Pizawn/ Puzawn koh dan bawk

Kan sawi ṭhin, kan sawi nawn leh ang a, kan la sawi zel bawkin a rinawm. Tu sawi nge dika dik lo tih lam sawi ka tum lova, keima ngaihdan leh ṭha ka tih dan ka sawi ve thung dawn a ni.

Tunlaiin Pizawn/ Puzawn koh dan chung-chang hi Vanglaini ah kan hmu zing ta malh malh hle mai. Nupuite nu leh pa chu kan pizawn/ puzawn an nih avangin ka nu/ ka pa tia koh hi thil nih dan tur a ni lova, ka pu/ ka pi tih zawk tur a ni tia sawi tam tak an awm a, ṭhenkhatin ka nu/ ka pa tia in koh hi a pawina awm love an tih bawk si avangin kan thu a inkalh phah ta a ni ber mai.

Kei chuan ka nupui nu hi ka nu tiin ka ko ṭhin a, ka pa tia koh tur erawh a awm tawh loh avangin ka ko lo a ni mai a, la dam ni se chu ka pa tiin ka ko ngei ang, eng dang vang a ni lo, hmangaiha min chawi liantu ka nu leh pa ten min boralsan tawh a, he khawvelah mal takin ka awm a, chutia mal taka ka awm lai chuan hmangaihtu nei vein nupa ah kan insiam ta hial a, ka nupui nu hnen ah chuan, "Ka pi naupangte in nu leh pa ka nei tawh lova, miin ka nu/ ka pa tia an nu leh pa te an koh changte hian koh ve tur ka duh em em thin a, ka nei ve tawh si lo, chuvang chuan ka pi ni mahla ka nu tia koh i remtih chuan ka lawm ngawt ang," ka ti a, ani chuan, "Tehreng mai, ka duhdan tak zawk alawm, kei pawn ka makpa ni mah la ka fapa ang takin ka en ang che," a ti ta a.

Kei chuan ka nu tiin ka ko ta a, mahse ka pi a ni tih ka hai lo, nu ang takin ka en a, ani pawhin a makpa ka ni tih a hria a; mahse a fapa ang takin min en a, hauh ka ngaihin min hau hreh lova, ka lawm
ṭhin hle.

Mahni chanchin ka sawi tak vak nachhan chu entirnan ka hman duh vang a ni. August 30, 2016 a F. Van-
ṭhuama'n pizawn leh puzawn koh dan tur ah ziah ah khan Sanga ziah a rawn belh leh bawk a, "Ka nu/ ka pa tia inkoh sawi mawitute pawh hian an ngaihtuah chiang lo mai mai a nih ka ring" a tih kha chu a dikhlel deuh em ka ti. Ka nu ka pa tia an pizawn leh an puzawn ko hi hriat tur an tam hle a, hengte hian ngaihtuah chiang taka an koh a ni. Ngaihtuah chiang lo a ko an lo awm a nih chuan kan hriat bak zawng a ni the meuh mai.

Nu leh Pa pawh nu/pa tiin kan ko ngai hlei nem a hma ah 'ka' kan dah tel hram a, nu/pa tia inko thinte chu naupang chhia riau-ah kan ngai a ni lawm ni? Patea ngei tur pawh an hminga ko an tam a, chuatiang zelin putea te, nutei te ngei pawh an hminga ko an va tam si em, hetiang hi kan helh zawk dawn lo em ni?

Thil dik awm renga dik loa inkoh hi thil nihdan tur chu a ni hauh lo, eng vang nge tih inhriatpui hauh lova mi inkoh dan na tak tak a insawisel fo hian thil ṭha a thlen ang em tih hi kan ngaihtuah chian ṭha hlein ka hria. Hei aia chiang zawk leh entirna tha zawk kan la beisei chuan kan sawi zawm zel ang chu...

- C. Lalremmawia