KHA MASI MAWLH MAI KHA

Naupang kut chât leh hnap tawlh a reh tawh lo. Nu pawnfen tlang khak a reh tawh bawk lo. Reh thei lo hi a tam tulh tulh a, tapchhak mei lum kan bial tuau tuau reng mai. Chu chuan thlasik a nihzia a lantir.

MAS A HNAI TA: Tin, heti hi a ni a, Lo lam hna zawhfel a ni ta, Tlangsam par pawh a lo vul ṭan ta, dai phûl lengah Nihawi a par eng chuai mai bawk. Mual han thlir ila, thlasik khaw vawtin a hmet ro vûk mai bawk a, Mas a hnai ta tih hai rual a ni lo. Siampui Sailo leh Lalsangzuali Sailo mas hla kha, in tin maiah Tape cecord hmang ngei mai khan kan play chuah chuah mai a. Lal pian hun pangpar a vul leh ta. Vul zawng zawnga vul mawi ber, kan khaw daia tlangsam par khan, Lal pian hun a va hril chiang em.

BAWNG KAN TALH DAWN: Biak In lamah lah Kohhran thupuan pawh mipuite'n beng an dawh ṭhup a, puan tur a tam ngei mai. Mas thawhlawm intuk kha puan a'n ngai phawt a, Mas thing phurh hnatlang, khél lova awm ṭhin chu, hnatlan hun tur an puang chiang ta. Mas ruai atan, Bawng talh a ni dawn, a ngaituahtu turte ruat an ni nghal. A va mas ṭan tawh tak em.

THALAI CHET A HUN E : Chutichuan, ṭhalai lamin, Aw bethlehem, Judai rama mi, Judai khawpuite zingah, i tê ber tawp lo ve, tih hla kha an han zir dup dup mai a, rilruin Bethlehem a thlir vawng vawng, Biak In chei kha ṭhalai hna a ni a, Mizo thil neih hmang ngeia chei tur a ni. Zamzo par leh Tartiang kung buk laih mai hmang khan, Biak In hungna leh a chhung ṭhutthleng banah khan kan han tung ṭhuau mai a, khawlla hrui fei thlung kualin, lehkha mawi, kil thuma cheh zum kha a khát tawkin, maida ban hmang khan kan char bet a, kan han khai phe hlep hlep mai chu. A va vul mawi tak em. A bul vela naupang balloon khâlho pawh khan, in lama haw zai an rel thei lo.

RUAI LAM VE THUNG: Mas ruai kilna tur, hnah la pawl an awm a ngai, tleirawl rual tan, hnah la hlui an siam leh ngei dawn tih hria khan, phur takin an liam sang sang ta mai le.

Mas dawn niah mas Bawng kha, khaw ṭhenawma mi ngei an rawn kai thleng a, naupanghovin an bial laih laih a, tlangsam par khuh lukin an tlung rùn mai le.

MAS INKHAWM CHU: Mas ni ngeia ruai ṭheh kha a ti mas-tuah ngaiin, kan buai mup mup mai a, fatu chauh an buai lo, KṬP nulaho khan mas Chhangban, in tina an chhum kha khawnin, an vir zak zak bawk. Buai azawngah buai hlimawm a va ni tak em.

Naupangho chuan, Mas thuamhnaw thar leh pistol lem leh balloon nen, Biak In an pan sang sang a, ruai sa rimin a lo ur chum chum mai bawk.

Thingpui lum leh ruai fatu an awm a ngaih avangin, inkhawm thei kha chu chhangchhe lam leh upaho kha an ni mai a, nau ṭap ri leh, a khát tàwka balloon puak ri nen, an ri lelu mai a ni.

MAS SERMON CHU BAWNG IN BAWK : Thusawitu atan upa zinga aw fiak ṭha kha an han ruat ngei a. Thupui awmsa hmanga inbuatsaih chi a ni ve lo, a thiam zawng a nih loh avangin, a duh dan danin a her rem a, Bethlehem leh Bawng in kha a ri zing em em ringawt mai a ni. A ngaithlatu mipui chu Bawng in tualah a ṭhuttir ṭhup mai asin. Ran in kha Bawng inah a ngai hmiah a, a ni nge ni lo tih tu ma'n tun thlengin kan hre bik chuang lo.

CHHANGBAN CHU : Inkhawm banah Chhangban ngei mai kha, KṬP khan an lo sem a, chhangban lek lawrh lawrh pah khan Thingpui an han in ri hlup hlup mai ṭhin a, a mas ngawih ngawih mai a ni.

MAS RUAI PAWH : Tlai a lo ni a, Biak In tual zawlah Changél hnah phah hmang ngei khan, mas ruai kan han ṭheh a. Changél hnah phaha chaw chhûn vûm kha an han hai kaw pawp pawp a, buhchiar chungah Bawngsa chhum kha an han chhûng khu vut vut mai a, a chang chuan Vawk sa chauh dawn ṭum a awm bawk. Dar insi deuhthaw khan kan han ṭhu bial laih a, mahni hmaa mi kha a hmatiamin kan han ei ṭhin a nih kha.

MAS NAWN A NGAI : Zan inkhawm banah, Mas thlen in, Upa in zau ber maiah khan mas lengkhawm kha kan han nei leh a, ruai sa bang, bel khat a awm chuan, nawn leh ngei tumin Upa viak ṭhahovin, lenkhawm tlaivar kha kan han tum ngei a, zing dar 4 a lo rik chuan, Upa leh khawsa thei deuh in lam panin kan han carol ta ṭhin a nih kha, an thawhlawm tling khawm khan Mas nawnna a lo daih ve leh mai ṭhin. Kohhran hlim lai phei chuan, Mas nawn nana Vawk thawh theite kha an awm a, kha bak baka Mas kha a awm dawn em ni ? 

KHANG HUN LAI KHA CHUAN : Mihring inmamawh tawnna leh hlimhona a inang tlang a, kohhran hian khawtlang nun a vawng a, zu rui hawklak interek hrang tlem azawng an awm ve ṭhin tih mai loh chu, mipui nawlpui chu kohhran programme lamah kan kal dial ṭhin. Lengkhawm pawh apui anawiin Mas thlen in kan pan a, zai  ve peih lo tan pawh, Mas thlenin kawt zawlah, mas meipui chhepin, kan bial tuau mai a, mi zawng zawng hi kan hlim tlang a ni ber mai.

Khang hun laia Mas ang kha a piang leh tawh awm si lo va.