EIZAWNNA
Hman deuh tawh khan ka bazar kal tur Bawngkawn city bus aṭangin ka chuang phei a. Vai tleirawl pakhat hi tlar hnung berah chuang ve in kan tawt naklaiin mi pahnih vel zet ṭhutna awh hian kanghlang tak, sir he tak chungin hnung lam hi a hawi pah chhen mai a. Kan ngaimawh tlangin mit a tikham hle mai a, mahse bus conductor khan bus hnungah a lapaw chini zawrhlai a tar a, a tlak hlau a ngaihven a nih hi a ti ta a.
Mi ramah, kum naupang te ni chunga a eizawnnaa a inpum-pek dan khan kan rama ṭhalai tam tak eizawnna vei lo tak takte hlimthla a tilang chiang ngawtin ka hria. Mi ṭhenkhat chuan vairam ang emin kan la rethei ve lo a chuti takin eizawnna lak urhsun a, tawrhchhel leh teirei peih kan la mamawh ve vak hleinem ti zawngin ngaihdan an nei mai thei; mahse chutiang dinhmun kan nghah thlen meuh chuan khua kan tlai tawh thawthang ang.
Kan ramah mi
ṭhen-khatten Zoram thar thlen huna a nawm dan turte duhthusama Tlumtea thlir taka kan thlir lai hian hnam dang kan rama awm mek ṭhenkhatte hi chuan kan thawh peih loh leh thawh duh loh thawkin anmahni zoram thar hi an chen mek tawh reng zawk hian ka hre ṭhin!
A kal tawh leh hre zawkten ram chang-kangah chuan eizawnna, a bikin an ṭhalaite pawhin an ngaih pawimawhzia an sawi ṭhin. Hnathawh mumal nei lo chunga nupui pasal neihte phei chu thiang lo tlukah an ngai hial awm e. Kan venga chhang urna khar chhawngtu vai pawh fiamthu deuha nupui nei ve tawh mai tura an tih pawhin bank-a a account a pawisa la tlem thuin a chhang! Kan ramah chuan eizawnna (sawrkar hna kher lo) lak thutaka ngaihpawimawh nachang hre em em lo chung siin nupui pasal neih nachang kan hre leh hlawm phian si a, fanau neih duah tawh hnua nu leh pa te leh chhungte buaipui ngai hi tam tak kan awm mek a ni. Mi thiamte zirchiannaah pawh nupa inṭhen chhan tam ber kha ei leh bar harsatna vang tih nih kha. Hei hian kan ram dinhmun nasa takin a ti hmelhem awm e.
Kan ram zirna kal-phung ṭha lo ṭhenkhatin a hrinchhuah, nu leh pa te aṭanga kan inrochun zel zirna in a tum ber nia kan hriat laklawh tawh sawrkar hna hi beisei lo ngam ila. Zirna hian mihring puitling a chherchhuah a, eng hna pawh thawk thei leh thawk tlaka mi siam a tum zawk tihah chiang tharin, midangte kan tehna pawh eng hnathawk nge a nih ti tawh loin, engtiangin nge a hna a thawh in ti tawh zawk ila. Chutichuan tun ai hian eng hna pawh nise eizawnna kan ngai pawimawh ang a, kan ram min hruaitu tur politician pawh duhtui nachang kan hre sawt tawh ang.
- V. Lalchhanhima, Chhiahtlang