Hektu 12-te dinhmun dik tak zawk chu

Tun hnaiah Social Media- Whatsapp leh Facebook bakah chanchinbu thleng in MNF MLA 12 te demna chhiar tur a tam a, an zinga Kohhran Upate demna pawh hmuh tur tam tak a awm a. Hetihlaia Mizo mipuiin kan ngaihtuah zawk tur chu, "A tirtu chung a pik e," tih kha a ni. 

An duh thu rengin he thil hi an ti lova, Pu Lalduhoma MLA aṭanga ban tur hian MLA 12 te in hmuh­khawm hian engmah an ti ngam lova, an party MNF hruaitute thutlukna a nih avangin an ti lo ngam lo zawk a ni tih hi hriat sak ve a ṭha lo maw? 

Kan MLA 12 te misual tawp khawk angin kan sawi hnawm ta hi an rilru chhungril a na dawn. Pawi sawi lo, Pu Lalduhoma chu ZPM a ni tih hi naupang chhia pawhin an hriat turin ZPM Manifesto hmangin Serchhip Bialah khan a in candidate a ni. Tichuanin Serchhip Bial mipui chuan ZPM Candidate chu an thlang tling ta a ni. 

Pu Laldenga hote pawh kha an lo chhuah tirh khan (Tuna kan CM zahawm tak Pu Zoramthanga te pawh an tel) MNF candidate an ni a, tichuan Poli­tical party an la nih hman loh avangin Independent in an ding a, an tlin khan tumahin Independent candidate an ti lova, MNF MLA an ni tih chu an pawm mai a ni. 

Pu Lalduhawma pawh hi MNF Party ngei ngei pawh hian ZPM-a MLA a ni tih hi an pawm ve tho a, mahse Assembly House lama MNF diklohna thiam tak leh dik taka a sawi chhuah fo avangin an mualpho khuhna atan MLA nihna paih an tum ta ringawt mai a ni.

Chumi kal zelah chuan MNF lama MLA senior te chuan tun hmaa MNF lama an thawh pui ṭhin leh politics lama an senior pui han hek chu an duh bik miah lova, MLA zinga a junior 12 an thlang chhuak ta a ni. 

MNF MLA junior 12 thlan chhuah zingah hian CM duhsakna changa Minister ni theite chu an tel ve lo, MNF MLA ah pawh Minister ni lo rau rau zinga a junior 12 te kha Party aiawhin Pu Lalduhawma hek turin an theh chhuak ta a ni. Anmahni thu chu ni se an duh bik lovang. 

Chuvangin, MLA 12 te hi dem lovin a tih tirtu lam zawk hi i dem ngam ang u, kan dem dawn rau rau a nih chuan.