Tu nge hmasawn? Tu nge tlahniam?

Mizorama VC leh LC inthlan kan zo ta a, mahni veng leh khua ṭheuhah sawrkarna siam theite chuan an VC leh LC an din tawh hlawm turah ngai ila. Mahni khawtlang ṭheuh tan ṭhahnemngai thawka an thawh a, eng kawng emaw talin khawtlang hmasawnna an thlen ngei theih nan duhsakna ka hlan e.

Kan hriat angin VC leh LC inthlanah hian Mizorama rorel lai pawl ZPM chuan seat an la tam ber a, VC leh LC lak an ngah ber bawk a. Chutih laiin opposition party-te chuan ZPM hi sawrkar lai an nih avangin che ṭha tawk lovah an ngai a, anmahni opposition lam che ṭha zawkah an inngai niin a lang a. Chu chu politics takin an han sawi zui a, mipuiin ZPM party-ah rinna an nghat tawh lo ang zawngin an sawi niin ka hria.

Opposition party-te thil sawi duh dan hi thil dik lo chu a ni hauh lo mai a. VC leh LC inthlan awm tawhte thlirin, rorel lai party-in seat an la tam tawk lo anga an sawi hi a dikna chin a awm ve thei ang. Mahse, an thlir dan hi thlir dan dik ber a ni kher lo mai thei bawk.

Heti zawng hian han thlir ve leh thung ta ila. VC inthlan hnuhnung ber aṭangin tu party-in nge hmasawn a, tu party nge a tlahniam zawnga kal tiin.

Inthlan hmasa aṭanga kan teh chuan ZPM party hi hmasawn ber an ni kan ti thei ang. Kum 2020-a LC inthlanah khan ZPM hian Aizawlah LC pahnih emaw chiah an la a, tun ṭuma inthlanah erawh chuan anmahni party malin LC zawng zawng zinga a zatve aia tamah an chak thei a. Inthlan hnuhnung ber aṭanga hma an sawn dan hi teh dawn ta ila, percentage 1,000% chuang daihin hma an sawn daih asin!

Aizawla LC thlan hnuhnung berah khan MNF-in LC 53 an la a, tun kumah chuan LC 20 chiah an la tawh a, LC 33 an hloh tihna a nih chu.

VC-ah pawh ZPM aia hmasawn nasa an awm chuang lo. ZPM hian kum 2020 khan VC 38 chiah an lak laiin, tun kumah chuan 267 an la tawh, hma an sawn dan hi nasa tak a ni. Chutihlaiin kum 2020-a VC 327 latu MNF chuan tun kumah hian VC 122 chiah an la tawh, tlahniam nasa tak an ni. Congress pawh a zatve aia tamin an tlahniam, kum 2020-a VC 98 an lak aṭangin tun kumah chuan 43-ah an tlahniam daih. ZPM hian VC tam tak MNF leh Congress an chhuhsak a ni.

VC leh LC inthlan hmasa, kum 2020 result aṭanga kan teh chuan MNF leh Congress te hi an tlahniam hle a, kum 2020-a sawrkar an siamna VC leh LC tam zawk tun kumah an hloh. Tehna hrang hrang awm thei karah a chunga kan tarlan tehna aṭang hi chuan khawi party-in nge hmasawn a, khawi party nge a tlahniam tih chu a chiang viau awm e.

- Lalduhmawia