Party Politics inchirhthehna - II

Pu Hawla’n  lalṭhutthleng a kian

Congress (I) President Rajiv Gandhi, Prime Minister ni bawk ruahmanna angin June ni 25, 1986 khan New Delhi-ah MNF aiawhin Pu Laldenga leh Congress (I) aiawhin Vice President Pu Arjun Singh te chuan Mizorama interim sorkar siam dan tur ‘thuthlung’ point 9 an ziak a. He thuthlungah hian ‘Pu Hawla’n a lalṭhutthleng a kian tih leh, a kian lo a tawlh sawn hret chauh a ni’ tia inhnialna awm fo hi a tarlang chiang ber awm e.

He thuthlung ang hian interim government chu Mizoramah August 21, 1986 khan siam a ni ta a. Pu Denga chu Chief Minister niin, CM nilai Pu Hawla chu Dy. CM a ni. Council of Minister 9 an awm a, MNF lamin minister 4 neiin Chief Minister dinhmun an luah a, chungte chu- Pute, Laldenga, Rualchhina, Zoramthanga leh Tawnluia te an ni a. Congress lam aṭangin Pute, Lal Thanhawla, Vaivenga, R.Thangliana, Sainghaka leh C.L. Ruala te niin minister 5 neiin Dy. CM an chang thung.

Hei hi thil awmdan a nih avangin ‘Pu Hawla’n lal-
ṭhutthleng a kian,' tih leh, 'a kian lo, a tawlhsawn hret chauh a ni. Minister tam zawk a la neih bakah Speaker nilai Dr. H. Thansanga leh Dy. Speaker ngai Pu K.Sangchhum nen phei chuan MNF lamin 4 chauh an chan laiin, Congress lamin 7 an chang a, dinhmun ṭha zawkah a kaihhruai party chu an la awm a ni,' ti pawl an awm bawk. Engpawh nise, kan tarlan tawh ang hi thil awm dan chu a ni.

Remna atana dinhmun kiantu fak hlawh lo val

Remna leh muanna hnuaia Pu Laldenga leh Pu Hawla kaihhruai interim government a lo din khan lang ve lo, a phena an nihna zawng zawng hlantute hian fak zui an hlawh lo a, hriat zui an hlawh lo hle mai. Congress sorkara minister hna lo chelh mektute, Pu Rokamlova, Pu Hiphei leh Pu Liansuama te hian a zawng zawngin an nihna an kian. MNF lam aṭangin an sorkara minister Pute, Chawngzuala, Lalrinchhana leh Thankima te a awlah an ṭang bawk.

Anniho hi remna atana a kila lung pawimawh ber berte an ni tih hi kan hnam hian hre reng teh se.

‘Zoram buai lai khan’ tih ziaktu, MNF party dintute zinga mi Pu C.Hermana chuan remna thuthlung ziah a nih laia a rilrua awm chu hetiang hian a ziak: “Mizoram remna leh muanna atana kawng sat kawtu bulpui bera ka ngaih Pu Hrangchhuana leh Pu Lalduhoma-te hmel erawh chu a lang ve lo va; tin, lang ve tura pawimawhna pawh an nei ve tawh lo. Ka mitthlaah erawh chuan an lang chiang ber mai thung” a ti hial a. Pu Hrangchhuana, hetih lai 1972-a Mizoram Pradesh Congress President chu MNF te be tura Prime Minister, Indira Gandhi ko ei theitu hmasa ber a nih vang a ni, a ti a. Pu Lalduhoma chu- Prime Minister Indira Gandhi duh dana sorkar laipuiin MNF-te inremna a siampui theih nana Mizoram inthlana Congress party hneh taka chaktir theitu bulpui ber a ni, tiin, remna kan neih chu Lalduhoma vang a ni, ti ang thawhthangin a tarlang bawk. (Zoram buai lai khan, C. Hermana, 2015).

Remna palai hna thawktu Pu Lalduhoma’n remna atana a hna a bansan chungchang hi ‘Zoram tan’ tih lehkhabu-ah ti hian tarlan a ni - “Pathian remruat leh kohnaah ngaiin 1984 January thla khan India ram President hnenah IPS hna aṭanga ka banna chu ka theh lut ta a. Ka chhungte hruai turin Delhi-ah ka kir leh a. Ka nupui fanaute nen, dam chhunga mipui rawngbawl turin, ni 23, Dec, 1984 khan Aizawl kan lo lut ta a. Ka chawthleng chu ka leihbaw fel ta a ni. Kan chhungkua leh kan bungrua zawng zawng chu Jeep pakhatah kan leng vek a, a bak engmah khawvelah hian neih kan nei lo” tiin. (Zoram Tan, Published by R.Lalrawna, 2013).

Party politics inchirh-thehna tam tak karah ṭhang-tharte’n thu dik an hriatna hruai kawi thei zawnga kan politician ṭhenkhat leh, party worker-te’n thu dik chanve an sawi ṭhin hi a pawi a. Remna leh muanna kum 30 zet kan neih tawh hnu hian remna atana inhlan fai vektute pawh party politics tuinu a kan chirhtheh zui duh zel hi a fel lo a, kan hnam pawi khawihna a ni hial ang.

- Rothuama Sailo