Hlawh nei tham turin

Tun hnaiah ṭum hnih ṭum thum chu Mizo nula saruak deuhthawa anmahni leh photographer duhthu ngeia lak Facebook vela pholan thu ka lo chhiar ve a. Ka ngaihdan mawl tak hi puan chhuah ve a ṭulin a ṭul tawh a, Kelkang vanglaia puang chhuak lo thei lo ho thu hla ang maiin ka puan chhuah ve a
ṭul a ni.

Facebok lama an comment ka lo chhiar ve ṭhin a, Mizo nula saruak chu 'art a ni' tia sawitu leh a changkan thu ziaktute chu photographer-te vek an ni tlangpui a, midangte pawh an awm bawk a, heng mite hian art ang zawngin an thlir a, hei hi lo sawisel theih a ni lo. Hnam dang nula saruak pawh kan hmu ṭhin a, engkim mai thup lova lang vekte hmuh tur a awm a, hengte hi kei chuan art a nihna hmu thiam lo mah ila art titute hian an ngaihdan an sawi a ni.

Tichuan ka sawi tumah han lut ta ila. Kei kan Mizo nula
ṭhenkhat pian pawh nalh ve tak takte tan hian photographer-te hian kawng zawn sak hi a batin an ba hian ka hria. A thlalatute chu kan hre tawh a, heng mite hian an nula thlalaksakte hi pawisa an hlawh dan kawng zawng se, megazine leh TV channel lian tham deuhte hi Mizoram pawnah zawn sak se, tichuan inphelh ruah man pawh a awm tawh ang chu. Tunah hi chuan 'hnam dang pawhin an ngam' tia infuihpawrh titih hian an inthlem ni hmiang ka ti mai a, pawisa hlawh pawh ni se eng tham mah hlawh chhan tur awm lo hian an lo inphelh ruak ve kung mai.

Tin, ziaktu hmasa lamte ṭawngkam kha hawh ta ila, 'Art' pawh lo ti tehreng se, kei chuan hlawh nei lovin inphelh ruah hi 'At-Thlak' ka ti takzet a, thu thiam deuhte word play hawhin 'Art-Thlak' kan ti zawk dawn em ni? Kan nulate kan phelh ruak ta sa sa, a thla laksaktute hian Mizoram pawna megazine te hi in biak pawh sak thei lo em ni?

Facebook-a lang tur tawk vela inphelh tir mai mai atan kan Mizo nula pian nalhte hi ka ui a, an ngam, an cho a, an zuam a, an duh a, an châk ve tho nia a lan vang hian hlawh nei tur law law hian an thawmhnaw hi phelh tawh se.

Hei hi photographer lam hian kawng lo dap sak ve se, nula phelh ruaka thlalaksaktu photographer te chu a thlalakah a chuang kulh tawh a, anni lam hian mawhphurhna angin la se, anni tan sum awm bawk, nulate tan sum awm bawkin kal law law se, eizawnna a ni mai dawn a ni.

Tunah hi chuan kan zah loha kan huaisena kan 'changkan' tehlul nen hian kan art hi miin atthlak min la tih sak bawk si nen, i fimkhur tlang zawk phawt mai teh ang u.

- Kima Khiangte