MONITORING

Monitoring han tih hian , eng hna pawh a nihphung ang taka thawh a ni em tih endika vil zui hi a ni. Monitoring ngaih pawimawhna hmunah reng reng a mawhphurtu mihring tan inthlahdah a thiang lo va, hnathawh quality pawh a ṭha ṭhin.

Pragna Bhawan, Agartala-ah Dt 27-29 March, 2011 chhung khan ‘Workshop on Emerging Challenges in Agriculture & Allied Sectors in North Eastern Region’ heng Vigyan Prasar, Deptt of Science & Technology, Govt of India te, Agriculture Deptt, Govt of Tripura te leh All India Peoples’ Science Network Delhi te buatsaih ah khatih laia AMFU Gen.Hqrs-a President Pu R. Lalduhawma (fam) nen kan tel ve hlauh mai a. He hun buatsaihtute hian min lo dawngsawng ṭhain khual ṭha thlenin min lo thleng a, kan tlangnel sarh mai.

Workshop huaihawttute hnenah hian an Chief Minister hmuha han titipui ve kan duh thute kan han sawi fiam a (an CM hi he workshop-a khuallian tur a nih vangin). Ruahman lawk angin an CM chuan workshop hawnna neiin, urhsun takin scientist ho thusawite a lo ngaithla a. Kan beisei ruk deuh, mahse, beisei em em si lohin kan hming an lo lam ta khauh khauh mai a. Tichuan, India rama CM eiru lo bera sawi leh hmingṭha tak mai Pu Manik Sarkara chu kan President nen chuan kan kawm ve ta a ni. A sawrkar enkawl dante kan han zawt a, ”Monitoring hi ka ngai pawimawh em em a, physical leh financial achievement-te keimah ngeiin ka monitor ṭhin,” tih min hrilh a ni.

A ṭawiawmtute pawh kha an hrawl hle hlawm a, inṭhenawm na na na chu min lo dawngsawng ṭha hle a ni. Hemi ṭuma kan thil hmuh ṭha kan tih deuh chu, Emeritus scientist PS Rama Krishnana khan Tripura sawrkarin rubber a mala (mono-culture) a chintir vak mai chu a sawisel a. Scientist pain thu a sawi zawh veleh hian Pu Manik Sarkara hi lo dingin, rubber nena chin pawlh tur thlai/thei kung thlanga hmalak dan tur ni 10 chhunga CM dawhkana thlentir hman ngei turin he ta tel ve Principal Secretary, IAS val kha order a pe hmiah mai a ni. He leiah hian mihringte inmamawh tawn vek kan nih angin heng Pathian thil siam dangte pawh hi an ni vek a. Chuvangin, agriculture leh a kaihhnawih thila hmalakna reng rengah a mal ngawka (mono-culture) kalpui lovin, thil dang nena chin pawlh/ kalpui thiam a finthlak ber awm e.

Tripura sawrkar chuan an hmalakna hrang hrangte min fantir a, heng aṭang hian thil tam tak kan rama sengluh tlak kan hmu nual a ni, tlem han tarlang ila.

1. Thingtlang (rural) leh khawpui hmasawnna an kalpui dan a inrualkhai hle, hmun kilkhawr zawka inkalpawhna kawngte kha a ṭha em em vek mai.

2. Agriculture leh a kaihhnawih hoah tunlai thiamna thar an hmang uarin an advance hle.

3. Hmasawnna hna thawh kawngah field-a awm/thawkte office lam an thuam ṭhain, lirthei thleng pawhin an thuam ṭha hle.

Tuna kan sawrkar hian ram hmasawnna hna thawhte endika a ṭul anga hma la turin Mizoram State Project Monitoring Committee (MSPMC) chu Dt 22, January 2024 khan a din a. Chairman chu Chief Minister niin, member-ah kohhran aiawh MKHC te, political party hrang hrang BJP, INC, MNF, ZPM aiawh pakhat ṭheuh bakah, tlawmngai pawl CYMA, MHIP, MSU, MUP, MZP aṭangtein pakhat ṭheuh ruat an ni. Heng bakah hian Committee khaidingtu ber Vice Chairman (minister of state rank) leh Secretary (Mizoram sawrkara secretary rank)-te chu thla khata Re 1 hlawhin a ruat bawk. Committee-a member awmte han en mai pawh hian Mizoram tan chuan hei bak chu tih mai tur chi a ni. Committee din a nih aṭangin hna/project hrang hrang 30 chuang hret an endik/monitor tawh a; siam ṭhat ngai laite pawh siam ṭhat a ni hlawm. Kan Chief Minister Pu Lalduhoma’n a thawhpui minister hrang hrangte hnathawhte a thlirlet/review pui ṭhin pawh hi thil chhinchhiah tlak leh chhunzawm tlâk tak a ni.

Ram Thianghlima kan zin ṭumin Jerusalem chhûnga kan tlan lai hian kan tour guide Juda pa khân building lianpui mai hi min kawhhmuh a, chu building chu a lo lâr lai tak a ni nghe nghe a: an Prime Minister Ehud Olmert-a chuan chu building chu kha ta a lo saktir a lo ni a. Jerusalem Municipal lamin a sakna tur hmuna an thlanah sa lovin, an PM chuan a thuneihna hmangin a sakna hmun tur a lo sawn a, hemi avang hian Ehud Olmert hian jail bang a zut phah a ni. An PM-in thuneihna a hman sualna hi an en liam ve mai lo kha vawiin thleng hian ka la ngaihtuah fo ṭhin.

Mizoram hmun tam takah building/godown hrang hrang hman ṭangkai loha hluihlâwn tam tak awmte hi thuneihna hman sual rahte pawh a ni ve ngei ang. Mawhphurtu berah hian MLA-te emaw, department officer-te emaw puh vek a dik lo vang a; khawtlânga thuneitu hrang hrang–political party te, tlawmngai pâwlte leh kohhran lam thleng pawh hian mawhphurhna kan nei vek a ni. Ram leh hnam chakna leh dinchhuahna tûr chuan khua leh tuite nunphung hian thui tak a hril a ni.

Mizoramah hian tun hma aṭang tawhin hmasawnna hna thawhna tur sum tam tak sawrkar laipui chuan min pe reng ṭhîn mah se, kan sum hmuhte dik lo taka kan hman ṭhin bakah, kan hnathawhte quality a chhe em em fo mai a. Hei hi a chhan bul berah chuan, Mizoram sawrkarin ram hmasawnna hnathawhte endika a vil zui loh vang a ni ber ṭhin. Lui pawh a hnar a fim chuan a mawng lam pawh a fim ṭhin an tih angina, Mizoramah chuan Mac Donald Hill-a ṭhu CM hi eiruk leh hlemhletna kawngah han fihlim zel se la, a hnuai lam pawh a dik zel a ni mai.

E, tak ana, Tripura CM-in financial leh physical achievement ka monitor/endik ṭhîn a tih kha he workshop-a lo tel Tripura mi hna hrang hrang thawkte kha kan zawt a; an CM chuan kan bula a sawi ang ngei chuan hma a lo la ṭhin. An CM hi an chhuan hmel viau a, fiamthu thawh nan an hmang ve lo.

- Zion Lalremruata