PIZAWN/ PUZAWN KOH DAN

Thil dik lo ṭan tlattu hian ṭan an la na duh phian a. Pizawn leh Puzawn koh dan tur chungchangah pawh hian a dik zawk nia ka lo ngaih ṭhin, "Ka nu" "Ka pa" tih tur ti zawnga sawi hi a ngawi theiah kan ṭang zawk niin a lang. Hmanni-a MUP Assembly-ah khan hemi chungchang hi an ṭhet tlai deuh a, kan haw-na tur motor-in min nghah tawh avangin ka sawi ve hman ta lo va, he chanchinbu kaltlang hian ka hriat dan ka'n puang chhuak ve dawn a ni.

Ka pa chuan pi leh pu dik tak, a nu nu leh pate nei sa-in, "Pu" a rawn zawng a. Ka nu hi a rawn neih takah chuan ka nu pa chu a "Puzawn" a ni ta a. Ani chuan pi leh pu a nei sa a, a fa lo piang turte, pi leh pu la nei ve lo-te tan an pi leh pu tur a rawn zawng a ni. Tichuan an fate kan lo piang a, ka pa puzawn chu kan "Pu" dik tak tur a lo ni ta a. Ka farnute zawng zawng "Pusum" a t>l a, a t>l loh chuan "Pu b^n man" lei hial min chawitir thei a ni.

Ka pa puzawn chu a thih hnuah pawh a fapate zawng zawng chu kan Pu an ni ta vek a. Pusum an t>l thei ta vek a, Pu b^n man min chawitir thei a, lawi an kham thei bawk a ni. Ka pa puzawn leh a fate zawng zawng chu an tute kan lo ni ta a, khuala zin chang pawhin ka nu pa, ka pa puzawnte chi leh kuangte chu kan Pu tur an lo ni vek ta mai a ni.

Gen. 2: 19,20 ah Pathianin a thilsiamte Adama'n hming a phuah ang apiang an pu mai a ni, tih kan hmu a. Puzawn tih pawh hi kan pi pute'n hming an lo phuah a ni a, ṭhangtharte hian a hming ang ngau ngau hian tih dik ṭalh kan tum hi a ṭul lem lo. Hming a ni mai. "Ka pi, Ka pu" kan tih a
ṭul kher lo. Fate tan pi leh pu chu an ni.

Hming phuah hi kan pi pute hian an duhtui vak lem lo a ni ang, entirna'n "Purun" te pawh hian engmah a pu lo va, tu pu mah a ni bawk lo va, sakei hming ni awm zawk tak a ni! Mahse 'purun' tiin kan lam vek tho.

Fate pi leh pu tur lo "Pi Pu" khalh loh loh chu kei chuan ka ngam ve lo. "Ka pi, Ka pu kan ti tur a ni," tia sawi tam ber pawl, Pu Chhuanliana BVT pawh khan U in a koh daih kha! (Vanglaini 27.8.16 chhuakah) "Makpa" tih pawh hi hming an lo phuah a ni ve mai. Puzawnte "Ka pu tur" tia ṭang tlat kan nih chuan puzawn tan a makpa ni lovin, a "Tu" tur kan ni ang.

Chi thlah lamah chuan ka pa pa hi ka pu a ni a, ka pa-te lamah amah leh a unaute lo chu Pu an chhuak tawh lo. Nu-te pa erawhchu kan Pu dik tak an nih avangin an fapa te, an tupa te, an chipui te thlengin kan Pu ta ṭhin a ni. Kristian tan chuan nupa chu pumkhat kan nih angin, ka nupui nu leh pa chu ka nu leh pa an ni a, "Ka nu, Ka pa" kan tih hi pi pute pawhin an lo tih fo dan zawk niin ka hria.

Kan pate puzawn hi kan pute an ni tih leh an tute kan ni tih hi Mizo zawng zawngin kan pawm si a, fate Pu tur lo Pu khalh loh loh chu a mawi dawn em ni? An tute ni lovin, an makpa kan ni daih si a.

- Vanlalpeka Sailo, Sialsuk