LC/VC kan thlang zo ta

VC/LC inthlan hi party len zawng tehna pakhat chu ni ve bawk mah se, tehna lian ber leh rintlaka hman chi chu a ni hauh lo. MLA-ah chuan tu party tan pawh a dang leh daih ṭhin. Mipuiin kan veng, kan khaw bil enkawl tura kan mi thlan chhan tlangpuite chu hetiang deuh hi a ni ṭhin.

1. Kan laina leh hmelhriat ṭha, kan mi ngainat zawngte.

2. Veng chhunga mi rethei leh mi hnuaihnung te te, mi mâwl ber pawhin kan ban phak tawk tur nia kan hriatte.

3. Mahni veng chhung hre chiang a, mi tin mil tawka khawsa thiam leh mi inngaitlawm, viak ṭha si. Tute pawh be peih leh kâwm thei vekte.

4. Veng chhung tana inhmang peih mi, veng chhung level-a hruaitu nih inhria, chapo lo tur, boruak dang hap tum tlat lo tur, veng chhung hrauitu nihna level-a lungawi, veng chhung âtchilhtu leh, veng tan chauha inpe mi, thil tê tham thlenga ngaihven mi.

5. Veng chhung ṭhatna chauh duh mi. Veng hruaitu nihna remchanga hmanga mahni hlawkna tura hotute leh department leh office lam dawr reng tur ni loa kan hriatte.

6. Tute pawhin kan tlawhpawh ngam leh eng pawh kan zawh ngam leh fiam ngam, kan hauh bawrh bawrh ngam turte hi veng mite hian kan thlang chak ṭhin.

Chuvangin, tuna kan veng, kan khua enkawl tur leh hruaitu tur kan thlan tlinte pawh hian party base taka thlan in ni lo tih hriain, party rival, party inep boruak nei lovin, lungrual taka ṭhahnemngai taka veng leh khaw tana thawk ho turin ka ngen a che u.

- K. Hmingthankaia