih nan kum 1992 daih tawh khan tualchhung sawrkar (municipalities) ṭha mi 74th Amendment hmangin a lo siam a. Hetah hian democracy ban (pillar) pakhat – thubuai/hlabuai remna (court) pawimawh êm êm pawh a awm miah tawh loh hi. Hei hi a mak lem lo; develolment a ni pawimawh ni. He Constitutional Amendment dungthûl hian The Mizoram Municipal Council Act, 2007 siam a ni a; development kan duh zawk avangin village council-in thubuai hlabuai remna (court) a neih ṭhin chu paihin, municipal council kan duh zawk a. He danah hian duh anga pumpelhna (deviation) a awm miah si lo.

Tichuan, tualchhunga thubuai tênau chinfelna awm tawh lovin, court puitlingah kan zuang chho dâwrh a, sum sen ngai lova municipality awmna apianga Mizo dan anga thubuai remna bo zel tur leh a enga kima advocate rawih ngai zel turte hi mi harsa zawkte tan hlei hlei a pawi asin le. Mahse, hmasawnna kan duh miau avangin Municipalities (Aizawl leh Lunglei) kan lo nei ta a; hun a'n kal deuh ang a, khawpui dangahte pawh neih hun a la awm ang; a lawmawm a ni mai e.

Hetiang ngaihtuah hi chuan Mizoram sawrkarin bengsika a ngaihtuahin Mizoramin ram dang te, state dangte kan ûm phak emaw, kan lehpelh hial emawna turin min (Mizoram) tihhmasawn (develop) a tum a, development pawimawhnain a bûk a tirit a. Hetiang hian, mipui ráwn chungin ngaihtuahna a hmang a, a zir bingtute’n sawrkarah rawtna an chhawp chhuak chauh a ni.

Khawvela kan awm chhung hian eng mah hi ṭha famkim a awm thei lo va, thil ṭhenkhat hi chu mipui tan a ṭhat zawk avanga palzam hlek ngai chite pawh hi a awm ṭhin ve bawk a ni.

– Dr J.T. Vanlalngheta